Iosua 18:8-14

⁸E Iosua i taki e huriki a bakovi ri gi here puru a nitana malala, i ta maea, “Mu vano mu kasisi lobo a maka tabekena malala, mu here puru a nitana, mu bole valai nau. Ga rehi na rihiva na satu, ga lohoka vona i vai a tabekena malala e BAKOVI DAGI ge habi ne mua.”

⁹E huriki a bakovi nga ri longoa pali a nitane Iosua, ri vano ri kasisi a maka tabeke lobo, ri here puru a maki ri matai na puhu tara. Ri nagi a tabekena malala i polorua, ri here puru a maka rana tanga ri tabuli pololilo ne ria. Muri ri hamule mai e Iosua na mada o Silo.

¹⁰E Iosua i rehi na rihiva na satu na tanga e Silo, ge lohoka vona i vai a tabekena malala ge habi na kabu takutaku. Muri i verua a malala i habia ne ria.

¹¹A Kabu ne Bensamin i bole a malala na kurukuruna kabu ne Iuda a kabu ne Iosep.

¹²Na tabeke mule sike a tabekena malala ne ria, a nagi i tubu na naru e Iordan i sike mai a kupona na tabeke mule sike na tanga e Ieriko. A nagi i kaogo vonga i lakea mai a tabeke na nirolona haro i lokovonga liu na tabeke i ngeki ne Bet-Aven.

¹³Muri a nagi i lakea mai a tabeke mule puru na kupona na tanga e Lus (re Betel), i puru mai a tanga e Atarot-Adar, i pesi na mapana lolo tabukoi na tanga e Bet-Horon.

¹⁴A nagi i kaogo vonga i lakea mai a tabeke tara na nirolona haro na lolo na tabeke ne Bet-Horon. A nagi i puru lakea i vano i bele na tanga e Kiriat-Bal (re Kiriat-Iearim). Ra tanga iea ne vona e huriki a Iuda na tabeke na nirolona haro.