Ioanej 4:1-19

¹KAUN lao kotin mani, me Parijär akan ronadar, me Iejuj kin wiada tounpadak kan o paptaij toto jan Ioanej,

²Ari, pwe jota me pein Iejuj kotin paptaij, japwilim a tounpadak kan ta,

³Ap kotila jan Iudäa, kotin purelan Kaliläa.

⁴A a kotin weid nan wein Jamaria.

⁵I ap kotilan kanim en Jamaria eu, me adaneki Jikar, koren ion jap, me Iakop ki on na ol Iojep.

⁶Iei waja en Iakop a parer eu mia. Iejuj ari nirekila a japajapal, ap kaipokedi pon parer o, ari mepukat wiauier impan auer kawonu.

⁷A li en Jamaria amen ap kodon idip pil ia. Iejuj kotin majani on i: Kido lim ai kij pil en!

⁸Pwe japwilim a tounpadak kan ko on nan kanim, pan netiada jak arail.

⁹Li en Jamaria ap indan i: Iaduen, komui kijan men Juj, ap poeki pil re i? Pwe nai li en Jamaria amen, pwe Juj akan jota kin waroki on men Jamaria.

¹⁰Iejuj kotin japen majani on i: Ma koe aja duen kijakij jan ren Kot o ij i, me indan uk: Kido lim ai kij pil en, koe pan poeki re a, a ap pan ki on uk pil memaur.

¹¹Li o indan i: Main, jota japwilim omui men idip pil, a parer me lol, a ia waja, kom pan idip jan ia pil memaur?

¹²De komui lapa jan jam at Iakop, me kotiki on kit er parer en, o pein nima jan, o na kan, o na man akan?

¹³Iejuj kotin japen majani on i: Karoj, me nima jan pil wet, pan pur on men nim pilada.

¹⁴A meamen, me nima jan pil, me I ki on i, pan jolar men nim pilada kokolata, pwe pil, me I kin ki on, pan pot loli kujukujudan maur joutuk.

¹⁵Li o ap indai on i: Main, kom kotiki on ia kijan pil o, pwe i en jolar men nim pil, o jolar kodo o idipa jan met!

¹⁶Iejuj kotin majani on i: Kowei ukedo om paud!

¹⁷Li o japen indada: Jota ai paud. Iejuj kotin majani on i: Melel om lokaia: Jota ai paud.

¹⁸Pwe om paud me limen maj kokodo, a kaidik om paud, me koe paudeki met; iei melel, me koe indada.

¹⁹Li o indan i: Main, i ap ajaer, me jaukop amen komui.