Wäö 4:1-19

¹Paditeoidi ïnänite ïïmaï ante tededäni ëñënänitapa. Itota pönö cædinque æpæ̈në guidongä guiidinque tömengä nänö ëmïñæ̈näni ïñömö wïï Wäö ëmïñæ̈näni baï wædænque badäni inte nanguï ïnäni badänipa, ante tededänitapa.

²Mänömaï änäni incæte wïï Itota në guidongä ïnongäimpa. Wæætë tömengä ëmïñæ̈näni waodäni ïnänite guidönäni guiigadänimpa.

³Mänïnö ante Paditeoidi do ëñënänipa, ante änäni ëñëninque Awënë Itota Oodeabæ quëwëninque wadæ go Gadideabæ ïñömö ocæ̈ ëmænte gogacäimpa.

⁴Gadideabæ taadö Tämadiabæ ïñömö tæcæguedë ïnö godö tömengä goquënengä ïnongäimpa.

⁵Tämadiabæ ïñömö godinque tömengä Ticada näni äñömö pongantapa. Mänïï Ticada quëwëñömö eyequeï docä Aacobo wodi tömengä wengä Ootee wodi ingante, Pancabaa bitö ömæ baquïñömö, ante tömengä ingante nänö godongaïmæ ïnimpa.

⁶Ayæ̈ æpäamönicæ̈ Aacobo wodi nänö æ̈æ̈ wogaïmönicæ̈ adoyömö ïnimpa. Itota taadö gobæ ïnö godinque nangæ̈ badinque æpäamönicæ̈ ïñömö pö tæ̈ contayongä mänïñedë tæcæ bæcä bagatimpa.

⁷Tæ̈ contate ongöñongä Tämadiabæ quëwengä onquiyængä æpæ̈ iyænte tadonte æncæte ante pongä adinque Itota tömengä ingante, —Æpæ̈ pönömi beboe, angantapa.

⁸Edæ tömengä mïñæ̈ në godäni mänïnäni quëwëñömö cænguï godonte æncæ godäni ïnönänimpa.

⁹Tämadiaidi ïnänite oodeoidi cöwë gomö adäni ïnänipa, ante ëñengä inte Tämadiabæ quëwengä onquiyængä ïñömö Itota ingante, —Bitö oodeobi ïmi incæte botö Tämadiabæ quëwëmo ïñömote bitö ædö cæte botö ïmote, Æpæ̈ pönömi beboe, ämii, ämopa.

¹⁰Äñongä Itota wæætë, —Bitö, Wængonguï quïnö nänö pönönï ï, ante ëñente baï ayæ̈, Æbodö ïnömo inte bitö ïmite, Æpæ̈ pönömi beboe, ante apæ̈neboo, ante ëñente baï bitö wæætë botö ïmote, Æpæ̈ pönömi beboe, ancædömiimpa. Ayæ̈ botö bitö ïmite æpæ̈ quëwenguïmæ̈ pönömo becædömiimpa, ämopa.

¹¹Angä ëñëninque onquiyængä, —Awënë, bitö æpæ̈ mä iyæncade dæ ampa. Ayæ̈ æpäamönicæ̈ guiibæ impa. Mänïmæ̈ æpæ̈ quëwenguïmæ̈ bitö në apæ̈nedïmæ̈ ædönö mä iyænte ænguïmii.

¹²Mönö docä mæmpo Aacobo wodi ïñömö, Botö æ̈mæ̈wo wæ̈mo adinque botö æpäamönicæ̈ mïnitö quï bacæ̈impa, ante ïïmönicæ̈ mönö ïmonte godongacäimpa. Tömengä adomönicæ̈ æpæ̈ begacäimpa. Tömengä wënäni tönö tömengä cæ̈ningäidi adobaï adopæ̈ begadänimpa. Adocä mönö docä wædangä ïñongante bitö godömenque ñæ̈næ̈mi inte në cædömi ïmitawogaa, ämopa.

¹³Äñongä Itota wæætë, —Æcämenque ïñömö mänïmæ̈ bedinque wæætë gæ̈wænte bacæcäimpa.

¹⁴Æcämenque botö godonguïmæ̈ në becä guiquënë tömengä gæ̈wæ̈nämaï cöwë quëwencæcäimpa. Wæætë botö tömengä ingante tömëmo godonguïmæ̈ godömo bedinque tömengä botö quëwënö entawente quëwencæcäimpa. Æpäamönicæ̈ cöwë cægö baï botö tömengä mïmöno godonguïmæ̈ beyænque tömengä wæ̈nämaï nänö quëwenguïnö do æ̈ninque quëwencæcäimpa, ämopa.

¹⁵Onquiyængä tömengä ingante, —Awënë, äninque, Botö gæ̈wæ̈nämaï bacæboimpa, ante mänïmæ̈ botö ïmote pönömi beboe, ämopa. Ayæ̈ mänïñömö cöwë æpæ̈ iyæncæ pönämaï incæboimpa.

¹⁶Ante äñongä tömengä wæætë, —Goe, bitö nänöogængä ingante aa pedinque ænte mämömi pongäe, angantapa.

¹⁷Äñongä tömengä wæætë, —Botö nänöogængä dæ ampa. Angä ëñëninque Itota tömengä ingante, —Bitö, Botö nänöogængä dæ angampa, äninque nö ante ämipa.

¹⁸Ïñæmpa bitö nänöogæ̈idi önompo æ̈mæmpoque ïñönänite bitö tömënäni ïnänite mönïmi ïmipa töö. Ayæ̈ ñöwoyedë onguïñængä bitö weca në quëwengä ïñömö wïï bitö näwä nänöogængä ingampa. Ïninque ñöwo bitö änö ïñömö edæ näwangä impa, ämopa.

¹⁹Angä ëñëninque onquiyængä, —Awënë, Bitö Wængonguï beyæ̈ në apæ̈nebi ïmi adinque ëñëmopa.