ᤕᤢᤜᤢᤴᤏᤠ 4:1-19

¹ᤕᤧᤛᤢᤖᤧ ᤕᤢᤜᤢᤴᤏᤠ᤺ᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤜᤢ᤹ᤛᤠᤶᤒᤠᤜᤠ᤹ ᤆᤥᤃᤢᤛᤡᤀᤠᤱ ᤒᤵᤋᤡᤛ᤻ᤔᤠ ᤐᤡᤖᤢᤛᤡᤖ ᤕᤠᤰ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤑᤖᤡᤛᤡᤜᤠ᤹ᤖᤧ ᤔᤧᤄᤧᤵᤛᤢ॥

²(ᤜᤧᤰᤁᤣᤛᤠᤱ ᤕᤧᤛᤢᤖᤧᤃ ᤔᤧ᤺ᤴ. ᤁᤖ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧᤖᤰ ᤒᤵᤋᤡᤛ᤻ᤔᤠ ᤔᤧᤒᤡᤖᤢᤛᤡᤖ ᤔᤧᤕᤠᤃᤧᤖᤥ॥)

³ᤕᤧᤛᤢᤖᤧ ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤂᤢᤏᤧ᤹ ᤕᤜᤢᤍᤡᤕᤠ ᤌᤢᤔᤗᤠᤶ ᤃᤠᤗᤡᤗ ᤌᤢᤶ ᤗᤧᤵᤔᤠᤱ ᤕᤠᤶᤔᤥ ᤏᤢ᤺ᤰᤂᤧ ᤐᤣᤖᤥ॥

⁴ᤀᤠᤸᤗ ᤂᤢᤏᤧ᤹ ᤛᤠᤔᤖᤡᤕᤠ ᤌᤢᤶᤗᤠᤶ ᤐᤥ᤺ᤱᤔᤠᤀᤠᤱ ᤐᤣ᤺ᤰᤔᤠ ᤁᤧᤒᤥ᤺ᤱᤒᤠ ᤘᤕᤧᤖᤥ॥

⁵ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤕᤠᤁᤢᤒᤖᤧ ᤁᤢᤛ᤻ᤛᤠ᤺ ᤕᤢᤛᤢᤑᤧᤴ ᤐᤡᤖᤢᤒᤠ ᤗᤠᤈᤣ᤹ᤀᤡᤸᤗᤧ ᤁᤢᤒᤣᤛᤠᤱ ᤛᤢᤂᤠᤖ ᤔᤧᤵᤔᤏᤠᤒᤠ ᤛᤠᤔᤖᤡᤕᤠ ᤐᤠᤱᤓᤣ᤹ᤀᤥ ᤁᤧᤖᤧ॥

⁶ᤂᤧᤵᤔᤥ ᤕᤠᤁᤢᤒᤖᤧ ᤋᤕᤢᤒᤠ ᤘᤠᤒᤠᤰᤁᤡᤴ ᤏᤧᤛ᤻ᤛᤧ॥ ᤂᤢᤏᤧ᤹ ᤗᤠᤶᤍᤡ᤺ᤰᤁᤥᤗᤠᤶ ᤏᤠᤛ᤻ᤛᤧᤀᤠᤱ ᤗᤧᤴᤍᤡᤰ ᤂᤧᤴ ᤘᤠᤒᤠᤰᤁᤡᤸᤗᤧ ᤁᤢᤒᤣᤛᤠᤱ ᤕᤢᤱᤛᤡᤱ॥

⁷ᤛᤵᤑᤠᤀᤠᤱ ᤛᤠᤔᤖᤡᤕᤠᤒᤠ ᤔᤧᤴᤇᤢᤔᤠ᤹ᤎᤡᤰ ᤆᤫᤠ᤺ᤳ ᤑᤠ᤺ᤳᤇᤧ ᤂᤧᤵᤔᤥ ᤋᤩᤧ᤺ᤸᤗᤧ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤆᤫᤠ᤺ᤳᤇᤡᤰ ᤌᤢᤱᤔᤠ ᤐᤡᤖᤠᤱᤅᤧᤏᤠ॥”

⁸ᤂᤧᤵᤔᤥᤃ ᤕᤧᤛᤢ᤺ᤴᤗᤰ ᤘᤕᤧ. ᤌᤣᤀᤠᤱᤓᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤆᤠᤔᤠ ᤌᤢᤱᤔᤠ ᤀᤡᤱᤛᤧ ᤐᤠᤱᤈᤢᤶᤔᤥ ᤔᤧᤒᤣᤀᤠᤱ ᤔᤧᤘᤕᤧᤖᤥ॥

⁹ᤂᤧᤴ ᤛᤠᤔᤖᤡ ᤔᤧᤴᤇᤢᤔᤠ᤹ᤀᤡᤸᤗᤧ ᤕᤧᤛᤢ᤺ᤴ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤕᤜᤢᤍᤡᤏᤧ. ᤀᤡᤱᤃᤠ᤹ᤃ ᤛᤠᤔᤖᤡ ᤔᤧᤴᤇᤢᤔᤠ᤹ᤀᤠ. ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤆᤫᤠ᤺ᤳ ᤌᤢᤱᤔᤠ ᤀᤡᤱᤃᤠ᤹ ᤁᤧᤏᤠ᤺ᤰᤁᤠᤒᤠᤒᤣ᥅” (ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤶᤔᤥ ᤕᤜᤢᤍᤡᤜᤠ᤹ ᤏᤢ ᤛᤠᤔᤖᤡᤗᤢᤶᤔᤥ ᤋᤱᤈᤢᤶ ᤜᤥ᤺ᤵᤋᤧᤖᤥ)॥

¹⁰ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢ᤹ᤀᤡᤛᤠᤶᤔᤡᤴ ᤏᤢ ᤂᤧᤏᤧ᤹ ᤆᤫᤠ᤺ᤳ ᤁᤧᤏᤠ᤺ᤰᤐᤧᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤀᤠᤱ ᤁᤧᤘᤕᤧᤸᤗᤧᤃ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠ ᤆᤫᤠ᤺ᤳᤋᤡᤴ ᤕᤠᤱᤏᤠ ᤁᤧᤏᤠ᤺ᤰᤋᤢᤀᤠᤱ ᤂᤧᤴ ᤜᤡᤱᤔᤴᤗᤧᤴ ᤆᤫᤠ᤺ᤳᤋᤡᤴ ᤁᤧᤒᤡᤖᤧᤒᤠᤔᤧᤴ॥”

¹¹ᤜᤧᤰᤁᤣ᤺ᤸᤗᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤛᤣ᤺ᤴᤍᤥᤛᤢ. “ᤀᤠᤍᤠᤱᤒᤣ. ᤂᤧᤏᤧ᤹ᤃ ᤆᤫᤠ᤺ᤳ ᤐᤠ᤺ᤰᤔᤧᤴ ᤏᤢ ᤀᤡᤍᤠ᤺ᤰᤁᤡᤴᤏᤠᤱ ᤁᤧᤱᤃᤳᤋᤢᤴ. ᤘᤠᤒᤠᤰᤁᤡᤴᤏᤠᤱ ᤁᤣ᤺ᤶ. ᤜᤧᤰᤁᤣ᤺ᤸᤗᤧ ᤀᤠᤳᤋᤡᤏᤢ ᤁᤴ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠ ᤆᤫᤠ᤺ᤳᤋᤡᤴ ᤋᤠ᤺ᤵᤔᤠ ᤁᤧᤛᤢᤰᤋᤢᤒᤣ᥅

¹²ᤜᤧᤰᤁᤣ᤺ᤸᤗᤧ ᤂᤧᤏᤧ᤹ᤃ ᤀᤠᤏᤡᤃᤧ ᤋᤠᤰᤌᤧᤒᤠ ᤕᤠᤁᤢᤒᤧᤴᤏᤢ᤺ᤸᤗᤧᤀᤠᤱ ᤕᤶᤒᤠᤏᤧᤒᤡ᥅ ᤂᤢᤏᤧ᤹ᤀᤣ ᤁᤴ ᤘᤠᤒᤠᤰᤁᤡᤴ ᤀᤠᤏᤡᤃᤧ ᤐᤡᤖᤡᤃᤧᤀᤠᤱ ᤘᤠ᤹ᤖᤥ. ᤒᤠ ᤁᤵᤔᤥᤗᤠᤶᤒᤠᤀᤣ ᤂᤢᤏᤧ᤹ ᤏᤢ ᤁᤢᤛ᤻ᤛᤠ᤺ᤜᤠ᤹ᤖᤧ ᤜᤧᤰᤁᤩᤠᤱ ᤂᤢᤏᤡ᤹ ᤌᤰᤛᤠᤗᤢᤵᤜᤠ᤹ᤖᤧᤀᤠᤱ ᤆᤫᤠ᤺ᤳ ᤔᤧᤎᤢᤅᤢᤖᤥ॥”

¹³ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤁᤴ ᤘᤠᤒᤠᤰᤁᤥᤗᤠᤶ ᤆᤫᤠ᤺ᤳ ᤁᤧᤎᤢᤱᤒᤠᤜᤠ᤹ᤃ ᤕᤠᤶᤔᤥ ᤂᤢᤏᤡ᤹ ᤘᤠᤔᤡ᤺ᤰᤗᤥ.

¹⁴ᤁᤖ ᤀᤡᤱᤃᤠ᤹ ᤐᤡᤖᤢᤱᤒᤠ ᤆᤫᤠ᤺ᤳ ᤁᤧᤎᤢᤱᤒᤠᤴ ᤀᤠᤵᤑᤠᤸᤗᤧᤀᤠᤱ ᤁᤢᤘᤠᤔᤧᤔᤡ᤺ᤰᤏᤧᤴ॥ ᤀᤡᤱᤃᤠ᤹ ᤐᤡᤖᤢᤱᤒᤠ ᤆᤫᤠ᤺ᤳᤋᤡᤴ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤛᤍᤠᤍᤡᤱ ᤁᤧᤒᤢᤶᤒᤠ ᤘᤠᤒᤢᤴ ᤜᤧᤰᤁᤣ ᤂᤢᤏᤧ᤹ᤀᤥ ᤐᤥ᤺ᤱᤗᤥ॥”

¹⁵ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤕᤧᤛᤢ᤺ᤴ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ᤀᤠᤱ ᤂᤧᤴ ᤆᤫᤠ᤺ᤳᤋᤡᤴ ᤐᤡᤖᤠᤱᤅᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤀᤠᤘᤠᤔᤧᤔᤡ᤺ᤰᤏᤧᤴᤗ ᤜᤧᤰᤁᤩᤠᤱ ᤀᤧᤳᤗᤧᤱ ᤀᤡᤱᤃᤠ᤹ ᤆᤫᤠ᤺ᤳ ᤑᤠ᤺ᤳᤇᤧ ᤁᤵᤔᤥ ᤋᤠ᤺ᤔᤠ ᤔᤧᤒᤥ᤺ᤱᤏᤧᤴᤗᤖᤥ॥”

¹⁶ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤐᤣᤃᤧ᤹ᤀᤠᤱ ᤁᤧᤕᤧᤶᤒᤠ᤹ᤀᤡᤴ ᤁᤵᤔᤥ ᤀᤢ᤺ᤳᤋᤧ ᤋᤠᤖᤧ᤹॥”

¹⁷ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤀᤠᤕᤧᤶᤒᤠ᤹ ᤜᤥ᤺ᤵᤗᤥ॥” ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤔᤧᤳᤋᤢ. “ᤀᤡᤱᤃᤠ᤹ ᤀᤠᤕᤧᤶᤒᤠ᤹ ᤜᤥ᤺ᤵᤗᤥ ᤗ᤹ᤖᤡᤰ ᤂᤧᤏᤧ᤹ ᤛᤧᤰᤂᤠᤀᤣ ᤁᤧᤒᤠ᤺ᤳᤋᤢ᤹ᤖᤥ॥

¹⁸ᤛᤧᤰᤂᤠᤀᤣ ᤀᤢᤴᤇᤣ᤺ᤴᤇᤠ ᤅᤠᤛᤡ ᤁᤧᤕᤧᤶᤒᤠ᤹ ᤔᤧᤒᤥ᤺ᤰᤂᤧ ᤔᤧᤈᤢᤖᤧᤀᤠᤱ ᤘᤠ᤹॥ ᤀᤠᤸᤗᤥ ᤀᤠᤳᤋᤡᤴ ᤔᤏᤠ᤺ᤴᤏᤢ ᤂᤧᤏᤧ᤹ ᤁᤧᤘᤠ᤹ ᤂᤧᤴᤏᤠᤱ ᤛᤧᤰᤂᤠ᤺ᤸᤗᤧ ᤁᤧᤕᤧᤶᤒᤠ᤹ ᤔᤧ᤺ᤴᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤀᤠᤕᤧᤶᤒᤠ᤹ ᤜᤥ᤺ᤵᤗᤥ ᤁᤧᤒᤠ᤺ᤳᤋᤢᤒᤠᤴ ᤛᤧᤰᤂᤠᤀᤣᤖᤥ॥”

¹⁹ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤕᤧᤛᤢ᤺ᤴ ᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤏᤧ᤹ᤃ ᤛᤧᤰᤂᤠᤀᤣ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤏᤧ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤏᤧ᤹ᤖᤥ॥