Iliga꞉felo꞉ 28:6-28

⁶Iliyo꞉ Fol e dagiyo꞉ da꞉ima꞉ibele, o꞉ e wigibo a꞉naka soma꞉nigabele a꞉la꞉asula꞉liki yasila꞉li ane ko꞉sega, e amio꞉ hida꞉yo꞉ nowo꞉ mo꞉fa꞉la꞉dowabikiyo꞉, iliyo꞉ a꞉no꞉ ba꞉da꞉sa꞉ga꞉, asulo꞉wo꞉ a꞉nodolaki, kalu we godelo꞉b a꞉la꞉sio꞉.

⁷Nilo꞉ fa꞉la꞉dowo꞉ hen a꞉no꞉ Malta misa꞉ kalu Bubilus ene hen ko꞉lo꞉ eyo꞉ nio꞉ asuwa꞉takiyo꞉, ene aya tililia꞉ga꞉, ho꞉len otaleno꞉ eyo꞉ nio꞉ dinafa bo꞉fo꞉len.

⁸Bubilusa꞉ iyayo꞉ ofo꞉ walaf o꞉lia꞉ kuf nagalaki, ila꞉ ho꞉n o꞉lia꞉yo꞉ dowo꞉ ko꞉lo꞉ uwob ka alifo꞉len. Fol e elo꞉wa ha꞉na꞉sa꞉ga꞉, dagiyo꞉ eya golofo꞉liki, Godemo꞉ dulugu sa꞉labikiyo꞉, e falelo꞉.

⁹Elo꞉ dimido꞉ a꞉no꞉ ba꞉da꞉sa꞉ga꞉yo꞉, ho꞉na꞉lo꞉ hegefa꞉ hen a꞉namilo꞉ walaf kalu sen nol a꞉no꞉, Fol elo꞉wa mio꞉ ko꞉lo꞉, iyo꞉ falele alifelo꞉.

¹⁰Iliyo꞉ nio꞉ sagale alitaki, man nafale ko꞉li ko꞉lilo꞉ nimo꞉ dimido꞉ ko꞉lo꞉, nio꞉ ho꞉n ko꞉suwa ha꞉na꞉nigabikiyo꞉, kelego꞉ nililo꞉ mo꞉dowo꞉ aumbo꞉, nimo꞉wo꞉ tambo dimi.

¹¹Nio꞉ ele otaleno꞉ a꞉na sa꞉ga꞉yo꞉, ha꞉na꞉no꞉ ko꞉lo꞉, ho꞉n ko꞉su nowo꞉ Alegsandia a꞉la꞉ta꞉ga꞉lo꞉ mio꞉ a꞉no꞉, fufalo꞉ mio꞉ ho꞉len a꞉namio꞉ Malta a꞉na kagafo꞉len. O꞉go꞉ a꞉namio꞉ fufayo꞉ edo꞉ ko꞉lo꞉ ha꞉na꞉no꞉ a꞉la꞉asulo꞉. Ho꞉n ko꞉su a꞉ma꞉ migi amio꞉, madali gode ao a꞉la꞉ a꞉no꞉ misido꞉ momada꞉ alifa꞉. Madali gode a꞉no꞉ so꞉wa a꞉la꞉ alelo꞉ imilig amilo꞉ sa꞉la꞉li. Nio꞉ ho꞉n ko꞉su a꞉na disa꞉la꞉sa꞉ga꞉ ane.

¹²Nio꞉ ha꞉na꞉sa꞉ga꞉yo꞉, Silakus amisa꞉n a꞉na fa꞉la꞉dota꞉ga꞉, ho꞉len otaleno꞉ a꞉na sen.

¹³Silakus a꞉no꞉ ta꞉ta꞉ga꞉ aneyo꞉, Legium amisa꞉na fa꞉la꞉dowo꞉. Ho꞉len a꞉ma꞉ fa꞉s amio꞉, fa꞉fa꞉so꞉ fa꞉s doba꞉da꞉ yabikiyo꞉ nio꞉ ha꞉na꞉sa꞉ga꞉, ho꞉len a꞉ma꞉ fa꞉s amio꞉ Buteoli amisa꞉na fa꞉la꞉dowo꞉.

¹⁴Amisa꞉n a꞉namio꞉, tilidabu kalu nolo꞉ a꞉na galilia꞉ga꞉, iliyo꞉ soagelo꞉ imilig nowo꞉ i o꞉lia꞉ a꞉naka mesea꞉ki sio꞉ ko꞉lo꞉ a꞉na sa꞉ga꞉, Lom a꞉na ane.

¹⁵Nilo꞉ fa꞉la꞉doma꞉i yab a꞉la꞉bo꞉ Lom amilo꞉ tilidabu kaluka꞉isale nolo꞉ da꞉da꞉sa꞉ga꞉yo꞉, iyo꞉ nilo꞉ galima꞉ni mio꞉ ko꞉lo꞉, Abius Maget amisa꞉n ta꞉ta꞉sa꞉ga꞉ mio꞉wo꞉, mageso꞉ a nowo꞉ A Otalen a꞉la꞉wikilo꞉lo꞉ a꞉na galili. Fol eyo꞉ kalu a꞉no꞉ ba꞉da꞉sa꞉ga꞉yo꞉, e Godemo꞉ mada o꞉m a꞉la꞉sa꞉la꞉sa꞉ga꞉, e halaido꞉ di.

¹⁶Nio꞉ Lom fa꞉la꞉dowo꞉sa꞉ga꞉yo꞉, Lom gamani kalu iyo꞉ Fol e dibolo a amio꞉ mo꞉to꞉lolaki, e ena꞉li a nowa mesea꞉ki ta꞉takiyo꞉, da꞉la꞉di kalu nolo꞉ a꞉na bo꞉fo꞉melea꞉ki ta꞉fo꞉.

¹⁷Ho꞉len otaleno꞉ ta꞉ta꞉sa꞉ga꞉yo꞉, Fol eyo꞉ Yu ko꞉go꞉do꞉ kaluwo꞉ ho꞉le kegea꞉sa꞉ga꞉, towo꞉ imo꞉wo꞉ a꞉la꞉sio꞉, “Ni nao i, niyo꞉ kaluka꞉isale nililo꞉mo꞉wo꞉ mogago꞉lo꞉ mo꞉dimida꞉b a꞉la꞉ta꞉ga꞉ nili ma꞉muwa꞉ mano꞉lo꞉ mo꞉mogagila꞉ ko꞉sega, ne Ya꞉lusalem amio꞉ mo꞉walilima꞉kiyo꞉ ta꞉lia꞉sa꞉ga꞉, Lom kalumo꞉wo꞉ a꞉na dimi.

¹⁸Iyo꞉ nemo꞉lo꞉ diga꞉di sio꞉ a꞉no꞉ aloba꞉da꞉sa꞉ga꞉yo꞉, nelo꞉ sana soma꞉no꞉ mo꞉wo꞉ mo꞉ba꞉ba꞉ ko꞉lo꞉ ne sili alifa꞉no꞉ asulo꞉.

¹⁹Ko꞉sega Yu misa꞉ kalu iliyo꞉ a꞉la꞉bo꞉ mo꞉dimidama꞉ki asulabiki, ne Sisa emo꞉ mo꞉walilima꞉ki a꞉la꞉liki dabu ba꞉ba꞉. A꞉la꞉dimido꞉ ko꞉sega, Yu kaluka꞉isale na꞉lo꞉mo꞉wo꞉ niyo꞉ gadiakilo꞉ imo꞉wo꞉ a꞉mo꞉walilima꞉no꞉wo꞉ nowo꞉ aundo꞉ma.

²⁰A꞉la꞉dimida꞉i mio꞉ ko꞉lo꞉ o꞉go꞉ niyo꞉ gio꞉ ba꞉da꞉sa꞉ga꞉yo꞉ gimo꞉wo꞉ malolo꞉ mia꞉ni ho꞉ido꞉. Isolael kalu niliyo꞉ tilida꞉sa꞉ga꞉lo꞉ yasilo꞉ a꞉na ilikiyo꞉, ne sa꞉ni a꞉na uludu alifa꞉.”

²¹Fol eyo꞉ a꞉la꞉sa꞉labiki, Yu ko꞉go꞉do꞉ kalu iyo꞉ a꞉ma꞉la꞉bo꞉ a꞉la꞉sio꞉, “Ge a꞉la꞉go꞉ka꞉ a꞉la꞉likiyo꞉ mo꞉fo꞉so꞉ nimo꞉wo꞉ Yudia a꞉la꞉ta꞉ga꞉yo꞉ mo꞉sa꞉sa꞉ligefo꞉. A꞉la꞉ta꞉ga꞉ nao i nolo꞉ ko꞉na꞉ a꞉la꞉ta꞉ga꞉ mio꞉ a꞉ma꞉yo꞉lo꞉ gilo꞉ mogago꞉ dimido꞉wo꞉ we a꞉la꞉bo꞉ nimo꞉wo꞉ mo꞉malolo꞉ me.

²²Heno꞉ tambo amio꞉ kaluka꞉isaleyo꞉ ho꞉gi gulugulan man fa꞉la꞉dowab a꞉no꞉ mogago꞉ dimida꞉lab a꞉la꞉sio꞉ dabu ko꞉lo꞉ asulo꞉ gilo꞉wo꞉ nilo꞉ da꞉ba꞉no꞉ ko꞉lo꞉ sa꞉la꞉bi.”

²³Iliyo꞉ Fola꞉yo꞉ towo꞉ sama꞉kiyo꞉ ho꞉len nowo꞉ da꞉fe alifa꞉ ko꞉lo꞉ ho꞉len a꞉na fa꞉la꞉dowabikiyo꞉, kaluka꞉isale modo꞉wo꞉ Fola꞉ aya kegeo꞉. Kea꞉folo꞉ a꞉la꞉ta꞉ga꞉ aneyo꞉ gelo꞉ a꞉namio꞉, Godeya꞉ ene kaluka꞉isale ko꞉lo꞉ bo꞉fo꞉lab man a꞉no꞉ widakiyo꞉, iyo꞉ Ya꞉suwo꞉ tilidabuma꞉ki, Mosesa꞉ ele saefa꞉ o꞉lia꞉ Dinali Sa꞉lan kaluwa꞉lo꞉ sa꞉sa꞉lo꞉ a꞉no꞉ agela꞉ miakiyo꞉, fanda wido꞉.

²⁴Fola꞉lo꞉ to sa꞉lab a꞉no꞉ kalu nolo꞉ tilidabu ko꞉sega nolo꞉ mo꞉tilidabu.

²⁵Iliyo꞉ asulo꞉ imilise mo꞉dowa꞉sa꞉ga꞉, nolo꞉ ha꞉na꞉nigabiki, Fol eyo꞉ elema꞉nikiyo꞉, towo꞉ a꞉la꞉sio꞉, “Godeya꞉ Mamaya꞉yo꞉ ge ma꞉mu imo꞉wo꞉ to hendeleyo꞉ dinali sa꞉lan kalu Aisaya eya a꞉la꞉ta꞉ga꞉ sa꞉lakiyo꞉ a꞉la꞉sio꞉,

²⁶“‘Kaluka꞉isale ilo꞉wa ha꞉na꞉sa꞉ga꞉, imo꞉wo꞉ a꞉la꞉sa꞉la꞉bi. Gio꞉ ni towo꞉ mada da꞉da꞉mela꞉ib ko꞉sega, hendeleyo꞉ mada mo꞉fanda asuluma꞉ib. Gio꞉ nilo꞉ dimidano꞉ ba꞉da꞉mela꞉ib ko꞉sega ha꞉go꞉ mada mo꞉dinafa asuluma꞉ib.

²⁷Mo꞉wo꞉ kaluka꞉isale i wema꞉ asulo꞉wo꞉ halaido꞉ dowaki, ka꞉la꞉no꞉ kagedeliaki, a꞉la꞉ta꞉ga꞉ siyo꞉ suguli ko꞉lo꞉ a꞉lab. A꞉la꞉bo꞉ mo꞉ngo꞉ kibabeyo꞉, ili siyo꞉ kolaitaliki o꞉li ba꞉babe, ka꞉la꞉no꞉ togo꞉ alitaliki da꞉babe, a꞉la꞉ta꞉ga꞉ asulo꞉wo꞉ kolaitaliki asulumabe. Iyo꞉ nelo꞉doba꞉da꞉ nodolalikiyo꞉, Niyo꞉ iyo꞉ falele alifo꞉.’ Aisayayo꞉ a꞉la꞉sa꞉sa꞉lo꞉.

²⁸“A꞉la꞉fo꞉ko꞉lo꞉ gio꞉ dinafa asula꞉bi. Godeya꞉lo꞉ kalu gasilia꞉no꞉ to man nafa a꞉no꞉ Yu kaluka꞉isalema ilo꞉wa iliga꞉fo꞉ ko꞉lo꞉ iyo꞉ hendele iligi da꞉ba꞉ib.” Fol eyo꞉ imo꞉wo꞉ wido꞉.