Yɛbəc 28:6-28

⁶Afum akakɔ ŋac-kar a pəŋkɔ-kəf kɔ dənda abok ŋɛnadɛtərnɛ mɔ, kɔ pəyɔnɛ fɛ ti-ɛ pətɛmpɛnɛ pəfi. Ntɛ ŋaŋkar kɔ pəwon ta ŋaŋnəŋk tɔlɔm o tɔlɔm tɔsɔtɔ kɔ mɔ, kɔ ŋasəkpər tɛcɛm-cɛmnɛ taŋan, kɔ ŋaloku a kanu kɔ ɔyɔnɛ.

⁷Kəfo kaŋkɔ kəsək antɔf ŋɔpɔŋ ŋɛnayi di ŋa fum wəbeki wəpɔŋ wəka mokuru mamɔkɔ wəlɔma, pac-we kɔ Pubiliyu. Nkɔn ɛnasɔŋ su dəkəyi dɔtɔt mata maas.

⁸Papa ka Pubiliyu ɛnafəntərɛ ta ɛntamnɛ-ɛ, fiba kɔ kupur yeyi kɔ. Kɔ Pol ɛmbɛrər kɔ, k’ɔntola Kanu, pəc-deŋər kɔ waca, k’ɛntaməs kɔ.

⁹Ti disrɛ kɔ acu aka mokuru aləpəs akɔ ŋander sɔ, kɔ ŋa sɔ ŋantamnɛ.

¹⁰Kɔ aka dare ŋaleləs su bel-bel, ntɛ səndeyɛfɛ kəkɔ mɔ, k’asɔŋ su ca yɔkɔ pənamar su kəyɔ mɔ fəp.

¹¹Ntɛ səŋcepərɛnɛ yof maas mɔ, kɔ səsɔtɔ abil nŋɛ ŋɛyɛfɛ dare da Alɛksandər, kɔ ŋɛŋcepərɛnɛ dɛrəŋ mokuru ma Malit. Abil ŋaŋɔkɔ ŋ’ aŋc-we «Diyɔskur.»

¹²Ntɛ səmbɛrɛ dare da Sirakus mɔ, kɔ səyi di mata maas.

¹³Kɔ səyɛfɛ dəndo, səsolnɛ agbɛp kɔ səŋkɔ səsumpər dare da Resiyo. Kɔ afef ŋa kəca-kətɔt ŋɛyɛfɛ dɔckɔsɔk, mata mɛrəŋ disrɛ kɔ səmbəp dare da Pusɔl.

¹⁴Difɔ sənabəp awɛŋc su aŋa alaŋ akɔ ŋanatola su kəyi di mata camət-mɛrəŋ mɔ. Tɔkɔt tantɛ tɔ sənakɔt kəbɛrɛ dare da Rom.

¹⁵Awɛŋc su aŋa alaŋ a dare da Rom aŋɛ ŋanane te tosu mɔ, ŋander kəfaynɛ su haŋ nde makit ma Apiyus, kɔ nde aŋc-we Dəkəyikiya Maas mɔ. Ntɛ Pol ɛnəŋk ŋa mɔ, k’eyek-yekəs Kanu, k’ɛmbɛrɛnɛ sɔ kəcəp abəkəc.

¹⁶Ntɛ səmbɛrɛ Rom mɔ, k’awosɛ Pol kəyi taciŋa kɔ wəsɔdar wəkɔ oŋc-bum kɔ mɔ.

¹⁷Ntɛ mata maas meŋcepər mɔ, kɔ Pol ewe afum alel aSuyif aŋɛ ŋanayi Rom mɔ. Ntɛ ŋambəpsɛnɛ mɔ, k’oloku ŋa: «Awɛŋc im aŋa, ali tes iləsərɛ fɛ afum asu, ali tes iləsər fɛ ta mes mosu mokur ma atem asu, mba ŋanasumpər im nde Yerusalɛm kɔ ŋambɛr im aRom dəwaca.

¹⁸Ntɛ ayifət im mɔ, abɛ akakɔ ŋanafaŋ kəsak im, bawo ŋananəŋk fɛ ntɛ o ntɛ pəmar padif’ em mɔ.

¹⁹Mba aSuyif ŋawosɛ fɛ. It’ ɛnasɔŋ’ em kəwe kiti ka wəbɛ ka tɔf ya Rom fəp ta ifaŋ kəboŋcɛ afum em tes-ɛ.

²⁰Tes tatɔkɔ tɔsɔŋɛ ntɛ ifaŋ kənəŋkɛ nu, isɔŋɛ nu ti kəcərɛ mɔ, bawo teta kəgbɛkər amera ka afum a Yisrayel kəsɔŋɛ ntɛ ambɛr im gbekce yayɛ mɔ.»

²¹Kɔ afum alel a Rom ŋaloku kɔ: «Ali areka ŋɛfɛt ŋin səsɔtɔ fɛ kəyɛfɛ atɔf ŋa Yude tetam. Ali awɛŋc su aŋa wəkin ender fɛ pəloku su pɛlɛc pam.

²²Mba səfaŋ fɔ sən’ am kəlok-loku məna yati tɔkɔ məŋcɛm-cɛmnɛ mɔ, bawo səŋcərɛ a kəgbɛkəlɛnɛ kəyi mofo fəp teta kəgba nkɛ məyi mɔ.»

²³Kɔ ŋamboc tataka, kɔ ntɛ dɔsɔk dadɔkɔ dɛmbəp mɔ alarəm ŋander nda Pol kəcəŋkəl kɔ. Kɔ Pol ɛŋc-mentər ŋa kəsɔk pɛs kitabu disrɛ mes ma dɛbɛ da Kanu fəp, kəyɛfɛ sariyɛ sa Musa kəbəp yecicəs ya Sayibɛ-e. Kəyɛfɛ bət-bət haŋ dɔfɔy kɔ Pol ɛŋc-sɛp kəsɔŋɛ ŋa kəlaŋ teta Yesu.

²⁴K'ɛŋkafəli afum alɔma kəlaŋ tɔkɔ oŋc-loku mɔ, mba alɔma ŋanalaŋ fɛ ti.

²⁵Ntɛ afum ŋaŋc-sakətɛnɛ kəgbɛkəlɛnɛ disrɛ dəndo oŋc-lok-loku mɔ, kɔ Pol endeŋər ntɛ gbəcərəm: «Amera Ŋecempi ŋa Kanu ŋɛnalok-lokər atem anu bel-bel, dəyecicəs yecempi ya aŋnabi Esayi,

²⁶ntɛ t’ ɛnaloku: ‹Məkɔ nnɔ afum akaŋɛ ŋayi mɔ, məloku: Nəndewon kəcəŋkəl, mba nəfɔdene! Nəndewon kəgbətnɛ, mba nəfɔdenəŋk!

²⁷Bawo bəkəc ya afum akaŋɛ yɔfɔtam kəne, ŋantaŋ ləŋəs, kɔ ŋamɛp fɔr. Ŋac-nesɛ kənəŋkɛ fɔr yaŋan, ŋac-nesɛ kənenɛ ləŋəs yaŋan. Ŋac-nesɛ kəcərɛnɛ mes bəkəc yaŋan. Ŋac-nesɛ kəluksərn’ em ntɛ tɔŋsɔŋɛ itaməs ŋa mɔ.›

²⁸Nəcərɛ a kəŋaŋnɛ ka Kanu kaŋkɛ atɔyɔnɛ Suyif ŋ’ anakɛrɛ ki, ŋa ŋandecəŋkəl ki.»