Iba Gana 49:9-20

⁹Ibu homa nabi dére haaboore holego lalu Ngode Datagaliwabe munime yolo nabibeheore holebira.

¹⁰Wali agali mbirale mandabi mini gigabiwi karubi homaga birane hendedama. Mini nawibi lulu alebi bibahende homa dege birane hendedama. Tigua mbirale dindini howa ilu wialu hayaruni tinaga aguanene holebiraru ti helo ngelalu tini homaga birane hendedamagoni.

¹¹Ala dindini hayangi tininaga dindini hayagonigo ai homalu pialu howa tinaga dindi anda tene homali biago bu hinalu homali biagoniha haaboore holebira.

¹²Mbirali mini lene timbuni heneyaguabi homa anda ibidangi yo pialu pobe nahe holebira. Ani nabibeheore nga. Homa anda ibidangi nogo biango homagadagua homolebira.

¹³Wali agali tini hangu howa karulape kama manda bialu karu tihondo agi birabe handami̱ya. Tininaga mbirale ngagoria mini hanaho karu homolebirago de handami̱ya.

¹⁴Wali agali urunibi karu ti nogo sibi homagadagua homalu Homa ibu tinaga haru haga haguane holebira. Ti homaragola tinaga tingini abale togo bialu tinaga dindi haraligo yu wahalu tinaga dinini kaundiaore humbirini andaha polebira. Anidagua bigi birago hondowa wali agali mini tigabiwi karu ti turu halu holene nga.

¹⁵Anigo Ngode Datagaliwabehanda i̱ gini mulebira. Ibugua homolenenaga hongome i̱ yani nahelo pele ngulebira.

¹⁶Wali agali mbirali ibunaga dabudabu dewa wiatago halu ibu homogo hayagua ogonidagua biragonaga í̠ mini dege dindi ho nahabe.

¹⁷Ibu homalu ibunaga mbirale wiyadaruni ibuni yalu napolebira. Dabudabu ilu wiyadarume tinaga anduane homaliha anda poradagua tibi homaliha dege anda porama nalolebira.

¹⁸Ibu dindini kangi ibu turu howa dungulo kayaguabi ibu erekui biabe bialu mbirale dewa mo wiragola marume ibunaga mini yaraga halu ibu bayaore awadaga handalu kayaguabi

¹⁹mbirali homogo ogoni ibubi homalu ibunaga mama mamali ala homalu peneru aruma haho wiaabo hagaha kadagua ibunibi ogoniha dege pu holebira.

²⁰Mbirali mini lene timbuni heneyaguabi homa anda ibidangi yo pialu ibida pobe nahe holebira. Ani nabibeheore nga. Homa anda ibidangi nogo biango homagadagua dege homolebira.