Ola Saam 49:9-20

⁹blanga kipumwei wi brom det greibyad, en blanga larram wi jidan laibala olagijawan.

¹⁰Ebribodi sabi klebawan pipul dai, en medwan en siliwan pipul ol dai du, en olabat libum olabat ebrijing langa olabat femili.

¹¹Olabat ronwan greib jidan olabat kemp. Deya na dei garra jidan olagijawan, nomeda deibin abum dei ronwan kantri basdam.

¹²Nomeda pipul jidan ritjwan, olabat garra stil dai jis laik ola enimul.

¹³Yu luk wanim garra hepin langa detlot hu oldei trastimbat olabat ronselp, en hu oldei laigim blanga jidan brabli ritjwan.

¹⁴Olabat garra dai jis laik ship, en deth garra jidan stakmen blanga olabat, en im garra deigim olabat streit langa greib. Olabat bodi garra go nogudwan langa det wel weya ola ded pipul jidan.

¹⁵Bat God garra baiyimbek mi brom det greib, en im garra deigim mi blanga jidan garram im.

¹⁶Yu nomo wori wen sambodi jidan ritjwan, en wen im kipgon pailimapbat mowa ebrijing.

¹⁷Im kaan deigim enijing garram im wen im dai. Im ebrijing kaan godan langa greib garram im.

¹⁸Nomeda if det sambodi im sedisfaid garram dijan laif, en dei preisim im dumaji im brabli ritjwan,

¹⁹bat im garra go langa det greib en joinap garram im femilimob hubin dai bifo, en jidan langa det dakbala pleis olagijawan.

²⁰Nomeda im jidan haibala, im garra stil dai. Im garra dai jis laik ola enimul.