Iba Gana 34:1-5

¹I̱na Anduane Homogohondo ka̱i̱ore laabo halu holebero. I̱na ibunaga mini yaraga nahe naholebero.

²Ibugua bigi biyarunaga i̱na ibunaga mini mo yaraga halu holebero. Wali agali marume hengedope haragola genda ho haga kamiru tí i̱na bi o larogoni hale howa turu halimulonaga laro.

³Tíbi i̱bi ina Anduane Homogo ibu daliga gibiore ka lama. Ibunaga mini ina haru mandagi mo yaraga hama.

⁴I̱na Anduane Homogohondo bi larugola ibugua hale halu ladai biya. I̱ gi bulene tara tarame daribaho wiaria ibugua i̱ golope haya.

⁵Marume hengedope haragola miniha gendaho haga karu ti Anduane Homogo ibugua biamogo birago hondowa turu haga. Anigo ti miniha genda howa turu nahe mbira naholebiraore.