Iba Gana 130:1-8

¹Anduane Homogo-o i̱naga bu miniha gendaore gibi ho howa í̠hondo bi larogoni.

²Anduane-o i̱na í̠hondo duguore bialu bi larogoni hale habe. Í̠na i̱ biamogo bia lalu olarogoni hale habe.

³Í̠na iname ko birimaruni damenego bibahendeore mo ilu wiai ho kele ina kamaruni mbira pani nane yo pialu ai pedalebe.

⁴Ina mbiraorebi yo napobeheore kamalegoyu í̠na iname ko beramaru domo wahaga kegoni. Iname í̠ hondowa giho holoma̱yanaga ko beremaru í̠na domo wahaga bialu kegoni.

⁵I̱ore Anduane Homogohanda biamogo bilo lowa ibuha hana howa miniha didiho haruli. Ibugua biamogo bulebero lalu ibunaga bi lo wiyagoria yaniho haabo haruli.

⁶I̱ore Anduane Homogohanda biamogo bulebira lowa miniha didiore howa haruli. Mbiraga mamageali mbira egabi ala la lowa hale gogabu haradagua ndo i̱ miniha didi gibiore biyagola dugudaga howa yangayangabu haruli.

⁷Isaraele wali agaliru-o Anduane Homogo ibugua ina gubalini gibiore haho wiaabo haga kago manda bialu iname ibuhondo mini mbiraore wialu ibuha hanaho holene nga. Ina mbira mo ko holani handalu ibugua biamogo biaga kagoni.

⁸Ibugua Isaraele wali agali ibuninaga ka lalu tigua ko binidaru domo wahai halu ti gi mialu haru dai biai haga kagoni.