Hechos 9:12-31

¹²Lo bacaḻ abahuiini siääd te niguii ni laa Ananías te gutzuubni ṉaani yejcni te fiini stehuält.

¹³Dxejcti räjp Ananías lojni: ―Dad, abiejn diagä xho basacsí niguiiga rexpejṉlu neṉ guedx Jerusalén.

¹⁴Luxh rebixhojz ni rnibee abadeed guijtz lojni te guiniaazni ree guiraa rebejṉ nani rbedx-rniab lojlu, chanänireni jiäureni.

¹⁵Dxejcti räjp Jesucrist lojni: ―Huij, narä aguleäni te gunni xtzunä. Suluiini xtidxä loj rebeṉzijt nani digac xpeṉ Israel, näjza loj reni rnibee renacioṉ, näjza loj rexpejṉ Israel.

¹⁶Narä suluiä lo Saulo trabajwduxh ni tedni te jiädnajlni narä.

¹⁷Dxejcti sää Ananías, bidzujṉni ro yu' cadro rbäzlaa Saulo. Batzuubni ṉaani yejc Saulo. Dxejcti räjp Ananías loj Saulo: ―Betzä Saulo, Jesucrist ni rnibee, nani baluiloj lojlu lo nezyuj cheni siäädlu, lagajc laani baxhaḻni narä te fiilu stehuält, te jiädläjzza Sprit Dxan xten Dios neṉ lastoolu.

¹⁸Lagajc dxejc bitejb si'c xmelbäjl yec baloj Saulo, biacgajc balojni, bahuisa'cni stehuält. Dxejc huistieni, gurobnisgajcni.

¹⁹Dxejc gudajwni, guc nadaanni stehuält. Xchej guyunäj Saulo rexpejṉ Jesucrist neṉ guedx Damasco.

²⁰Dxejcti gusloj basule' Saulo xtidx Dios neṉ reguidoo xten rexpejṉ Israel, räjpni: ―Jesucrist najc Xi'n Dios nani gujc Niguii.

²¹Che biejn diajgreni xtiidxni, bidxelojreni, räjp lo sa'reni: ―¿La xhet laadi niguiire ni rusäu rexpejṉ Jesucrist neṉ latzguiib guedx Jerusalén, ä? Lagajcza dee bidzujṉ ree te guliibni rexpejṉ Jesucrist te chanänireni guedx Jerusalén lo rebixhojz.

²²Dxejcti gusutzu'tz Saulo guniini xtidx Dios. Basacajṉni rexpejṉ Israel nani rbäjz Damasco sa'csi basule'pacni Jesús najc Crist nani rnibee.

²³Che gudejd xhidajl dxej, bachagsa' rexpejṉ Israel te nugu'treni Saulo.

²⁴Dxejcti gucbee Saulo xhi xhigab bejnreni. Dxej, yääl cabäjzreni Saulo ro' guiraa renezyuj ni rdzujṉ guejdxga te ju'trenini.

²⁵Dxejcti che gojḻ te yääl basäḻ rexpejṉ Jesucrist Saulo neṉ te dxim̲ro, basiäjtreni dxijm̲ga nez ro' te padeer ni dejd gabi guejdxga. Basiäjtrenini nez dejtz padeerga, te si'c baxuṉni guejdxga.

²⁶Che bidzujṉ Saulo guedx Jerusalén, rlajzni nuchaagni loj reni rililajz xtidx Jesucrist, niluxh guiraareni bidxejbrenini sa'csi direni gan ahuililajzni xtidx Dios.

²⁷Dxejcti huinä Bernabéni lo reapost, bijni diidx xcuent Saulo. Räjp Bernabé lojreni: ―Baluiloj Jesucrist lo Saulo loj nezyuj. Guninäj Xtioznu Saulo loj nezyuj, ni'cni gusutzu'tz Saulo basule'ni xtidx Jesucrist guedx Damasco.

²⁸Dxejc bia'n Saulo guedx Jerusalén, bidxaagni lo rexpejṉ Jesucrist.

²⁹Dxejcti gusutzu'tz Saulo gusloj bijni xtidx Jesucrist lo rebejṉ. Dxejcti gudiḻnäj Saulo rexpejṉ Israel nani rnii didx griegw. Laareni rdxechduxhreni, rlajzreni nugu'treni Saulo sa'csi direni nichaglajz xtidx Jesucrist.

³⁰Che gucbee rexpejṉ Jesucrist si'c, huinäreni Saulo guedx Cesarea, ro'c gulääreni Saulo, baxhaḻrenini guedx Tarso.

³¹Dxejc guredxi lajz guiraa renani huililajz xtidx Dios neṉ reguedx Judea, neṉ reguedx Galilee, näjza neṉ reguedx Samaria, sa'csi diru Saulo nusacsí rexpejṉ Jesucrist, luxh guc xhidajlrureni. Basoobreni xtidx Jesucrist, bisieedrureni rextiidxni, gucnäjza Sprit Dxan xten Diosreni.