MII GUN MIINU MO 9:12-31

¹²Dhali wathi/ mishkina a’di jin yuḵu ka Hananiyya mo mmoseyu/ bwaman mo mmodhu me’da p̱o/ a’di mo ki a’di midi ’taki mish mo mo.

¹³Hila Hananiyya thoḵ gwo mo ki: Tap̱a, aha/ ciḵa gwo ’peni ’kwani ka ris gom wathi/ yan gom miim piti wa’di shi/ kagahara yisa kun miikina a’di ki ’kwanim pini kun dhuna /e ki she/ gi dhelel dhelel mo e Pa Urushaliim mo.

¹⁴Dhali i mahan si’da/ a’di ta gi gwo ’peni igasiis kun can mo mmodeḵ uni ’baar mo kun yer gway pini mo.

¹⁵Hili Tap̱a o a’di gwo mo ki: Yayi i bway pini mo ma haali/ a’di ta toŋ’kul bwa jin kwanyka/ gom aha/ mo mmoḵal gway pem ibwambori ’kwanin tiya kun ’koki ta ’Kwani Yahuuda/ mo dhali imaliḵ si’da/ mo dhali uc̱i ma Israyiil mo be.

¹⁶Haali/ aha/ mina ṯor a’di to kun wana risa kun mina isi mii ’kosh a’di ka nyor gom gway pem mo.

¹⁷Dhala Hananiyya yaki’d mo dhali seki gu’b mo dhali mmodhu a’di me’di is mo tani a’di ki o a’di gwo mo ki: Akam pem ka Shawuula. Tap̱a jin ta’da Yesus jin piki /e isi bway jin yayina /e mo tani a’di ṯuci aha/ ki yayu/ mo, ki /e mini mish mo mo dhali ki /e minu ’tu’d mo ki Shi/in Dheleladhelel mo.

¹⁸Dhali ise/ to jin wana e ka p̱ampara/ biṯkin ’peni em piti mo dhali a’di mishki mo mo be. Dhali a’di ki cu mis mo dhali a’di miikunu mo ki yi’de/ mo

¹⁹dhali a’di bu’th tonṯe/ mo dhali ’bidhu is mo be. Dhali a’di di’d ka cim ka hony/e nyaḵki imanciḵ gwo kun ’kon e Pan Dimashk mo.

²⁰Dhali ise/ a’di ki c̱i gwo e gu’b gi montul is buni mo goma Yesus ki a’di ta Ya/ ma Arumgimis mo be.

²¹Dhali uni ’baar mo kun ciḵ a’di gwo mo tani merkin kagahara mo dhali o gwo mo ki: A’di diki ta a’di jin di’d e Pa Urushaliim jin ’ce’d ’kwani kun yer gway yan sho’k mo ’taa? Dhali a’di yayi’di mahan si’da/ mmomii kan ki a’di midi ’taki sus uni mmodeḵ mo ibwambor gi igasiis kun can mo.

²²Hila Shawuul ’bitha is ki nyanye/ mo dhali a’di dumpulki ’Kwani Yahuuda/ kun ’kon e Pan Dimashk mo mmonyo/ gwo ka ḵar/e ka Yesus yan ta’da Ḵrisṯẖos mo be.

²³Dhali ka cim tana ris thimkin mo tani ’Kwani Yahuuda/ gam gwo me’d ka rem ’kup̱ mo mmo’kosh a’di jwa mo.

²⁴Hila wu’th buni p̱u’dki’da Shawuul mo. Dhali uni timki ’twaŋkal pa si’da/ montee mo dhali mon’thiny ilu/ mo jin mina uni ’taki ’kosh a’di jwa mo be.

²⁵Hili imanciḵ a’di gwo bu’th a’di mon’thiny mo dhali thul a’di ka ’cesh ka shi/ ki eŋ ’kup̱a gaŋgaraŋ goŋ ka nura/ i e mo be.

²⁶Dhali ki a’di p̱u’dki’d mo e Pa Urushaliim mo tani a’di palki is piti gam me’d nyaḵki imanciḵa Yesus gwo mo be. Dhali uni ’baar mo ḵo/ a’di mo, mmo’koki gam gwo is ki a’di ta’da manciḵ gwo mo be.

²⁷Hila Barnaaba bu’th a’di mo dhali sus a’di e imandhunu ki she/ mo dhali c̱i uni gwo mo mmomisha a’di Tap̱a ibway mo dhali a’di ṯor a’di gwo si’da/ mo, dhali a’di si’da/ ki a’di di’di Pan Dimashk mo tani a’di ṯor gwo e gway ma Yesus mo mmodiki ju/ mo be.

²⁸Dhali a’di diki’d nyaḵki uni mmokul gu’b e Pa Urushaliim mo

²⁹mmoṯor gwo e gway gi Tap̱a mo mmodiki ju/ mo. Dhali a’di o gwo mo dhali su’k ki gwo ap̱o/ ’Kwani Yahuuda/ kun ta ’Kwaniŋ Griḵi mo. Hili uni ŋap̱ a’di mmo’kosh jwa mo.

³⁰Dhali ka waḵ piti mishkin mo tani uni sus a’di ka luŋgu’b mo e Paŋ Kaysariyya mo dhali ṯu’c a’di mmoya Pan Tharsuus mo be.

³¹A’di tan ma ḵaniisa gi moŋḵu’th is e Pa Yahuudiyya ’baar mo dhali Pany Jaliil mo dhali Pan Saamira si’da/ mo mmonyaŋu uni is mo dhali mmo/ii ki moŋḵo/ gi Tap̱a dhali e momalas gi Shi/in Dheleladhelel mmomar is mo be.