Hechos 4:15-25

¹⁵Jatian jainxon joi benxoati chité ikainoa jato pikoax, jatobiresbiribi neskati yoyo ikana iki:

¹⁶—¿Nonki nato jonibo jaweatiki? Moara jatíbi Jerusalénhainoa jonibaon, ja westíora ratéti jawéki akana onankanke, jaskara ikenra ikonma riki akin non jato ati atipanyamake.

¹⁷Ikaxbi nato joi jatíbiain pextinhakin jato yoibokanamatianbi jato rakéati riki, ja Jesús kiriti iká joibo moa tsoabi jato yoiamakanon ixon —iki ikana iki.

¹⁸Jaskáaxonra, kenamaxon jato yoikana iki, ja Jesús kiriti iká joibo moa jato onanmatima itan jawebi ja winota joibo moa jato yoitima.

¹⁹Ikaxbi Pedro betan Juanman jato yoia iki: —Oinnon shinankanta, Diossen oinnamein jakon iki matopari non joi senenhaxonti, Diospari senenhaxonamabi.

²⁰Nonra ja non oinna itan non onanna jawékibo jato yoikin jeneti atipanyamake —akin.

²¹Jatianra joni koshibaon jato rakéaribaa iki, ikaxbi jato jenekana iki, jaskáshamanxon jato ramiatikoma iká iki, ja benxoa joni oinxon jatíbi jonibaon Dios rabiaitian.

²²Ja shinanmanres benxoa joni iká iki, chosko chonka winoa baritiaya.

²³Jatian ja Pedro betan Juan moa pikókana, jato betan joi akaiboiba kabékona iki; kaxon ja judíobaon koshibo betan ja *sacerdotebaon koshibaon jaskáakin jato akana joibo jato yoikana iki.

²⁴Moa ninkata pekáo, tsinkíxon jatíxonbi, neskáakin orankana iki: “Ibó, minra aká iki nai, mai, aniparo itan jatíbi jain jaa jawékibo.

²⁵Ja min Shinan meranoax, itan min yonoti David meranoax mia yoyo ika iki: ‘¿Jawekopiki jonibo jakonmaibires yoyo iki saa ikanai? ¿Jawekopiki jonibaon yankabires shinanbo akanai?