HECHOS 2:12-40

¹²Tsaymi pasaypa cushicur quiquinpura parlapäcorgan caynog nir: “¿Imatag pasaycan?”

¹³Tsaynog niptinmi burlacushpan waquin runacuna caynog nipäcorgan: “Caycunaga shincashga carmi imata rimashgantapis mana musyapäcuntsu.”

¹⁴Tsaynog niptinmi apóstol mayincunawan jamarpaycashganpita ichircushpan Pedro caynog nergan: “Jerusalencho y may-tsaychöpis tag Israel mayëcuna, shumag mayapäcamay.

¹⁵Manami gamcuna yarpashgayquinogtsu nogacuna shincashga carcaycä.

¹⁶Tsaypa trucanga Tayta Diosnintsipa profëtan Joel escribishgannoglami canan cumpliycan.

¹⁷Paymi Tayta Diosnintsi nishgancunata caynog escribergan: ‘Tiempo chämuptinnami Santu Espirituta cachamushag lapan chasquicamagcunaman. Santu Espirituta chasquicurnami nogapa wilacuynëta wilacärenga olgu tsuriquicuna y warmi tsuriquicunapis. Mözucunapis noga ricatsishgäcunatami elagpita ricangapag. Tsaynoglami auquincunata sueñuynincunacho ima pasananpag cagcunatapis musyatsishag.

¹⁸Tsay witsanmi munashgäta ruragcunaman Santu Espirituta cachamushagpag. Tsaynogpami warmipis olgupis wilacuynëta wilacongapag.

¹⁹Ciëluchömi ricacätsimushag imaypis mana ricapäcushgayquita. Intimi tsacacäconga. Quillami yawar-nirag ricacäconga. Cay patsachöpis runacuna pasaypa wanutsinacogtami ricapäcunquipag. May-tsaychöpis rupaptinmi cay patsa goshtaywan quilushga caycagta ricapäcunquipag. Tsaypitaragmi chämonga noga juzganä junag. Tsay chämushgan junagnöga manami imaypis yapay canganatsu.

²¹Tsaynog cananpag captinpis nogata manacamag cäga salvashgami cangapag.’ ”

²²Tayta Diosnintsipa profëtan Joel tsaynog escribishganta yarparcatsirmi Pedro caynog nergan: “Israel mayëcuna, cay parlamushgäcunata shumag mayapäcamay. Nazaret marcapita cag Jesusga Tayta Diosnintsi cachamushgan runami cargan. Tsaynog cashgantaga Tayta Diosnintsi musyatsimashcantsi milagrucunata ruraptinmi.

²³Tsaynog caycaptinpis gamcunami Jesusta prësu tsarircur jutsasapa runacunapa maquinman entregashcanqui crucificaypa wanutsinanpag. Tsaynog entregaptiquimi Tayta Diosnintsi palabrancho escribirashgancuna cumplergan.

²⁴Tsaynog wanutsiptinpis manami wanushgalanchöga usharashgatsu. Tsaypa trucanga Tayta Diosnintsimi payta cawaritsimushga.

²⁵Tsaynog cawarimunanpag cashganpitami rey David caynog escribergan: ‘Imaypis nogawanmi caycanqui, Tayta Dios. Tsaymi imatapis mana mantsacötsu.

²⁶Shongöpis cushicunmi. Cushishgalami cantashagpis. Tsaymi gamman yäracular cawaycä.

²⁷Munashgayquita ruraptëmi almäta Hadischo mana cachanquipagtsu. Tsaynogpis manami cacharinquipagtsu pamparashgalächo ayä ismunanta.

²⁸Gammi tantyatsimashcanqui munashgayquinog cawanäpag. Imaypis yanapamaptiquimi cushishgala cawaycä.’ ”

²⁹Tsaynog David escribishganta wilapayta usharcurmi Pedro caynog nergan: “Israel mayëcuna, tsaynog escribir unay rey David manami quiquinpitatsu escribergan, sinöga Jesucristupitami. Musyantsimi David wanur maynincho pamparashgantapis.

³⁰Tayta Diosnintsipa profëtanmi rey Davidga cargan. Paytami Tayta Diosnintsi nergan castanpita juc runa yurir imayyagpis mandag rey cananpag cashganta.

³¹Tsaymi Davidga quiquinpag escribinanpa trucan tsay yurinanpag cagpita escribergan. Payga salvamagnintsi Jesucristumi caycan. Jesucristo cawarimushganta ricaycagnogpis paypagmi David escribergan Hadischo almanta Tayta Dios mana cacharinanpag cashganta y cuerpun pamparashgalancho mana quëdananpag cashgantapis.

³²David escribishgannoglami Jesucristuta Tayta Diosnintsi cawaritsimushga. Cawarircamur puriptinmi lapanë ricapäcushcä.

³³Cawarircatsimurnami Jesusta derëcha cag lädunman Tayta Diosnintsi jamatsishga lapanpagpis munayniyog cananpag. Tsaypitanami Tayta Diosnintsi promitishgan Santu Espirituta nogacunaman cachamushga. Tsaynog cachamushga captinmi juc idiömacunapa parlatsipäcamashganta canan mayarcaycanqui.

³⁴Shumag tantyacäriy. Davidga manami wanushganpita cawarircamur jana patsaman witsashgatsu. Señornintsi Jesucristumi itsanga wanushganpita cawarircamur jana patsaman witsashga. Jana patsaman witsarcur Tayta Diospa naupanman jamacunanpag cashganpitami David caynog escribergan: ‘Mandag reyta Tayta Diosnintsi caynogmi nergan: “Jamacamuy derëcha cag naupäman lapan contrayquita vincinäyag.” ’ ”

³⁶Tsaypita Pedro yapay caynog nergan: “Israel mayëcuna, shumag tantyacäriy. Gamcuna Jesusta cruzcho wanutsishga captiquipis Tayta Diosnintsimi payta churashga maquincho tsararämänantsipag y salvamagnintsi cananpagpis.”

³⁷Tsaynog niptinmi runacuna fiyupa laquicushpan tapupäcorgan Pedruta y waquin cag apostolcunatapis caynog nir: “Tsaynog captenga ¿imatatag rurapäcöman?”

³⁸Tsaymi Pedro caynog nergan: “Tayta Diosnintsi jutsayquicunata perdonashunayquipag jutsa rurashgayquita cacharir Jesucristupa jutincho bautizacäriy. Tsaynogpami gamcunapis Santu Espirituta chasquicunquipag.

³⁹Santu Espiritutaga manami nogacunalapagtsu Tayta Diosnintsi cachamushga. Tsaypa trucanga cachamushga gamcunapag, tsuriquicunapag y Jesucristuta chasquicogcunapäga may-tsaycho taptinpis lapanpagmi.”

⁴⁰Pedro mastapis tantyatsergan caynog nir: “¡Waquin runacuna jutsata rurar cawaptinpis gamcunaga ama jutsata rurapäcuytsu!”