Asunasi Dunu Ilia Hou 2:12-40

¹²Fofogadigili amola gogolewane, ilia gilisili sia: dasu, “Amo mabe hou ea bai da adila:?”

¹³Be mogili ilia Yesu Ea fa:no bobogesu dunu ilia hou ba:beba:le, oufesega:ne amane sia:i, “Amo dunu da adini ba:iba:le, feloale hamosa.”

¹⁴Amalalu, Bida amola eno asunasi dunu gidayale, ilia wa:legadole, amola Bida da ha:giwane amo dunu huluanema amane sia:i, “Yu dunu amola Yelusalemega esala dunu huluane, nabima! Amo hou dilia waha ba:sa, amo ea bai na dilima olelemu.

¹⁵Goe dunu, ilia da adini ba:i dilia dawa:sa. Hame mabu! Wali da hahabe fawane, 9ougologo fawane.

¹⁶Be amo hou dilia waha ba:sa da musa: balofede dunu Youele da agoane olelei, amane,

¹⁷‘Gode da amane sia:sa, ‘Soge wadela:mu eso gadenesea, Na da Na A:silibu Hadigidafa Gala osobo bagade fi dunu huluane ilima hano agoane sogadigimu. Dilia egefe amola didiwi, ilia da eno dunuma Na Sia: olelemu. Dilia ayeligi dunu da esala ba:la:lumu, amola dilia da:i dunu da simasia ba:mu.

¹⁸Dafawane! Na hawa: hamosu dunu amola uda, ilima Na A:silibu Na da imunuba:le, ilia da Na sia: olelemu.

¹⁹Na da muagado amo ganodini musa: hame ba:su dawa:digima:ne olelesu hamomu. Amola osobo bagadega gasa bagade hawa: hamomu. Dilia da maga:me, lalu bagade amola lalu mobi ba:mu.

²⁰Eso da hadigi fisili amola oubi da haliga:iwane ba:mu,. Amasea, Hina Gode amo Ea Eso bagadedafa amola hadigidafa da doaga:i dagoi ba:mu.

²¹Amo esoga, nowa da Hina Ea Dioba:le, E ili gaga:ma:ne wele sia:sea, ilia da Gode Ea Gaga:su ba:mu!”

²²Dilia Isala:ili dunu huluane, nabima! Yesu, Na:salede dunu, E da musa: hame ba:su dawa:digima:ne olelesu liligi bagohame Gode Ea gasaga hamobeba:le, E da Hina Gode Ea Hou dilima moloiwane olelei. Dilia amo hou huluane dawa:. Bai E da guiguda: hamoiba:le, dilia huluane ba:i dagoi.

²³Amo hou, Gode da hanaiba:le, E da musa: dawa:lalu amola ilegei dagoi. Udigili hame, be hanaiba:le, Gode da Yesu dilima i. Amalalu, dilia da Yesu eno wadela:i hamosu dunu ilima i. Dilia sia:beba:le, ilia Yesu bulufalegeiga medole legei.

²⁴Be Gode da Yesu uhini, wa:legadolesi dagoi. E da bogosu ea gasa bagade hou fisili, E da bogosu ganodini dialumu hamedei galu.

²⁵Da:ibidi da musa:, Yesu Ea hou olelema:ne, amane sia:i, ‘Na da Hina Gode mae yolele, na midadi esalu ba:i. E da mae yolesili, gadenene esalebeba:le, na da hame beda:mu.

²⁶Amaiba:le na da hahawane bagade, amola na da nodone sia:nana. Na da osobo bagade dunu fawane, be na da dafawane hamoma:beyale dawa:beba:le, hame beda:mu.

²⁷Dia da na a:silibu bogoi sogebi amoga hame yolesimu. Na da Di mae yolesili hawa: hamosu dunu esala. Amaiba:le, Di da na da:i hodo dasama:ne, bogoi uli dogoiga hame yolesimu

²⁸Dia da esalusu logo ahoasu huluane nama olelei dogoi. Na amola Di, ani gilisili esalumuba:le, na da hahawane bagade ba:mu.”

²⁹Na fi dunu! Na da ninia aowalali ada, hina bagade Da:ibidi, amo ea hou dilima moloiwane olelemu. E da musa: bogole, uli dogone sali dagoi. Ea uli dogoi da guiguda: diala.

³⁰E da balofede dunu galu. Amola e da Gode Ea fa:no hahawane dogolegele imunu hou dawa:i galu. Gode Ea ilegele sia:i da E da Da:ibidi egaga dunu, Da:ibidi defele, hina bagade dunu hamomu.

³¹Da:ibidi da Gode Ea fa:no hamomu hou ba:beba:le, e da Mesaia Ea bu uhini wa:legadomu olelei amane, “Gode da bogosu sogebi amo ganodini amo dunu hame yolesi. Ea da:i hodo da bogoi uli dogoi ganodini dasai hame ba:i.”

³²Defea! Amo Yesu Hi da bogole, Gode da E uhini bu wa:legadolesi dagoi. Amo hou huluane ninia ba:su.

³³E da wa:legadole, wali Ea ada Gode Ea lobo dafadili fisa. Gode Ea musa: olelei agoane, E da Gode Ea A:silibu Hadigidafa Gala lai dagoi. Amo hahawane dogolegele iasu E da ninima i dagoi, amo hou dilia waha ba:sa.

³⁴Da:ibidi da Yesu defele, Hebene diasuga hame heda:i. Be Da:ibidi da amane sia:i, ‘Hina (Gode) da na Hina Gode Ema amane sia:i, ‘Na lobodafadili fili,

³⁵ouesalu, amoganini Dia ha lai dunu amo Dia emo ligisisu hamoma:ne na da hasalimu,’ amane sia:i.

³⁶Amaiba:le, Isala:ili dunu huluane, dawa:ma! Yesu, (dilia da bulufalegeiga fuga:i amo dunu), Gode da E Hina Gode amola Mesaia, hamoi dagoi!”

³⁷Dunu huluane, amo sia: nababeba:le, ilia dogo dadiga gala:i agoane se bagade nabi. Ilia da Bida amola eno asunasi dunu ilima amane adole ba:i. “Nola! Ninia adi hamoma:bela:?”

³⁸Bida da ilima bu adole i, “Dilia afae afae dilia wadela:i hou yolesili, sinidigili, Godema buhagima. Amasea, Yesu Gelesu Ea Dioba:le, ba:bodaise hamoma. E da dilia wadela:i hou gogolema:ne olofole, Gode Ea hahawane dogolegele iasu liligi (Gode Ea A:silibu Hadigidafa Gala) dilima imunu.

³⁹Amo hahawane iasu, Gode da dilima, dilia mano, amola sedaga esala dunu, ilima imunusa: E da ilegele sia:i galu. Ninia Hina Gode da nowa dunuma E da misa:ne sia:sa, E da amo dunuma imunu.”

⁴⁰Bida da Godema misa:ne sia: bagade ilima olelei. E amane sia:i, “Se dabe iasu bagade da dilia wadela:i fi dunu ilima doaga:mu. Amo mae lama:ne, dilia hou afadenema!”