HECHOS 2:12-40

¹²Jilee'²¹mo tsa'goo²¹‑tsi pe joon jo 'øøi'²¹‑tsi 'ee galɨ́². Joon gaunngɨɨ¹ɨ ruu'²¹i: ―¿Ee 'øøi'²¹‑tsi jilaa'²¹ 'elo?

¹³Pe 'inlɨ́ɨi¹³gɨ ungøø¹i, jin'²in: ―Tsá² 'íin¹mo no.

¹⁴Joon gajmaa¹a Tʉ́³ siin'¹³in coon'¹³ jɨ dyajaain²¹ apóstoles catyaai² do joon gafaa'²¹a tá² jin'²in: ―Tsá² seein²¹ Israel, joongɨ coon'¹³ tsá² seein²¹ Jerusalén, cwoliñí²ii' 'elo. Joongɨ nʉ́ʉ²duu' coon'²¹ tún² 'e ifo'³oo lo.

¹⁵'In tsañʉʉ'¹ lo jon' 'in 'íin¹ no la lɨ́² 'e 'ɨ¹‑'oo' tsʉ 'aa²¹gɨ lo. Jo mo tɨ́² 'ii'²¹ wa'a ngɨ¹ tsá² 'íin¹. Jiin'¹³ la 'iin²¹ ñʉ́² ningóo¹.

¹⁶'Elo‑o gatsín¹ 'e gajin'² 'in gafaa'²¹a júu³ tya' Dios calɨɨ sii²¹ Joel. Joel do gajin'²in:

¹⁷La lo‑o gajin'² Dios: La nʉ'gɨ mi 'iin² juncwii²¹ icwo'³oo Espíritu Tyʉ́² tyiia la jileei'²¹ 'in taain²¹² fu juncwii²¹. Yʉʉn²¹ tyii'i tsañʉʉ'¹ coon'¹³ yʉʉn²¹ tyii'i tsamɨ́² ifaa'²¹a cwáain¹ tyiia. Joongɨ sɨmii'²¹ sá² coon²¹ iní²i. Joongɨ yʉʉ'¹³ icwuu²¹mo ilisá² tyisáa² tya'a.

¹⁸Nicwóo³oo 'in Espíritu Tyʉ́² tyiia 'e jmɨɨ²¹² joon tya' jileei'²¹ 'in jmoo¹o la to² tyʉ'³ʉʉ la tsañʉʉ'¹ teen'¹³ la tsamɨ́². Joon ifaa'²¹o cwáain¹ tyiia.

¹⁹Lɨ' yʉ' juncwii²¹ 'ée³ee 'a tsa'goo²¹‑'oo'. Jmáa³oo jon li² lɨ ni 'wó². Coon'¹³ jmɨ¹, joongɨ coon'¹³ jníi¹ tya' uñi² ijmá³aa 'e li² do.

²⁰La nʉ'gɨ 'e icwá¹ jmɨɨ²¹² tya' Ña'ñʉ'¹ʉ' Jesús, coon²¹ jmɨɨ²¹² fee'¹ joongɨ coon²¹ jmɨɨ²¹² 'ya'²gɨ lɨɨlɨ¹, ilinʉʉ²¹ lɨ 'íi¹in ñi'¹. Joongɨ sɨɨ'²¹gɨ iliin¹ la lɨ́¹ jmɨ¹.

²¹Joon jilee'²¹mo 'in gamɨɨ¹ɨ coon'¹³ 'e sii²¹ Ña'ñʉ'¹ʉ' itiin'¹³mo. La joon júu³ niga'ɨ́ɨ² Joel cwáain¹ tya' Dios Jmii²¹ ―jin'² Tʉ́³. Faa'²¹gɨ Tʉ́³ jin'²in:

²²―'Wii'¹³ joon nʉ́ʉ²duu', tsañʉʉ'¹ seein²¹ Israel, jilaa'²¹ 'e ifuu²¹²uu 'naa' lo ―jin' Tʉ́³―. Tyʉ́²‑ʉ ñí³oo' jilaa'²¹ milagro 'ya'²gɨ 'e gajmaa¹a Jesús tsá² Nazaret coon'¹³ 'ii'²¹ tya' Dios Jmii²¹ jee²¹² 'naa'. Joon coon'¹³ jilaa'²¹ 'e gajmaa¹a Jesús do gajmaa¹a Dios júu³ 'e Jesús jaain²¹ tsá² 'in 'iin²¹²in.

²³Pe jo 'ee futyí³ la mo gajaain'²¹ tsá² 'ii jee²¹² 'naa' tsʉ 'yʉ to²‑o 'e ni'ɨ¹‑tsi Dios ca la mo jée¹mo. 'Naa'gɨɨ' gaseen'²moo', joon cwáain¹ tyi'naa'oo' gajngaa'¹³i tsá² gó² 'ii, gateen¹in tsaa' crúu¹³.

²⁴Pe Dios Jmii²¹ gajmaa¹a jiin'¹o tún¹. Nigaláa²mo tsʉ feei'¹gɨ 'ii lagɨ 'mó¹. Jo lí² tyʉ'² 'mó¹ 'ii to².

²⁵Joon 'lɨɨ²¹² rǿøi¹³ David gafaa'²¹a ni jí² tya' Dios cwáain¹ tya' Jesús mo gajin'²in: Máa¹moo Ña'ñʉ'¹ʉ' Dios coon²¹ tøø²mo tyaní³ii. Lɨ caa²¹na tsáa¹ siin'¹²in joon jo 'ee jiin'¹³ coon²¹ goo'²¹oo.

²⁶'Wii'¹³ joon jløø'³mo alma tyiia. Joon coon'¹³ moo'óo³oo fo'³oo jmai'² júu³ tyʉ́²‑ʉ. 'Wii'¹³ joon mo 'ii'²¹ 'woo'²¹ cuerpo tyiia jo 'ee cu'²‑tsii coonti.

²⁷Tsʉ ñí³oo 'e jo saa'¹²'a alma tyiia jee²¹² 'lɨɨ²¹². Joongɨ jo cwo'²'o 'e ixiia'²¹ cuerpo tya' 'in gatyii'¹³'in.

²⁸Ga'ee'¹³o'o jna xiiala ngɨ́ɨ³ɨɨ coon²¹ fu¹ coon²¹ tsáa¹ 'e cwo¹ juncwii²¹ tya' tsá². Joon nigalijløø'³moo 'wii'¹³ cwoo²¹'o coon'¹³ jna. La joon gajin'² David cwáain¹ tya' Jesús.

²⁹’Tsaru'¹u', tyʉ́²‑ʉ ñii²¹i' 'e 'lɨɨ²¹² tsafeei'¹ tyi' David juun²¹mo. Joon ga'áa²mo tsá² 'ii. Joon 'aan¹ tya'a roon¹gɨ coon'¹³ jna' ca jmɨɨ²¹² no.

³⁰Pe David do jaain²¹ 'in gafaa'²¹a júu³ tyʉ́² tya' Dios. Joon ñii¹o David 'e gasɨɨ'²¹ɨ Dios 'ii 'e tyi'²mo jaain²¹ tyii²¹a 'in cwa¹ cwáain¹ tya'a.

³¹La joon 'lɨɨ²¹² David do lawa jǿø²o ca la jée¹mo 'a ijiin'¹in Cristo. Joon gajin'²in 'e jo ján² alma tya'a jee²¹² 'lɨɨ²¹². Jon'gɨ xiia'² moo¹ taa²i.

³²'Ña'a Dios Jmii²¹ gajmaa¹a jiin'¹ 'in Jesús no. Jilaa'²¹ 'elo ganee²¹e'e.

³³Joon gatǿ¹ Dios Jmii²¹ 'ii lɨ' cwoo²¹o tsáa¹. Joon gacwo'¹o Dios Jmii²¹ 'ii 'in Espíritu Tyʉ́² tya'a la lɨ 'e nigajin'²in. Joon jilaa'²¹ 'e nigalɨ́² nano, joongɨ nijǿø²øø' joongɨ ninʉ́ʉ²ʉʉn' 'e gajmaa¹a 'ii‑o joon.

³⁴Jon' David do 'in gangaai'¹³ fu ñʉ'fú² tsʉ 'ñaa'o gajin'²in: Dios Jmii²¹ gasɨɨ'²¹ɨ Ña'ñʉ'¹ʉ' jin'²in: “Ní³'i caa¹na tsáa¹ ca mi jmáa³aa 'ii'²¹ 'e tyée¹na 'wii²¹² tɨ́ɨ¹³'ɨ jileei'²¹ 'in 'eei'¹ 'nʉ.”

³⁶’Jileei'²¹ tsá² Israel, cwoliñí³oo' 'e la ja'²mo 'in Jesús, 'in gatéen¹naa' tsaa' crúu¹³, Dios gajmee¹i 'e 'ii Ñi'fii²¹²i' joongɨ 'in jmaa¹a tiin'¹³naa' sii²¹ Cristo. La joon gajin'² Tʉ́³ sɨɨ'²¹ɨ 'in tsá² fúui¹ do.

³⁷Joon mo ganúu²un 'in tsá² do 'elo joon ga'aa¹a fa'í³ joon gaunngɨɨ¹ɨ Tʉ́³ coon'¹³ 'in tsá² tya' Jesús catyaai² do: ―Tsaru'¹u', ¿'ee 'ná¹ jmoo²¹o'o?

³⁸Joon gañii¹ Tʉ́³: ―Cwojaa'²¹‑'oo' coon'¹³ Dios joongɨ cwosaa²¹naa' jmɨɨ²¹ la jaan²¹naa' coon'¹³ la sii²¹ Jesucristo. Joon la joon 'iin²mo Dios tsaa² tyii'. La joon jon icwo'¹o Dios 'naa' 'in Espíritu Tyʉ́² tya'a.

³⁹'E júu³ lo 'e tyi'naa'oo' coon'¹³ yʉʉn²¹ tyii'. Joongɨ tya' jileei'²¹ 'in seein²¹ wíin². Joongɨ tya' jileei'²¹ 'in tøø¹ø Ña'ñʉ'¹ʉ' Dios Jmii²¹.

⁴⁰Coon'¹³ 'e júu³ lo gafaa'²¹a Tʉ́³. Joon coon'¹³ láai²gɨ júu³ tyʉ́² gafaa'²¹a jin'²in: ―Woo²¹naa' yaanaa' jee²¹² 'in tsá² gó² no.