Gutut 2:12-40

¹²Anu bambam den tarak gare gare wan, “Ma tavewa dim da?”

¹³Go upinewa wawa koko tan anega wane, “Kaum sisi denawa aritavet nane!”

¹⁴Go Pita, Iesu watu enamot mega aonagaet pusinawan daiton nagirewa den tanamon, ao yon wande iam iam baware ame inamup opata kaimakaet anega wan, “Evenan waina, Diu nagirewa, e da da mapa Ierusalem gapanawa. Neman guran nop anen wapena anun.

¹⁵Waenapan ma kaum kaimake dena nat ya anune iwa ma mumaget wam airase nani yamunaet nani yamu degede megenat.

¹⁶Go watageta God oisewa waiwandini apane Dioero endi ma anenen venaseni nopewa wataget ok manega sen,

¹⁷God anega wan, ‘Wam verisiwa gapan waenapan ugup ugup, ne Guana aigamup wagemain. E otu waiawa ge ora waiawa God wadiamopi nopewa wain. E tamaru egawa bet ine yawain, amba e aeta egawa enok inain.

¹⁸Wam ame gapan ne Guana nao nega waene apanewa, aigamup den wagemain, amba mu ne nop oit nega wain.

¹⁹Ne kiman ge piup gapan, denip amba oma yamewa, ge dagin uni gware dena gapan ne yo paua ta ewamoin.

²⁰Wam mum tunuta, siragam dendeni tata. Iragi mame venasepi ewap Ayop wam mega bawarewa taueta.

²¹Amba waenapan da da Ayop Iesu menan wap, anu tumasepiwa ame inak warain.’

²²Ian Isurero, nop ma iragi anun, Iesu at Nasaret apanewa, me aigap iragen. God Iesu kakae guragut megawa ta ewaepen menan yo kimani paua baware ugup ugup ame Iesu gamup tan. E mame iragi anuyan, iwa endi mame yamayap venasen.

²³God Iesu eneni go e God iup mega ya anuine nagirewa den, wara korosia toyan. Go mame God anut mega wataget anenen venaset anuni gapan di venasen.

²⁴Go God Iesu bop gapan wat inakamen ap menan bop gapan me wat vesen, iwa bop aroewa wat nat wat nat umap uon.

²⁵Wataget apan Devit Iesu bop aroewa ya wat nasepi oisewa namu manega wan, Ne Ayop nega God pot pot imunap yavivin. Ne dararam ya tain iwa me mainanap wandia.

²⁶Ap menan ne potanap aton anuivin, amba nonap wa atona gimagingain. Ne tamana di bonigatain go anu dao gimage gapan iningain.

²⁷Iwa guana borit waine nagire at muga aepi, ap mepe ge ae ya venegai. Ne ayamase den nao gega pot poraet taina apanewa, menan epina ya puakaet anuingi.

²⁸Inak neginewa ge wa ewanegingai gende gende wanineta, menan aton nega baware anuingain.”

²⁹Pita opata aigap sia wan, “Tatan, gwanin, ne gego den ya wadiaivin, ame omayan baewa Devit bop tan amba tune, kaima mega ma wanden oneni endi mame wandia.

³⁰Watageta apanewa Devit, God no oise waiwandiniwa menan God wa agiaseni ame Devit me asigip. God Devit inap agi wan, ame Devit ani sibabasi mega da evi amba Ayop dieta amba Devit watat mega gagap wandeta.

³¹God dim da tapi Devit namu anun menan Iesu boe inakae sia yon wandepi oisewa manega wan, Me kaima arewa gapan ae ya veta, etua mega ya puakaeta.

³²Devit wataget wani tavewa tauen. God aro mega gapan Iesu bop gapan wat inakamen. Nu mame iravi venasen yawatoni nagirewa ame oisewa waivin.

³³Iesu kiman dot aeni endi mame God mainewa nutup gapan wandia. Mamewa Guewa Posewa Woup Seniwa otua Iesu wa agiaseni gapan wanen. Amba Iesu Guewa ame aoma wagemen, endi ma me di yawaton anuivin.

³⁴Devit kiman ya dot aen go Iesu menan anega wan, Ayop Mamewa God, me Ayop inap anega wan, ‘Mainena nutup gapan wanigingan, ne anavi gega iravi tambumop gauaragap semopena menan.’ Devit ap anega wan.

³⁶God nop mame wani iwa mega ame at Isurero nagirewa iragi tavewa ma anu kakayasepen menan. Tavewa mame di, apan Iesu, e oma korosi gapan togurayana, ame God Ayop nuga dien amba God om enuni apanewa Keriso den dien,” Pita ap anega wan.

³⁷Wam ame Pita wani anune, koewa muga menan bumagamu tuk tak wan amba Pita ge Iesu watu enamot mega upinewa den singui tayawamon, “Orup ma, nu anenen tait?”

³⁸Pita gare anega wadiamon, “E iragi daiton daiton inat waniet ega gapan imuya entan tane amba Iesu yaua gapan dup iai, God koewa ega anu ae veapen menan. Ame gapan Guewa Posewa Woup Seniwa warai, ame God garaet megawa.

³⁹God agi mame enen, ge otu waiawa munan den, amba den waenapan wandapewa munan. Ap me Ayop God waenapan munan wapiwa me munan tata.”

⁴⁰Pita tagigiramu nop arugataet wan, amba me anega sia wan, “Endi piup gapan waenapan koewa taine bararaen ap menan inak ega kwayupe ek di tan.”