Hechos 2:12-40

¹²Tucuy chay runastaj mayta t'ucusharkancu. Manaña ni imata niyta atispataj paycunapura tapunacusharkancu: —¿Ima niytataj munan tucuy cay imasrí?

¹³Waquinrí Jesuspi jap'icojcunata p'enkaypi riqhurichinancupaj asipayasharkancu: —Machaskas cashancu, —nispa.

¹⁴Pedroka chay chunca ujniyoj cachaswan runaspa ñaupakencupi sayaricorka. Jatunmanta parlaspataj runasta nerka: —Israel llajta-masis, Jerusalenpi tucuy tiyacojcunapis uyariwaychej. Cayta yachanayquichejta munani.

¹⁵Cay runas mana machaskaschu cashancu yuyaskayquichejmanjinaka. Reparaychej allinta, cay jallp'anchejpi runaska mana machaycuncuchu manaraj pakarin miqhuna horastaka.

¹⁶Manachayrí cayka Diospa unay willajnin Joelpa niskanmanjinamin. Payka nerka:

¹⁷Wiñaypaj Camachej Dioska nin khepa p'unchaycunapi cayjina cananta: Tucuy jallp'amanta runasman Santo Espirituta cachamusaj. Khari wawasniyquichej ususisniyquichejpis atiyniywan sut'inchankancu. Jovenesniyquichejtapis yuyaychasojcunayquichejtapis cheka cajniymanta ricuchisaj.

¹⁸Noka Espirituta cachamusaj chay p'unchaycunapi tucuy casuwajcunaman, kharismanpis warmismanpis. Paycunataj atiyniywan willankancu.

¹⁹Janaj pachapi jatuchej t'ucunasta ruwasaj. Cay pachapitaj ricuchinasta ruwasaj tucuy runas juchancuraycu phiñacuskayta reparanancupaj. Chay ricuchinas ninawan, yawarwan, k'osñiwanpis cankancu.

²⁰Inteka lakhayaponka. Quillapis yawarjina pucaman tucuponka. May sinch'i mancharina canka manaraj Señor cutimushajtin.

²¹Noka, tucuy atiyniyoj Diosmanta tucuy mañacojcunata juchasnincumanta cacharisaj wiñay causayniyoj canancupaj, —nerka Dios.

²²‘Llajta-masisníy, uyariwaychej. Dioska ricuchisorkachej Nazaret llajtayoj Jesusta sumajpaj khawaskanta. Chaywanpis t'ucunastawan jatun ricuchinastawan chaupiyquichejpi Jesusnejta atiyninwan ruwarka. Ajinapi kancunaman rejsichisorkachejña Jesuska paypa ajllaskan caskanta. Chaytataj kancunaka sumajta yachanquichej.

²³Dioska munayninmanjina yachayninmanjinataj unaymantaña yuyarka Jesús wañunanta juchasninchejraycu. Ajinapimin kancuna payta jap'iycorkanquichej Diospa camachiskasninta mana casuspa. Sajra runasman jaywaspataj payta wañuchicherkanquichej chacatanapi.

²⁴Payta Dioska wañuskanmantaña causarichimorka. Ajinapi payta sinch'i llaquichej wañuymanta cacharichiporka. Chekatapuni chay wañuyka mana aterkachu payta atipayta.

²⁵Unay camachej Davidpis Jesucristoj causarimuyninmanta nerka: Señor Diosniypi tucuy sonkoywan jap'icorkani. Pay nokawanpuni cashan yanapawaspa. Sayacuwaskanraycutaj paypi jap'icuskayta manapuni sakesajchu.

²⁶Chayraycu may cusiska cani. Simiywanpis cusiyta taquini. Runas caspapis causasaj sumaj niwaskayquipi jap'icuspa.

²⁷Noka kanllata casoj camachiyquimin cani. Manapuni sakewanquichu wañuska runas cancu, chaypi. Nitaj cuerpoyta ismunanta sakenquichu.

²⁸Wiñay causaymanta yachachiwaspapuni pusawarkanqui. Kan nokawanpuni caspa mayta cusichiwanqui.

²⁹‘Llajta-masis, unay tatanchej Davidmanta sut'ita parlariskayquichej. Payka wañupuspa p'ampaska carka. P'ampananri caypi cunancama cashan.

³⁰Davidka Diospa willajnin carka. Dioska palabranwan unay payman nerka: “Kanpa khepa alchhisniyquimanta kanjina camachinanpaj ajllaskay Cristota churasaj”, nispa.

³¹Chayta unayña yachaspa Davidka Jesucristoj causarimuyninmanta kelkarka. Nerka mana sakeskachu cananta wañuska runas cancu, chaypeka, nitaj cuerponpis ismunanta.

³²Dios chay Jesucristota wañuymanta causarichimorka. Tucuy nokaycutaj chayta ricuskaycuraycu Jesucristomanta willajcunan caycu.

³³Ajinaka Dios atiyta kospa payta jatunpaj khawarka tucuyta camachinanpaj. Dios Tatanpa sumaj palabranmanjina Jesuspa sonkonman Santo Espirituta cachamorka, tucuy nokaycumanpis. Chayraycu ricuskayquichejka uyariskayquichejpis chay Espíritoj ruwaskanmin.

³⁴Camachej Davidka mana cuerponpichu janaj pachaman wicharerka Jesusjina. Payrí Jesucristomanta kelkarka: Señorninchej Dios nerka Señorniy Cristoman: “Nokawan cusca tiyaycucuy camachinanchejpaj churanacojcunayquita k'alata atipanaycama”.

³⁶‘Chayraycu tucuy kancuna, Diospa ajllaskan israelcuna sumajta yachanayquichej tiyan: Dioska chay Jesustamin ajllacuspa churarka tucuyta atiywan camachinanpaj. Paytamin kancunaka chacataspa wañuchicherkanquichej.

³⁷Pedrota uyariytawan paycunaka sonko nanayta llaquicorkancu. Chayraycu paytawan chay waj cachastawan tapurerkancu: —Llajta-masis ¿imatataj nokaycu ruwanaycu tiyanrí?

³⁸Pedrotaj paycunaman cuticherka: —Sapa ujniyquichej juchasniyquichejta sakespa Diosman cutiricuychej. Bautizacuychejtaj Señor Jesucristopi jap'icuskayquichejta ricuchinayquichejpaj. Ajinapi Dioska juchasniyquichejta khechusonkachej. Kancunamantaj Dios c'acha caskanraycu cachamusonkachej Santo Espirituta sonkoyquichejpi tiyacunanpaj.

³⁹Dioska palabranwan nerka: “Payta kancunaman cachamusaj”, nispa. Kancunapaj chay sumaj niskanka cashan, khepan allchhisniyquichejpajpis, carupi tiyacoj tucuy runaspajpis. Señor Diosninchej picunatachá munan wajyacuyta paypi jap'icunancupaj, tucuy chaycunapajpis sumaj niskan cashan, —nispa.

⁴⁰Ajinata Pedroka ashqhataraj parlaspa Jesusmanta paycunaman willarka. Mayta reparacherkataj: —Jesusta wañuchejcuna wiñaypaj sinch'i ñac'arichiskas cankancu. Kancunarí ama payta khesachaychejchu paycunajinaka. Ajinapi mana ñac'arichiskaschu canquichej, —nispa.