28guredxa'reni räjpreni: ―¡Coḻtaa xpejṉ Israel! ¡Coḻtaa te gacnäjtu nuure! ¡Bahuilaare! Niguiire najc nani rniyaj rexpejṉ Israel cadrotis rijni. Rulijdxni bejṉ te di chazanäjrureni xleii toMoisés, riye'tzni lo bejṉ xhet sajcdi xquidoronure. Coḻhuilaa xho siädnäni ree beṉ griegw, beṉzijt ni di gac xpejṉ Israel, te gundxuudxni xquidoronu ―räjpreni.
29Si'c caniireni sa'csi te huält bahuiireni sanä Pabl Trófimos lo nezyuj. Trófimos najc te beṉzijt ni siääd guedx Éfeso. N̲aj cayujnreni xhigab laa niguiiga ni siädnä Pabl neṉ xquidoro rexpejṉ Israel.
30Guideb guejdxga guyu' yärsia', bire' beṉguixhuj, bixa'treni yejc Pabl, gunaazrenini, gudobxhajxhreni Pabl, gulägajcrenini neṉ guidoroga. Biäugajc repuertro xten guidoro.
31Laḻ ni cayujnreni xhigab ju'trenini, yu' chu huiye'tz lo nani rnibee resoldaad ni caya'p guejdxga, räjpreni: ―Cayajc te bieiduxh neṉ guejdxre.
32Guredxgajc comandant resoldaad näjza gaii capitán, ruxuṉreni bidzujṉreni cadro tre' rebejṉ. Che bahuii rebejṉ lo comandant näjza resoldaad, guläjz caguijṉreni Pabl.
33Dxejcti gubig comandant lo Pabl, gunibeeni baliib resoldaad ṉaa Pabl con tiop cadeṉguiib. Dxejcti gunabdiidxni lo Pabl, räjpni: ―¿Chu luj? ¿Xhini'c bejnlu?
34Lo rebeṉ xhidaalga yu' rexpejṉ Israel ni guredxa' tej diidx, yu'za reni guredxa' ste'ca diidx. Di comandant niujn gan niacbeeni xhicuent cayajc biejy sa'csi cabedxa' guiraa rebejṉ. Dxejc gunibeeni chanä resoldaad Pabl cadro rbäjzreni.
35Che bidzuṉnäj resoldaad Pabl ro' scaleer ni caj ro'c, biireni Pabl te bejnreni gan biunäjreni Pabl, sa'csi nialazduxh rebejṉ rlajzreni nugu'treni Pabl.
36Siädnajl guiraa rebejṉ Pabl, rbedxa'reni: ―Coḻgugu'tni.
37Che agojḻ jiu' Pabl neṉ yuro xten resoldaad, räjpni lo comandant con diidx griegw: ―Rlazä guiniä tiop diidx lo guejblu. Räjp comandant lo Pabl: ―¡An rniilu xtidxsaä!
38An dilu gac niguii ni siääd nacióṉ Egipto, nani gudiḻnäj gubier, nani huinä lo reyubijdz tajp mil niguii nani rugu't bejṉ.
39Dxejc räjp Pabl lojni: ―Narä nacä te beṉ Israel, te beṉ Tarso xten Cilicia. Sacduxh guejdxga lo reguedx Cilicia. Canabä gun guejblu te hueen, gusaan guejblu guiniä lo rebejṉre.
Hechos 21
Hechos 21:28-39