HECHOS 21:28-39

²⁸Te ni cacana jee i: Tēe ñuu yō Israel, cuāha núú ní ndaha jíjnáhan ní na jnɨ́ɨ yó tée yáha. Chi máá de cúu tēe jíca cuu nɨ́ɨ́ cáhnu stéén de nuū tāca ñáyuu, te cáhán de sɨquɨ̄ nación yō jiín sɨ́quɨ̄ ley jeē ni jéhe ya nuū Moisés jiín sɨ́quɨ̄ templo yáha. Te suni je ni quɨ̄vɨcoo de jíín jecu tēe griego ini templo iī yāhá, te súcuan stɨ́vɨ de jnūhun iī jeē cahán jeē ma cúu quɨ̄vɨ ñayuu ini templo te núu nasūu ñáyuu hebreo cúu i, áchí.

²⁹Chi nde na íne Pablo ini ñuu un ní cajini tēe hebreo jeē jíca de jíín Trófimo, tēe ñuu Efeso jeē násūú hebreo cúu de, te cájeni ni de jeē ni quɨ́vɨ tēe un jíín Pablo ini templo.

³⁰Te ndɨhɨ ñayuu ñuu un ní cuvaā, te ni cacutútú‑ni i, te ni cajnɨɨ i Pablo, te ni castáa i de ni quenehen i de ini templo un, te ni canacasɨ‑ni i yéhyɨ́.

³¹Te ni cacuni i cahni i de núú. Te general, tēe cújéhnu nuū ndɨ́hɨ soldado, ni nihīn de jnūhun jeē ndɨhɨ ñayuu ñuu Jerusalén ni candonda i cácuvaā i.

³²Te ni jeca general tācá soldado jiín capitán, te cájinu de cuangoo de nde nuū cáhīin ñayuu cuehē ún. Te ná ni cajito ñayuu jeē ni jínūcoo general jiín soldado, te ni cajecuɨñɨ̄ i jeē cácani i Pablo.

³³Yūcuán na te ni quɨ̄vɨ general mēhñu ñáyuu, te ni jnɨɨ de Pablo, te ni ndacu de jniñu jeē conuhnī de jíín úū cadena. Yūcuán na te ni cajnūhún general ndé tée cúu Pablo te na cuēchi ni sáha de.

³⁴Te ni cacana ñayuu cuehē ún, sava i ɨɨn jnūhun te sava ga i ɨnga jnūhun, te tu ní cúu cuni de na cuēchi ni sáha Pablo, chi cácuvaā i. Te ni ndacu de jniñu cuahān Pablo nde cuartel.

³⁵Te nuū ni jínū Pablo escalera cuartel ún, te soldado ni cajnɨɨ de Pablo cándīso de sɨquɨ̄ jeē cácuni ñayuu ún jnɨɨ i Pablo sáha xeēn i jíín de.

³⁶Chi ndɨhɨ i vējicoo i ichi yátá soldado, te cácana jee i: Cahni ni tée jíñá, achí i.

³⁷Te cásquɨ́vɨ de Pablo ini cuartel nuú, te jíín jnúhun griego ni cahān Pablo jiín general: ¿A cuáha ni jnúhun cahān ná ɨɨn jnūhun jíín ní? achí de. Te ni cahān general jiín de: Te jíní rō cahán rō yuhu griego jeē súcuan.

³⁸Núu súcuan te nasūu róhó cúu tēe Egipto jeē jé ni cuu quɨvɨ̄ ni ndonda sɨquɨ̄ gobierno te ni quenehen cuūn mil tēe jéhni ndɨ̄yɨ cuangoo jíín de nde nuū ñúhun téhé, áchí.

³⁹Yūcuán na te ni cahān Pablo: Tuú, chi tēe hebreo cúu ná, te ni cacu ná ñuu Tarso, ɨɨn ñuu jeē cujéhnu ndañúū Cilicia. Te quiñūhun ni ni cuáha ní jnúhun na cáhán na jíín ñáyuu yáha jíjnáhan i, áchí de.