Hechos 15:35-41

³⁵Ekꞌu ri Pablo y ri Bernabé xekꞌojiꞌ pa ri tinamit Antioquía. Y junam kukꞌ ukꞌiyal kachbꞌiꞌil, xekꞌutun chwi Ruchꞌaꞌtem ri Dios y ri Utzilaj Tzij puwi ri Qanimajawal.

³⁶Ikꞌowinaq chi kꞌu jujun qꞌij, ri Pablo xubꞌiꞌij che ri Bernabé: «Chojtzelej tanchi kukꞌ ri kikojom rubꞌiꞌ ri Cristo pa taq ronoje ri tinamit pa qatzijom wi ri Utzilaj Tzij re ri Qanimajawal, chaꞌ kebꞌeꞌqilaꞌ saꞌ ri kiꞌanom» xchaꞌ.

³⁷Yey ri Bernabé xraj kukꞌam bꞌi ri Juan kukꞌ, waꞌ e ri kabꞌiꞌx Marcos che.

³⁸Noꞌj ri Pablo na xukꞌul ta ukꞌuꞌx keꞌek ri Marcos kukꞌ, ma ri Marcos xeroqꞌotaj kan pa taq ri luwar re Panfilia y na erachbꞌilam ta chi lo che ri chak.

³⁹Xebꞌek kꞌu chunimal puwi waꞌ yey na jinta xeꞌela wi ri kichꞌaꞌtem chikiwach. Ruma kꞌu riꞌ, ri Pablo y ri Bernabé xkijach bꞌi kibꞌ. Ri Bernabé xukꞌam bꞌi ri Marcos rukꞌ. Xebꞌek kꞌu pa barco y xebꞌopon pa ri isla Chipre.

⁴⁰Yey ri Pablo xuchaꞌ bꞌi ri Silas chaꞌ karachbꞌilaj bꞌi che rubꞌenam. Ekꞌu ri hermanos e kꞌo Antioquía xkiꞌan orar y xkitzꞌonoj bꞌi ri unimal rutzil ukꞌuꞌx ri Dios pakiwiꞌ; tekꞌuchiriꞌ, xkimaj bꞌi kibꞌe.

⁴¹Xebꞌikꞌow kꞌu pa taq ri luwar re Siria y re Cilicia, kakinimarisaj kan kikꞌuꞌx ri kakimol kibꞌ pa rubꞌiꞌ ri Cristo pa taq ri tinamit.