Aposotolo Adi Hewau 15:35-41

³⁵Paulo eo Banaba se miamia Anetioka eai, Guiau ena riba se laulauheataei, eo se laulauguguiaei, eo tatao gamagaridi maediyao hinage.

³⁶Asubena headi se lauo Paulo abo i ribalau Banaba arinai, i ene, “Hage ta uio eda tataoyao ta itadi eanua gamagamagari eai Guiau ena riba ta guguiaidi wa, ta itadi edohadi.”

³⁷Banaba Ioane, esana esau ede Mareko, ia nuagadona mo bena maedi se lau.

³⁸Paulo ena nuatu i ene nige i lolo maedi se lau, paana ede nabada wa Pamepulia eai i laugabaedi, adi paisoa nige i sagui.

³⁹Taudi labui se haiawayagara ariri arinai abo se tausuara; Banaba Mareko i woeai ana sagu, se geru se lau Kuperu;

⁴⁰na Paulo Sila nuana i amnaei, abo se torohai, edi tataoyao enadi se aiboda baguna, bena Guiau ena ainauia se abi.

⁴¹Ia ie lau Suria eo Kilikia i utudio, ekalesia gamagamagari i riba‐headidiridi.