Hawaareta Ooso 10:3-22

³Issi gallas gallassafe uddufun saate bolla Xoossa kiitanchay izas ajjutan beettidi izakko yiidi “Qornoloosa” gi xeygishin qoncen beyides.

⁴Qornoloosikka dagamara tishshi histi xeellishe “Godo hayssi aazee?” gides. Kiitanchaykka zaaridi “Ne woossaynne ne muxuwatay qofetanas pude Xoossa sinth gakkides.

⁵Ne ha7i as Iyophphe yedada Phexroosa geetettiza Simoona xeygisa.

⁶Izikka abba matan diza galba qaaciza Simoona soon imathateth dees” gides.

⁷Qornoloosa haasayssida kiitanchay izappe shaaketidi bidappe guye ba ashkaratappe nam7ata qasse Ayana yo7os minone izas daro ammanettiza wotadaratappe issa xeygisidi,

⁸izi beyidayssa wursi istas yootidi Iyophphe kiittides.

⁹Kiitettida asati wontetha gallas gede katamaykko matishin Phexroosi usuppun saate bolla woossana pude Pooqe bolla kezides.

¹⁰Hessa wode izi gafida gish qumay buro kaxxishin dhisko mala liphiphi histin ajjutara saloy doyettin issi gita xaaxettida may7o malay oyddu baggara oyketidi duge biittan wodhdhishin beyides.

¹²He may7oza bolla oyddu tohoy diza dumma dumma do7ati biittara gooshettiza medhetethatinne salo bolla piradhiza kafoti deettes.

¹³Hessa wode “Phexroosa denda hayta shukada ma” giza qaalay izas siyetides.

¹⁴Phexroosi qasse “Godo hayssi hanenna! Geesh gidontayssa woykko tuna miisha ta mulerakka ma erikke” gides.

¹⁵He kase qaalay qasseka nam7antho izakko yiidi “Xoossi geeshshidayssa ne tuna mala qoodoppa” gides.

¹⁶Hessika heedzdzuto shireti shireti izakko yidappe guye may7o misatizayssi heerakka pude salo bides.

¹⁷Phexroosikka ba beyida ajjutaza birsheththa eranas daro metotidi keehi qofo bolla dishin Qornoloosi kiittida asati Simoona keeththe koyishe demmidi pengen eqqida.

¹⁸Qaala dhoqu histidi “Phexroosa geetettiza Simooni dizasoy hayssan awanee?” gi oychida.

¹⁹Phexroosi ba beyidayssa keehi qoppishin Xillo Ayanay iza “Hekko heedzdzu asati nena koyeetes. Denda! Duge wodhdhada ista yeddiday tana gidida gish sidhey baynda istara ba” gides.

²¹Phexroosikka duge wodhdhidi “Hekko inte koyizadey tanakko! Inte yiday aazasee?” gides.

²²Istika izas “Nuni mato halaqa Qornoloosa matappe yidos. Izikka Xoossas babbiza xillo asanne Ayhuda asa ubba matan daro bonchettida asa. Nekka iza keeththe baana malanne ne gizayssa izi siyana mala geeshsha kiitanchay izas yootides” gida.