Hechos 10:3-22

³Na' goc c̱he', to ža do cheda šoṉe ble'edagüede' to angl beṉe' gwseḻa' Diosen' gwyo'e gan' zoe'na', na' anglen' gože'ne': ―Cornelio.

⁴Nach Cornelion' chṉa'chgüe' lao anglen' na' do chžebe' gože'ne': ―¿Bixen' X̱ana'? Nach gož anglen' ḻe': ―Diosen' ṉezde' can' zo' choḻ güižo'ne' na' chnežjo' dan' cheseyažje beṉe' yaše', na' Diosen' chaclaže' gaclene' le'.

⁵Da' nga gono' ṉa'a, gwseḻa' beṉe' šjasexi'e to beṉe' zoa ciuda Jopen' beṉe' le Simón na' ḻecze le' Pedro.

⁶Zoe' liž to beṉe' chonšagüe' yid. Bena' ḻecze le' Simón, na' liž ben' zoan cho'a nisdao'. Na' Simón Pedroa' ye'e le' bin' cheyaḻa' gono'.

⁷Cate' beza' anglen' Cornelion' goxe' c̱hope mos c̱he' na' to soldadw beṉe' chaclen ḻe', na' soldadoa' ḻecze chonxene' Diosen'.

⁸Na' Cornelion' bzejni'ide' ḻegaque' yogo'ḻoḻte can' goquen' nach gwseḻe' ḻegaque' Jopen'. Na' gosegüe'e nez zja'aque'.

⁹Na' beteyo gaḻa'ze ba zja'aque' za' yesežine' ciuda Jopen' cate' Pedroa' gwloe' yic̱hjo'o c̱he yo'o gan' zoe'na' ca do guagwbiž cont jeḻ güiže' Diosen'.

¹⁰Na' šlac choe'lene' Diosen' diža' gwdonchgüe', con goclaže' gagüe' cate. Na' šlac chac dan' gagüe'na', ble'edagüede' ḻe'e yaban' chetj to lache' xen na' nchej tap squinen na' chetjen gan' zoe'na'.

¹²Na' ḻo'enṉa' zjaže' yogo' cuen beyix̱e' že' yežlion', be žia tap ṉi'a na', na' be chososa' ḻe'eban' ḻo yo, na' len be žia x̱il be chaš ḻe'e yaba.

¹³Nach bende' gož Diosen' ḻe': ―Gwyas Pedro na' betw be ca' gwdagw.

¹⁴Nach Pedroa' gože'ne': ―Bi gagua' ḻegacba' X̱ana'. Ṉe tṉi'a biṉa' gagua' be zban zjanac ca', ḻe cbi de ḻsens len ley c̱heto'na' gagwto' ben' zjanac ca'.

¹⁵Nach Diosen' gože' ḻe' da' gwchope: ―Ben' bac̱h gwnia' gago' bi ṉao' be zban zjanacba'.

¹⁶Da' gwyoṉ ṉi'a gož Diosen' ḻe' ca' nach ḻa' begüete lachen' ḻe'e yaban'.

¹⁷Šlac chacžejlaže' Pedroa' bi zejen dan' ble'edagüeden', besežin beṉe' ca' gwseḻa' Cornelion' cho'a puert liž Simón ben' chonšagüe' yiden', ḻe ba goseṉabe' gan' zoa liže'na'.

¹⁸Nach zižje goseṉabe' še ḻe na' zoa to beṉe' ḻecze le Simón Pedro.

¹⁹Na' Pedroa' ṉe' chone' xbab c̱he dan' ble'edagüede', cate' gož Spiritw c̱he Diosen' ḻe': ―Simón, šoṉe beṉe' chesyeyiljue' le'.

²⁰Gwzoža' na' beyetj cont šejleno' ḻegaque', na' bi gacžejlažo' ḻa'czḻa' bi zjanaque' beṉe' Israel, ḻe neda' gwseḻa' ḻegaque'.

²¹Nach Pedroa' beyetje' jašague' beṉe' ca' gwseḻa' Cornelion', nach gože' ḻegaque': ―Nga zoa', nedan' Simón Pedro. ¿Bic̱hen' cheyiljwle neda'?

²²Nach gose' beṉe' ca' ḻe': ―To x̱an soldadw beṉe' le Cornelio gwseḻe' neto'. Ḻe' zejcze' chone' da' güen na' chonxene' Diosen' na' yogo'ḻoḻ beṉe' Israel ca' cheso'e xtiže' ca beṉe' šagüe' naque'. To angl c̱he Diosen' gože' ḻe' yedeṉabe' šejo' liže'na' cont gwzenague' c̱hio' še bin' yo'one'.