HADIBAIA TAUNA 7:16-27

¹⁶Unai dainai do oi kara maoromaoro auka herea lasi, bona aonega do oi tahua auka herea lasi, oi sibona do oi alaia garina. Oi sibona do oi alaia ena namo be dahaka?

¹⁷Ma danu, do oi kara dika herea lasi, bona do oi kavakava herea lasi. Badina oiemu nega do ia ore lasi neganai, do oi mase haraga, ena namo be dahaka?

¹⁸To inai ruaosi, kara maoromaoro bada, bona kara dika bada, edia huanai, mai aonega danu do oi raka lao. Badina bema Dirava oi gari henia neganai, ia ese oi do ia hanamoa.

¹⁹Aonega ese aonega tauna ia hagoadaia noho, vadaeni iena goada ese hanua lohia taudia 12 edia goada ia hereaia noho.

²⁰Kara maoromaoro tauna ta tanobada dekenai, be kara namo sibona ia karaia noho, a? Lasi momokani, ibounai ese nega haida kara dika do idia karaia diba.

²¹Taunimanima edia hereva ibounai do oi kamonai henia lasi, oiemu hesiai tauna ese oiemu ladana ia hadikaia neganai oi kamonai garina.

²²Badina oi be oi diba, nega momo oi ese haida oi hereva dika henia vadaeni.

²³Egu aonega dekena amo, inai gaudia ibounai lau tohoa. Lau gwau, “Lau ese aonega korikori do lau abia momokani,” to lau dekena amo aonega be ia daudau.

²⁴Mauri ena anina be dahaka? Daika ese mauri ena anina ia davaria diba? Ia be dobu herea, ita davaria diba lasi.

²⁵Unai dainai lau ese diba lau tahua, lau ese aonega bona idia vara gaudia ibounai edia badina danu lau tahua. Bona kara dika ena kavakava, bona kavakava danu edia anina lau tahua.

²⁶Vadaeni gau ta ena mamina ena dika, ese mase ena mamina ena dika ia hanaia. Unai gau be hahine ta, ia ese lalokau ia henia gwauraia, to ia be tarapu, o reke ta bamona. Bona iena imana ese oi do idia rosia, seini ese oi do ia kwatua bamona. Tau ta bema ia ese Dirava ia hamoalea neganai, ia ese unai hahine dekena amo do ia heau mauri. To kara dika tauna, be unai hahine ese do ia abia, bona guia.

²⁷Hadibaia Tauna ia gwau: Kamonai, inai laloa be lau davaria.