HADIBAIA TAUNA 3:1-17

¹Inai tanobada dekenai idia vara gaudia ibounai be mai edia nega korikori, bona kara ibounai danu be mai edia nega:

²Vara be mai ena nega, mase danu be mai ena nega. Hadohado danu be mai ena nega, geia danu be mai ena nega.

³Ala-ala danu be mai ena nega, gorere bona bero hanamoa be mai edia nega. Ruma kokia be mai ena nega, ruma haginia be mai ena nega.

⁴Taitai be mai ena nega, bona kiri be mai ena nega. Lalohisihisi be mai ena nega, mavaru danu be mai ena nega.

⁵Sihari kara be mai ena nega, sihari lasi danu be mai ena nega. Rosia kara be mai ena nega, rosia lasi be mai ena nega danu.

⁶Dirava ese gau ita davaria nega ia gwauraia noho. Bona gau do ita haboioa nega danu be ia ese ia gwauraia noho. Gau haboua negana danu ia gwauraia, gau negea negana ia gwauraia danu.

⁷Dabua darea negana, bona dabua turia negana danu idia noho. Regerege lasi dekenai ita noho be mai ena nega, bona do ita herevahereva danu be mai ena nega.

⁸Ura henia ena nega be ia noho, badu henia ena nega danu be ia noho. Tuari be mai ena nega, maino danu be mai ena nega.

⁹Iseda gaukara ena hekwarahi dainai, dahaka namo ita davaria noho?

¹⁰Dirava ese taunimanima dekenai gaukara metau herea ia henia, bona edia hekwarahi bada lau diba.

¹¹Dirava ese gau ibounai mai hairaina danu ia karaia. Edia hairai ena nega danu, be Dirava ese ia gwauraia. Ia ese gabeai do ia vara maurina do ita davaria ena ura, be ita dekenai ia henia vadaeni, to iseda lalona ia ese ia koua bamona, vadaeni ita ese Dirava ena kara ena anina ita davaria diba lasi.

¹²Unai dainai lau diba taunimanima edia dala namona tamona be inai: Do idia moale, bona idia edia mauri dina ibounai lalonai, kara namodia do idia karaia.

¹³Ita ibounai ese iseda gaukara ena anina do ita moalelaia, do ita aniani bona inuinu. Inai be Dirava ena harihari gauna.

¹⁴Lau diba Dirava ese ia karaia gaudia ibounai be do idia noho ela bona hanaihanai. Gau ta idia atoa kau diba lasi, bona gau ta idia kokia diba lasi. Dirava ese unai bamona ia karaia, taunimanima be iena vairana dekenai do idia gari totona.

¹⁵Idia vara vadaeni gaudia, bona do idia vara diba gaudia ibounai be guna idia vara vadaeni. Dirava ese ia havaraia vadaeni karadia, be ma ia karaia lou, karaia lou, nega ibounai.

¹⁶Ma inai danu inai tanobada dekenai lau itaia: Dagi bada taudia, edia gaukara korikori be, kara maoromaoro do idia karaia, to idia karaia lasi. Kara dika bada herea idia karaia. Edia kota hereva danu idia maoromaoro lasi.

¹⁷Lau sibona dekenai lau laloa, inai bamona: “Dirava ese kara maoromaoro bona kara dika taudia do ia kota henia maka tamona dekenai. Ia ese ia sibona ia gwauraia negana dekenai, ibounai edia kara do ia kota henia.”