Gutpela Sindaun 22:8-28

⁸Sapos man i mekim pasin nogut, bai taim nogut i painim em, na bai em i no inap mekim nogut moa long ol arapela man.

⁹Bikpela i save mekim gut long man i amamas long givim ol samting long ol arapela man. Long wanem, dispela kain man i save givim kaikai long ol rabisman.

¹⁰Rausim ol bikhetman na bai olkain tok pait na tok nogut i pinis.

¹¹Sapos man i laik i stap klin long ai bilong God oltaim, na sapos tok bilong en i gutpela, orait king bai i kamap pren bilong en.

¹²Bikpela i save was gut long olkain gutpela save, na em i save daunim tok bilong ol man bilong giaman.

¹³Lesman i save sindaun nating insait long haus. Em i save tok olsem, “Ating wanpela laion i stap long rot. Nogut mi go ausait na laion i kilim mi.”

¹⁴Meri bilong mekim trabel i save tok gris long man, na toktok bilong en i olsem wanpela hul i daun moa. Sapos Bikpela i laik bekim pasin nogut bilong wanpela man, orait em bai i larim dispela man i pundaun long dispela hul.

¹⁵Ol pikinini i save mekim olkain longlong pasin. Tasol sapos yu givim kanda long ol, bai ol i lusim dispela pasin.

¹⁶Sapos man i mekim nogut long ol rabisman bilong kisim ol samting bilong ol, o sapos man i givim presen long ol maniman, orait em yet bai i kamap rabisman.

¹⁷Nau mi laik skulim yu long toktok bilong ol man i gat gutpela tingting na save. Yu mas putim yau gut long dispela tok na tingting gut long en.

¹⁸Sapos dispela tok i stap long tingting bilong yu na yu inap long autim long narapela man, orait yu ken belgut.

¹⁹Nau tasol mi laik autim dispela tok, bilong yu yet i ken harim, na bai yu ken bilip tru long Bikpela.

²⁰Mi bin raitim 30 gutpela tok bilong skulim yu gut na givim gutpela tingting na save long yu.

²¹Olsem na bai yu ken save as bilong tok tru. Na taim ol man i salim yu i go bilong painimaut wanem tok i tru, bai yu inap painimaut na bekim tok stret long ol.

²²Yu no ken ting ol rabisman, ol i man nating tasol, na yu pulim nating ol samting bilong ol. Na sapos ol i kamap long kot, orait yu no ken mekim kot i daunim ol,

²³long wanem, Bikpela bai i sambai long ol na helpim ol. Na sapos man i mekim nogut long ol rabisman, orait Bikpela bai i mekim nogut long em.

²⁴Yu no ken pren long ol man bilong kros kwik na bilong pairap nabaut.

²⁵Nogut yu kisim pasin bilong ol na bihain ol samting nogut i bagarapim yu.

²⁶Taim wanpela man i kisim dinau, yu no ken promis long bekim dispela dinau sapos em yet i no inap.

²⁷Nogut yu no inap bekim, na bai ol i kam kisim olgeta samting bilong yu, na bet bilong yu tu.

²⁸Yu no ken surikim mak bipo ol tumbuna i bin putim long graun bilong yu.