Godigo Nogi Ugwaba Sabo Tęąbi Po Wabo Buku Dabe 34:1-16

¹Devit te Abimelek dali bidiyu, tama Abimelekigo aga elidali weyu, aga te wabo pabo bidi tiwai bilibaso, tama te Abimelekgo aga sela sąwani. Te Devit pelama, nosali tama te e balia po asęai dao. 1 Sml 21:13-15 suao. Te eno Godiba usu da weyu, gedu haluasa po weyu, tama eno aga nogi sesemane sogo ugwaba sobao.

²Te Godigo ena tau sali homu elama, tama eno agaba wiegi yai homu pemene ebo dao. Te sęgę tolobo we bidi augwa te po odama, tama augwa bugai homu mu emainao.

³Dago te Godigo genuai nogide po pusubao. Dago agai nogi ugwaba sao.

⁴Eno te Genuai Bidiba usu da weyu, te ena tau somainu gedu haluasa po wali, tama agai eno gedu haluasa po wabo odali. Agai te eno homude wi ebo tigidali sela sąnama, tama megi da, ena haliga nagame yai bidibao.

⁵Te tigidali we bidigo sęgę elaluali, tiali goli te augwa Genuai Bidiba konealubo homu dąų weyu, te augwa wiegi yai homu pemene yaibao. Tama tiyu, te augwa konealubo homu dąų wali te me dolobeo, augwali tede hale munu me egobeo.

⁶Te sęgę elalubo bidi dabego te Genuai Bidiba gedu haluasa po obaso, tama agai te augwaligo gedu haluasa po wabo odolama, tama augwa te tigidali sęgęde te augwali tau sali.

⁷Te Genuai Bidigo mobo bidi ensel te Genuai Bidi dologoba pelama bidibo we bidi dabe pąde bidiyu, tama agai augwali tau sobaso, te augwali me dologobeo.

⁸Genuai Bidigo wiegi yai kolesaga dabolo ebo dao. Duga digi te usu bugagia selama, suiąo, tama te dagego koneyu, te Genuai Bidi wiegi yai mu da waibao. Te Genuai Bidiba konealubo homu dąų mu wabo bidigo da, aga te bugai haliga mu elama bidaibao.

⁹Te Genuai Bidigo we bidi dabe, dage te aga dologode bidao. Magi baso meni, te aga dologode bidibo bidi dabe da, te augwali magi nai deli me sǫą pogobeo.

¹⁰Awe, te boma pai ogwa bidi laion dabe me sogo te bulu hasa dabe sǫą peyu, tama augwali nasi eyu, augwa bomo kimi isaibao. Tiali goli, te Genuai Bidi wali pabo we bidi dabe da, augwali te wiegi yai nai dabe me sǫą pogobeo.

¹¹Te dage konea sabo homu ebo bage, dage aselama, tama eno poba olo bugagia muagasao. Eno dage ola menama, tama dage te Genuai Bidi dali wi eyu, aga dologode sesemane bidimainu yaibao.

¹²Magi ebowe, te nago homugo te nago bidibo ula bugagia pedalumainu homu ebawe? Tama nago homugo te nago bidibo ula te sesabi elama bidimainu eyu, tama nage te bugagia bidiyu, te wiegi yai pemene yabo homu ebawe?

¹³Te homu nago wei eyu, godolo ebaso da, teda nago te po dwai me wagio, tama nago tibo po me olamuo.

¹⁴Tama nago te dwai kolesaga ebo te tudiba muao, tama wiegi yai kolesaga naga wali pao. Nage te gasa we bidi dabe dali te bugagia bidabo sunumi gegeyu, tama te sunumi naga dolo wali pao.

¹⁵Genuai Bidigo te doloba pai bidi dabe tonalubao, tama agai te augwaligo usu da weyu, gedu haluasa po wabo odobo dao.

¹⁶Tiali goli, agai te dwai sę ebo bidi dabe wei isiąyu, tudi ola mabo dao. Tama agai te augwali ela muyu, tama te we bidigo augwali homu kone ma egobeo.