Kap 34:1-16

¹Dewit Abimelek gat egek topmon da ŋugɨgɨ dagaŋban Abimelek da yolban kɨgɨt. Kɨŋek kap on mandagɨt. Nak Yawe aŋkɨsikeŋ. Bɨsapmɨ bɨsapmɨ mani aŋkɨsikeŋ.

²Yawe da aŋpulugagɨt do nandaŋek mani aŋenokgeŋ. Jɨgɨni toŋ amɨn da uŋun do nandaŋek but galaksi nandani.

³Yawe dakon man madepni do yaŋek aŋkɨsineŋ.

⁴Yawe da nak aŋpulugosak do bɨsit iyɨko nandagɨt. Pasol pasolno wɨrɨrɨkban but yawot pagɨm.

⁵Yawe nandaŋ gadaŋ ɨmaŋ amɨn kɨsɨk kɨsɨk aŋek mayagɨ dɨma nandaŋ.

⁶Nak jɨgɨkon egek Yawe do yaŋ tɨdoko bɨsitno nandaŋek jɨgɨ morapnokon naŋ pulugaŋ nepgut.

⁷Yawe dakon aŋelo da Yawe do pasal ɨmaŋ amɨn da kapmatjok egek yokwikon baŋ paŋpulugosok.

⁸Yawe aŋkɨlɨk koni, uŋun tagɨsi. Paŋkutnosak do kwaŋ amɨn uŋun kɨsɨk kɨsɨk tagɨ ani.

⁹Mɨŋat amɨn kabɨyoni ji Yawe do pasal ɨmni. Nido pasal ɨmaŋ amɨn uŋun yo kɨnda do wadak wadak dɨma aŋ.

¹⁰Laion da jap do aŋ, mani Yawe wɨsɨŋ kok do pi aŋ amɨn uŋun yo tagɨsi do wadak wadak dɨma aŋ.

¹¹Mɨŋat monjiyono, abɨŋek mɨrak yopgut. Apba Yawe do pasol pasol ani do dayɨŋ dekgo.

¹²Ji mɨktɨmon bɨsap dubagɨ egek egɨp egɨp tagɨsi egek kɨsɨk kɨsɨk ak do nandaŋ?

¹³Yaŋ egɨp do nandaŋ kaŋ, ji gen yokwi dɨma yoni, ae top gen dɨma yoni.

¹⁴Ji aŋpak yokwi manji yomɨŋek aŋpak kɨlegɨsi gɨn ani. Amɨn gat but kaloŋ aŋek egɨp do pini si teban taŋek ani.

¹⁵Yawe uŋun amɨn kɨlegɨ kɨlani aŋek bɨsitni nandaŋ yomɨsak.

¹⁶Mani yokwi aŋ amɨn dɨma galak taŋ yomɨsak. Kɨmagakwa amɨn da ɨŋtaŋ yomdaŋ.