Gesami Hea:su 79:2-11

²Ilia Dia fi dunu ilia bogoi da:i hodo amo sia sioga moma:ne, yolesi. Amola Dia hawa: hamosu dunu ilia bogoi da:i hodo amo sigua ohe fi ilia moma:ne, yolesi.

³Ilia Dia dunu ilia maga:me amo hano agoane soga:digima:ne hamosu, amola maga:me da hano agoane Yelusaleme ganodini aiasi. Amalalu dunu afae da amo bogogia:i dunu uli dogonesisimu hamedafa ba:i.

⁴Nini beba:le fifi lai ilia da ninima gadele sia:daha, amola ilia da niniba:le oufesega:sa, amola ninima higale ba:sa.

⁵Hina Gode, Di da ninima mae yolele gebewane ougi dialoma:bela:? Dia ougi hou amo da lalu agoane mae yolele nenanoma:bela:?

⁶Di da delegili gale, Dia ougi hou amo fifi asi gala Dima hame nodone sia:be amola Dima hame sia:ne gadobe dunu, amo ilima ima.

⁷Bai ilia da Dia fi dunu fane lelegei amola ilia da Dia soge amo wadela:le gugunufinisi dagoi.

⁸Ninia aowalali ilia wadela:i hou hamoi amoga ninima se dabe mae ima. Ninima waha asigima. Ninia dafawane hamoma:beyale dawa:su da fisi dagoi.

⁹Gode! Nini fidima, amola nini gaga:ma. Dunu da Dima nodone dawa:ma:ne, ninia wadela:i hou hamoi amo Dia gogolema:ne olofoma.

¹⁰Abuliba:le fifi asi gala da ninima agoane adole ba:ma:bela:? “Dilia Gode da habila:?” Fifi asi gala dunu ilia da Dia hawa: hamosu dunu fane legeiba:le, ninia ba:ma:ne, Dia ilima se dabe ima.

¹¹Se iasu diasu sali dunu ilia gayasu amo nabima! Ilia da se imunusa: fofada:i dagoi. Be Dia gasa bagade hou amoga ilia se iasu diasu logo doasima.