Mboe 79:2-11

²Mi tipun zin mbesooŋo ku ma timetmeete, mi tizem zin uri tana ma timbotmbot sorok, bekena tiwe man kan buzur. Tana wal ku ta tiurur lelen pu mi titoto mbulu ku, ta tiwe koroŋ saŋsaŋŋan kan buzur be tikan.

³Koyam koi bizin tikas yam ma siŋ tiam ireere kembei ta yok ma irao pa Yerusalem. Mi tomtom sa imbot be itwi zin uri tana na som.

⁴Tana zin karkari ta timbot kolouŋana piam na, tire yam mi tirepilpiili yam. Mi tikamam ŋeu piam, mi tizeŋzeeŋge piam, mi kwon pasomsom yam.

⁵O Yooba, parei? Ko ketem malmalŋana ku imbotmbot se tiam ta kembei ma alok? Ko motom mburmbur men, mi lelem ibayou kembei ta you, mi iseeŋge iseeŋge ma ila?

⁶Liŋ ketem malmalŋana ku ma isalakaala zin karkari ta tiute u som na. Zin wal ta timbesmbeeze pu som na, ur kadoono pizin.

⁷Pa niam ta wal ku na, zin tipambiriizi yam ma amap. Mi tipasaana toono tiam taiŋgi ma koroŋ sa imbot ambai mini som.

⁸Sanaana ta niamŋan tumbuyam bizin amkamam na, motom iŋgalŋgal pepe. Mi ka kadoono ise tiam pepe. Lelem isaana piam, mi loŋa mar mi uulu yam. Pa iŋgi amsaana kat.

⁹Anutu, nu ta tuyam ŋonoono. Uulu yam lak! Naso zom iwe biibi. Yooba, tatke yam pa pataŋana taiŋgi mi reege sanaana tiam. Pa nu zom biibi pa mbulu ta kembei.

¹⁰Tana uulu yam: Kokena zin karkari tikam sua repiiliŋana piam ma tisombe: “Aa, Anutu tiom mburaana iŋgoi?” Anutu, zin karkari ta tikazas sorok zin mbesooŋo ku ma siŋ kizin ireere na, leleyam be pokot mbulu kizin tana ma amre kat pa motoyam. Naso zin tiute ta kembei: Nu urur kadoono pa mbulu sananŋan.

¹¹Ŋgun talŋom pa tiŋiizi kizin wal ku ta tikoki zin ma timbot la kan koi bizin naman na. Nu mburom biibi. Tana swe mburom tana, mi kamke zin wal ku ta kan koi bizin tisombe tipun zin ma timetmeete na.