Gesami Hea:su 45:3-8

³Hina bagade! Dia gegesu gobihei sanawene idiniginisima! Di da hadigi amola bagadedafa.

⁴Hosi fila heda:le, gasa bagadewane hasalimusa: masa! Dafawane hou amola moloidafa hou noga:le ouligima. Di da gasa bagadeba:le, ha lai dunu bagohame hasalimu.

⁵Dia dadi da agesoi noga:idafa. Ilia da Dia ha lai ilia dogo sosa. Fifi asi gala dunu da Dia emo bega: dafamu.

⁶Gode da Dima Hinadafa Hou i dagoi. Amo da eso huluane mae yolele gebewane dialumu. Dia da moloidafawane Dia dunu ouligisa.

⁷Di da noga:idafa hou hanasa amola wadela:i hou higasa. Amaiba:le, Gode (Dia Gode) da Di ilegei dagoi. Amola E da Dima hahawane hou (amo da eno hina bagade ilia hahawane hou baligisa) bagadedafa i dagoi.

⁸Dia abula amoga ‘me’ amola ‘a:lousi’ ilia gabusiga: da naba. Hina bagade diasu gaguli gagai ganodini (‘aifoli’ amoga nina: hamoi) gesami hea:su amola baidama dusu dunu ilia da Di nabima:ne hea:lala.