Gesami Hea:su 27:3-10

³Dadi gagui dunu wa:i da na fane legemusa: eale sisiga:le disisia, na da hame beda:mu. Amola nama ha lai dunu da na doagala:sea amolawane, na da gebewane Godema dafawaneyale dawa:lalumu.

⁴Na da Hina Godema liligi afae fawane adole ba:i. Na da liligi afae fawane hanai gala. Na hanai amo da, Na da eso huluane esalea, Hina Gode Ea diasu ganodini esalumu na da hanai. Na da amogawi ea noga:idafa hou amoma fofogadigili nodone ba:mu, amola Ema E da Ea hou nama olelema:ne adole ba:mu.

⁵Bidi hamosu esoga, E da na ougihalesimu. E da na Ea Debolo diasu ganodini gemu. Amola magufu sedade, amo da:iya E da na gemu.

⁶Amaiba:le, na da nama ha lai dunu nama eale sisiga:le disibi ili hasalimu. Na da nodone wele sia:nanawane Hina Gode Ea Debolo diasu amo ganodini Ema gobele salasu hamomu. Amola na da Hina Godema gesami hea:mu amola nodone sia:mu.

⁷Hina Gode! Na da Dima wele sia:sea, na wele sia:be nabima! Nama asigiba:le, na sia: alofema!

⁸Di da nama, “Nama nodone sia:ne gadola misa!” amane sia:noba, na da bu adole i, “Hina Gode! Na da misunu!

⁹Di da nama mae wamoaligima!” Nama mae ougima! Na da dia hawa: hamosu dunu. Dia na hamega mae fisiagama. Di da na fidisu dunu galu. Gode, na Gaga:sudafa! Na mae yolesiagama!

¹⁰Na ada amola ame ela da na gogolesa ganoma:bela:? Na hame dawa:. Be Hina Gode da na noga:le ouligimu.