Sam 27:3-10

³Pana mae varidikue nau rina qua kana ba lopu matagutu si rau; be mae rapata nau sa qeto minate varipera, ba kaqu raṉea rau sa Tamasa.

⁴Keketoṉa mo si tepa ia rau koe Zihova, asa tugo si kaqu hata zoṉazoṉa ia rau; pude maqu somana koa si rau pa Zelepade te Zihova ninae rane pa qua tinoa, pude maqu dogoria, na magasa nia sa Nana tinolava meke lulia sa nana hiniva.

⁵Ura pa korapa totoso tasuna si kaqu va aqorau Sa, kaqu tome au Sa pa korapa Nana Zelepade, meke kaqu va hake au Sa pa patu hihiu.

⁶Gua asa, ke kaqu koa mataqara holani rau sari na qua kana pa vari likohaequ. Meke kaqu va vukivukihi nia rau sa vinukivukihi vinahesi meke kaqu velavela pa qinetuqetu pa Nana Zelepade hope, Kaqu kera vahesia rau se Zihova!

⁷Mu avoso mae au, Zihova, pana varavara atu rau! Tataru nau, Mamu olaṉia sa qua tinepatepa!

⁸Sipu zama si Agoi, “Mu hata Au,” si olaṉa atu sa buloqu, “Korapa hata Igo rau, Zihova.”

⁹Mu lopu va paere pule nigo koa rau! Lopu bugoro nau! Mu lopu gala pani au sa Mua nabulu. Visoroihe si ele toka nau tugo Goi, ke Mu lopu kilu au na luara pani au, Mu lopu koa va seu koa rau, ke Tamasa, qua Hinarupu!

¹⁰Be veko pani au rina tiatamaqu, ba Agoi Zihova mo si kaqu kopu nau si rau!