Föför 7:5-40

⁵Kot esap ngeni Apraham och kinikin me lon ei fanü pwe epwe fanüeni, sap mwo nge ükükün chöchön eu chök ipw. Nge Kot a pwon ngeni, pwe i me mwirimwirin kana repwe fanüeni ewe fanü. Lon ewe fansoun Kot a eäni ei pwon, esamwo wor nöün Apraham.

⁶Iei usun met Kot a üreni, ‘Mwirimwirum kana repwe wasöla lon eu fanü esap fanüer, ia aramas repwe nöüniir amanau me ie. Ikenan repwe küna riaföü lon ükükün föpükü ier.

⁷Nge ngang üpwe apwüngü chon ewe fanü repwe angang ngeni. Iwe, mürin repwe towu seni ewe fanü o fel ngeniei me lon ei leni.’

⁸Mürin Kot a ngeni Apraham ewe angangen sirkomsais, pwe epwe eu asisilen ewe pwon lefilen Kot me ekewe aramas. Iei mine Apraham a sirkomsaisi Isaak lon awaluen ränin mürin an uputiu, Isaak a sirkomsaisi Jakop, nge Jakop a sirkomsaisi nöün kewe engol me ruoman mwän, ir ach kewe lewo mi fokun iteföüla.

⁹Iwe, nöün Jakop kewe mwän ra lolowo ngeni pwiir we Josef, pwe ra amömöla an epwe eman amanau lon Isip. Nge Kot a eti i

¹⁰o amanaua seni an kewe riaföü meinisin. Iwe, Kot a ngeni Josef mirit o atufichi i pwe epwe küna chen me ren ewe kingen Isip. Iei mine Farao a seikätä i pwe epwe wiseni ewe wisen kepina lon unusen Isip o nemeni imwan kewe meinisin.

¹¹Mürin a fis eu lengita lon unusen Isip me Kanaan mi afisätä riaföü watte. Ach kewe lewo resap tongeni künökün aner mongö.

¹²Iwe, lupwen Jakop a rong pwe mi wor mongö lon Isip, a tinala ikenan nöün kewe mwän, ir ach kewe lewo, lon aeuin ar sai.

¹³Lon aruuen ar sai ngeni Isip, Josef a pwäri i ngeni pwiin kewe o ewe kingen Isip a rongorong usun än Josef we famili.

¹⁴Iei mine Josef a tinala pworaus ngeni saman we Jakop o üreni pwe i me unusen an famili, irfengen meinisin ükükün fik me limman repwe feito Isip.

¹⁵Mürin Jakop a saila Isip. Ikenan i me nöün kewe mwän ra mäla.

¹⁶Iwe, somäär kewe ra uwato Sikem o peiaseniir lon ewe peias Apraham a möni seni nöün Hamor kewe mwän.

¹⁷“Lupwen a arap ewe fansoun pwe Kot epwe apwönüetä an we pwon a eäni ngeni Apraham, iteiten ach kewe aramas mi nom lon Isip ra fokun chomongola.

¹⁸Mürin eman king mi fö esap silei usun Josef a seikitä, pwe epwe nemeni Isip.

¹⁹Ätewe a rawangauei ach kewe lewo o ariaföüür, a pöchökül ngeniir ar repwe pöütala nöür mönükol, pwe repwe mäla.

²⁰Lon ena fansoun Moses a uputiu, i eman mönükol mi fokun äteöch. Inan a tümwünü lon imwan lon ükükün ülüngat maram.

²¹Nge lupwen a uwala lükün, nöün Farao fefin a mwüti o foleni pwe epwe wesewesen nöün.

²²Iwe, Moses a kaiö tipachemen chon Isip meinisin, a fefeitä lon an lipwäköch le kapas pwal lon an föför.

²³“Lupwen Moses a ierini faik, a filätä pwe epwe pii pwiin kewe chon Israel lon met a fis ngeniir.

²⁴Iwe, a küna eman re Isip mi wichi eman re Israel, iei mine a feila rer pwe epwe peni ewe re Israel, iwe, a niela ewe re Isip.

²⁵Moses a ekieki pwe püsin aramasan repwe weweiti pwe Kot a mochen nöüni i pwe epwe angaseerela, nge ir resap wewe ren.

²⁶Sorotän ewe rän a küna pwe ruoman re Israel ra fiufengen. Iwe, a sotuni an epwe awora kinamwe lefiler o a üreniir, ‘Ätekanan, ämi pwipwi, pwota oua fiufengen lefilemi?’

²⁷Nge ewe eman mi wor an mwäl ngeni ewe eman a ofochokuw Moses o a aisini, ‘Iö a seikuketä pwe kopwe samol me soukapwüng wom?

²⁸Ifa usun, ka pwal mochen nieila usun om ka niela ewe re Isip nanew?’

²⁹Lupwen Moses a rong ekei kapas, a sü seni Isip o a feila nonom lon ewe fanü Mitian. Ikenan pwülüan a nöüni ngeni ruoman ät.

³⁰“Iwe, mürin faik ier eman chon läng a pwä ngeni Moses lon pulopulen ekkei seni lon efoch iräfölüföl me lon ewe fanüapö arap ngeni ewe Chuk Sinai.

³¹Moses a mairü ren met a küna. Lupwen a feila arap ngeni ewe iräfölüföl pwe epwe nenengeniöchü, a rongorong mwelien ewe Samol:

³²‘Ngang än om kewe lewo we Kot, ngang än Apraham, Isaak me Jakop we Kot.’ Iwe, Moses a chechech ren an niuokus, pwe esap tongeni nenengeni ewe mettoch.

³³Mürin ewe Samol a üreni Moses, ‘Kopwe pwilitawu ipwom sus, pun ei leni ka ütä won a pin.

³⁴Üa küna ewe riaföü mi watte a fis ngeni nei kewe aramas lon Isip. Üa rongorong ar ngüngü o üa feila pwe üpwe angaseer. Kopwe etto iei, ngang üpwe tinukela Isip.’

³⁵Moses ätewe mi fen koput me ren ekewe aramasen Israel, ätewe ra aisini, ‘Iö a seikuketä pwe kopwe samol me soukapwüng wom?’ Iei i ewe eman Kot a tinala pwe epwe nemeni ekewe aramas o angaseer ren än ewe chon läng alilis, ewe mi pwä ngeni lon ewe iräfölüföl mi ngetenget.

³⁶Moses a emwenawu ekewe aramas seni Isip, a föri manaman me asisil lon Isip, arun ewe Setipar, pwal lon ewe fanüapö lon ükükün faik ier.

³⁷Moses ätewe mi üreni ekewe aramasen Israel, ‘Kot epwe tinala remi eman soufos usun chök ngang, i epwe eman me lein püsin aramasemi.’

³⁸I ätewe mi eti ekewe aramasen Israel le mwichfengen me lon ewe fanüapö. A nom ikenan ren ach kewe lewo, pwal ren ewe chon läng mi kapas ngeni me won ewe Chuk Sinai. Iwe, a angei än Kot kapas mi manau pwe epwe asile ngenikich.

³⁹Nge ach kewe lewo resap fokun mochen aleasochisi. Ra oputa i o lon letiper ra mochen liwinsefäliti Isip.

⁴⁰Iei mine ra üreni Aaron, ‘Kopwe föri ngenikem eman uluulun kot epwe emwenikem. Pun äm aisap silei met a fis ngeni Moses, ätewe mi emwenikeemiwu seni Isip.’