Acts 7:5-40

⁵Ba God kega tano tupana kona tanona yoginaikei i berei iti buderiyei. Saba bagunai wata kona maranai, Abraham kega ere natuna, ba God i kaobiyoyobani kata mara murinai am rakaraka tanona iti karisi yai.

⁶Ba God nikasike i sisiya kurina i wona, ‘Mara murinai am rakaraka wai kupura tumanai sina mana, sini moyaka damana ba sini kamyosukusuku yepo bodu 400 rubana.

⁷Nakosi kupurai ko bosaibisaibirisi ba te bogoyoimi wai, ani buibuiyisi. Ba kona murinai am rakaraka namai sina kasibau wai niko kupurai sina bo pepetiku.’

⁸Ba kona maranai Abraham sini bonaina kairavina God bidamanina maragasina i berei. Ba Abraham natuna sebare Isaac itupuwa ba kao 8 kamonai ba sinina si bonai. Muri yai Isaac natuna Jacob i tupuwa wai yebo sinina si bonai, ba Jacob natunatuna asi 12 yebo sinisi si bona.

⁹Jacob natunatuna mutusi Joseph si nuwarauwei wai, si gimonei Egypt biyisi kurisi kata kasi bo saibisaibira. Saba God wai kona yabata.

¹⁰Kona kairavina goyonai i taraparanei ba kuira ba nuwasuya gaigairesi i berei. Kata i baisisi wai Egypt asi taupauma Pharaoh nuwanuwana i yauni wai Joseph i wosei Egypt kupurina tupana ba yebo ana yove yabata i badei.

¹¹Damanina ba gomara kaikapona Egypt ba Canaan kupurisi i ravi, wai bokwarakwara i rakata saki wai Joseph ana rakaraka kega memena kam sita panani.

¹²Ba maranai Jacob i nonori kata Egypt kamonai kam i mamana wai natunatuna i porasi kam sita gimoni.

¹³Asi wagawaga biruwaina murinai wai Joseph tuwatuwana i wonisi kata kona wai kotoi, ba yebo ana rakaraka Pharaoh i kaobibeyisi.

¹⁴Nikona murinai, Joseph wara i porai tamana Jacob ba ana rakaraka ereonowana, asi 75 kurisi kata sita botu ku Egypt.

¹⁵Damanina ba Jacob ana rakaraka yabata si gakira ku Egypt ba, namai i rabobo ba muri yai ereonowasi yebo si rabobo.

¹⁶Ba tupuvisi si yauna si veramaga ku Shechem ba, Abraham gawara mane yai Hamor natunatuna gwabisi yai i gimoni wai namai si doguisi.

¹⁷Ba marana i neratui God ana kaobiyoyobana ita wosei Abraham kurina wai, ata pipiya Egypt kamonai wai asi koroto i rakata saki.

¹⁸Damanina ba taupauma wauna kesana kega Joseph i kuiri wai, kona Egypt yai i bada.

¹⁹Kona taupaumina wai pipiya ibi tupaubuwanisi ba pepeya si tuputupuwa wai tutunusi i kao tupetupenisi kata sita tere kasibuwana yove kupusi yai sita rabobo.

²⁰Ba kona maranai wai Moses i tupuwa, ba God matanai wai kona kega pipiya mom. Ba nawaravi tonu tutununa si bunibuniyei.

²¹Ba maranai si tere kasibuwei ku okowa wai, Pharaoh natuna wasike i yauni i natunei ba i potai i rakata.

²²Moses wai Egypt biyisi asi kuira ba nuwasuya si beyebeyei wai i maragata saki wonai ba wose yai.

²³Ba Moses kana bodu 40 i yauni wai i nuwasuya kata ita nae turaturana Israel biyisi ita kinanisi.

²⁴Ba i kinani kata Egypt biyina kwainana kesana Israel biyina i raviravi, wai i nae i baisi ba Egypt biyina i kasibunui.

²⁵Ba Moses i nosi bage ana pipiya damana, nikona sita kitai wai sita kuiri, kata kona God i porai Israel biyisi iti baisisi ba saba kosi kega si kuiri.

²⁶Ba mara i tom mena wai Israel biyisi asi ruwamo si birauwa, wai Moses ana waina iti gesisi wai, i wona, ‘Awaika kairavina tuwateim kosi ko birauwa?’

²⁷Saba sebare kotoi kokona i dagui wai, Moses i rubokoini ba i wona, ‘Kotoi bibadana i berim kata kuni badikai ba kuni buibuiyikai?

²⁸Am waina rabirabi Egypt sebare ku kasibunui wai rautainina kuna kasibunuiku?’

²⁹Damanina Moses nikona i nonori wai, i vera ku Midia i pipiya tumana, ba namai i mana ba i tuwa natunatuna sebasebare ruwamo.

³⁰Bodu 40 si kakaba murinai, Sinai koyana parinai, kupura momnai, garagara kai karakarasina kamonai aneya i rerematara Moses kurina.

³¹Moses i kinakinani wai, i sikwanana neganega, ba i nae ku gwabina ita kita kabitamni, saba Bada God gamona i nonori, i wona.

³²‘Yauku tamatamami, Abraham, Isaac ba Jacob asi God.’ Ba Moses i nonori wai i nagara saki ba i kiroro wai kega i kinana kurina.

³³Bada i wona, ‘Menena ke bimsiri wai gawara kaobaisiyena, kam kae sumasuma ke botavetaveyana.

³⁴Ba Yauku au pipiya Egypt kamonai asi siniyara, ba bokwarakwara a kinani, ba asi tou a nonori, wai a gakira ana tombaubaunisi. Ba karaku nina ke nonora, kata ani poraim kuna veramaga ku Egypt.’

³⁵Niko Moses kesanina, Israel biyisi wonana si sinikikiyei, si wona, ‘Kotoi i terim bada wai kuni bibuibuiya?’ Saba God ikesina Moses i porai asi bada ba kasi biyawasina, aneya keyama kai karakarasina kamonai i rerematara wai ana bibaitai.

³⁶Matakira ba kiyakiya i wose murinai. Ana pipiya Egypt kamonai i urabakasibauvisi, Enaga Taratarana si garubonei, ba bodu 40 kupura mominai i boneubuvisi.

³⁷Niko Moses Israel biyisi i wonisi, i wona, ‘God wai karaku wata komi kamomi yai peroveta kesana yauku rautainiku ini porai.’

³⁸Ba Israel biyisi kupura mominai si gaenisi wai kona namai kamosi yai tutunuta yabata, ba aneya i sisiya kurina Sinai tepanai ba wona yawayawasina i yauni kata ita kaoberita.

³⁹Saba tutunuta si totoyana wai si kaosaira. Ba asi waina sita veramaga ku Egypt.

⁴⁰Ba Aaron kurina si wona, ‘Tarabibisaka ke wosei, ama god kata ini naovikai. Ba kega ka kuiri kata awaika i tupuwa niko sebare Moses, Egypt yai i urabakasibauvi kai wai kurina.’