Aposolo Jaŋere Binaŋ 7:5-40

⁵Jowa warerâ mâreŋ mi qikiŋnecneme rauckewec, aricne, moc mi râcne huŋgaŋke‐jâmbâŋkewec. E â ɋâricfâc‐ticne ʒâhec rauckeniŋte biŋe sawa qacnewec. I ɋâric tâmiric juha sifu iŋuc mucnewec.

⁶Ehuc Anutuzi dâŋ moc ʒiŋuc muwec: ‘Ɋâricfâcge jaŋe jara 400 mâreŋ furune mocko jaba juhuc kiŋaŋ qaqa erâ sisi hâhâŋ faio junʒoŋgopieŋ.’

⁷Erâ dâŋ moc ʒiŋuc ʒuhuckerâ muwec: ‘Kiŋaŋ qaqafâc‐jeŋic bacjopaniŋmu ŋic i okacne jarepe ɋâricfâcge râec‐jopapie mâreŋ kecʒira warerâ no kiŋaŋ qanarehuc junʒoŋgopieŋ.’

⁸Eme Abraham e ɋâricfâc‐ticne ere biŋe qacjopahuc sahac‐jeŋicko ma baocte mucnewecte ŋokâ‐ticne Isaka fuarâ fohame ʒoaŋ gie bapa 8 eme iŋuc hâcne ecnewec. Eme Isakazi Jakobo bâfuawec, â Jakobozi mimiŋnefâc‐nâŋec 12 bâfuac‐jopawec.

⁹“Eme mimiŋnefâc‐nâŋec jaŋe ɋajeŋic Josefe iiŋguuŋ ecneku moneŋte qikiŋnepie Aigita mâreŋko barambiŋ. Ira ra juhame Anutuzi ehec juhuc

¹⁰ʒârâ hâriŋ faionec batararâ jauŋ â miti tahackecneme Aigita ŋicwofuŋ Farao eki hone biaŋkerâ e jahacne fic hae â Aigita ŋicfâc‐ticne mâmâc soŋaŋ‐jopahuc juocte ŋicbomboŋ sâko âkendâŋnewec.

¹¹Âkendâŋneme juhame roroc fuarâ Aigita â Kanaaŋ mâreŋko qarâ suriŋkerâ fome hae mâreŋ hâŋkewec. Eme mimiŋnefâc‐nâŋec jaŋe nânâre hâmohuc jumbiŋ.

¹²Eku Jakobo e, Aigita mâreŋko nânâ fokac, iŋuc mupie manarâ ŋokâfâcne sorec‐jopame ira rambiŋ.

¹³Eme harierâ mocwâc rapie Josefezi hahacfâc‐ticne fuŋne‐ticne mutaniŋke‐jareme Faraozi fufua‐ticnere fuŋne wâc manawec.

¹⁴Eme Josefezi mume mamac‐ticne Jakobo â wiacfâc‐ticne sasawa, ŋic ŋokac 75, amec‐jopa rambiŋ.

¹⁵Eme Jakobo e Aigita mâreŋko rarâ juku hâmowec â ŋokâfâc‐ticne mimiŋnefâc‐nâŋec jaŋe iŋuc jaha hâmo‐fârembiŋ.

¹⁶Hâmopie qâŋɋâŋfâc‐jeŋic Sikemko bacjopa warerâ, Abrahamzi Sikem haeo Hamorore ɋâricfâc jaŋeraonec mâreŋ moc ʒâŋeruŋte biŋe moneŋzi furine bawec, ira ducjopambiŋ.

¹⁷“Eme Anutuzi Abraham dâŋbiŋe qacnewec i sanaŋkeocte dameŋ bembeŋkezo ehame jaŋe Aigita mâreŋko mâretec sawe mâririackembiŋ.

¹⁸Iŋuc ehuc juhapie Aigita ŋicwofuŋ furune moc fuawec eki Josefe kâuc bawec.

¹⁹Eme ŋicwofuŋ eki hâcne mimiŋnefâc‐nâŋec doc bacjopahuc sipiric‐jopawec. Ehuc mume ɋâricfâc‐jeŋic behec‐jopapie hâmocko rafârembiŋ.

²⁰Dameŋ ira hâcne Mose fuawec. Motec e Anutuzi honeme biaŋne jâmbâŋ ewec. Eme mamac‐ticnere ficko soŋsoŋ barâ juhapie mosa jahec â moc ewec.

²¹Eku behepie Farao otâ‐ticnezi bâfuarâ motec bawec.

²²Eme Farao ŋicfâc‐ticne jaŋe Aigita ŋic jaŋere mamana sasawa qazucnepie mana sanaŋkerâ wiac mume bame bipinehec ewec.

²³“Juku jara‐ticne 40 bazurâ Israe ŋic âgofâc‐ticne hone manac ejareocte maŋne afeckeme rawec.

²⁴Rarâ Aigita ŋic moczi Israe ŋic moc qame honerâ âgo‐ticne ŋezickehuc Aigita ŋic hâmocne qawec.

²⁵Ehuc muwec, no âgofâc‐nane Faraore meonec batarac‐jopapemurâ Anutuzi gie bakac i mana taraniŋmu. Eme jaŋe ine mi mana tarambiŋ.

²⁶Eme hae fureme mocwâc rarâ Israe ŋic jajahec qaqac ehapire bâfuac‐jofarâ mu bârâwiŋ ejactehuc ʒiŋuc jasawec: ‘Ŋic jahec, ŋohe ââgozi wemocte rârâsi ekopirec?’

²⁷Mume ŋic ʒika fuŋkerâ âgone qaweczi dâŋ ʒiŋuc bâtikiecnewec: ‘Go nâhere kia me soŋaŋ mozi râecguwec?

²⁸Jacne Aigita ŋic qamec iŋuc jaha no nuzo mukic me?’

²⁹Eme Mose e dâŋ i manarâ izia wiserâ ra Midiaŋ mâreŋko ŋic furune jaŋere ŋondeŋko juwec. Erâ ŋokac bame ŋokâ jajahec fuacnepic.

³⁰“Eme jara 40 mocwâc juku ra mâreŋ burocnao Sinai tikifuŋko juhame aŋelo moczi jâc dutunao ʒocbâruŋ maŋko fuacnewec.

³¹Eme Mose e wemo wiaczi weniŋuc ekac muhuc hone‐hâmoocte rame Wofuŋte dâŋ ʒiŋuc fuawec:

³²‘No mimiŋnefâcge jaŋere Anutu, Abraham â Isaka â Jakobo jaŋere Anutu hâcne. Eme Mose e ɋarac ɋarac qahuc dunduŋ dadape domawec.

³³Domame Wofuŋzi ʒiŋuc âzâcnewec: ‘Mâreŋ âtekomec i tiri mâreŋ, irec kikehuhuge heunuckec.

³⁴Ŋicfâc‐nane Aigita mâreŋko fific guguriŋ ejarepie kio wâwâsic epie mana wefukupe tarakac. Eme ʒi batarac‐jopapemurâ wahakopac hâcne. Irec go Aigita mâreŋko sorecgupe razemec.’

³⁵“Ŋic jaŋe Mose qikiŋnehuc ʒiŋuc âzâcnembiŋ: ‘Go mozi kia me soŋaŋ‐nâŋec râecguwec?’ Eme Anutuzi ŋic e hâcne micne bapa â babatara‐jeŋic eocte muhuc aŋelo‐ticne ecneme ʒocbâruŋ maŋko fuacnerâ gie i mucnewec.

³⁶Ehuc soreme ra jowac‐jopa warewec. Iŋuc ehuc Aigita mareŋko â Hâwec Bâbâroŋko â mâreŋ tuhuo mâsi fuŋne fuŋne bahuc juhame jara 40 ewec.

³⁷Erâ Mose ekizia wâc Israe ŋic ʒiŋuc jazawec: ‘Anutu e âgofâc‐ŋeŋic jaŋere ŋondeŋkonec porofete moc no iŋucne bâfua‐ŋareocmu.’

³⁸Iŋuc muwec. Erâ ekizia wâc mâreŋ burocnao mimiŋnefâc‐nâŋec hombaŋ tutumaŋ‐jeŋicko juhuc Sinai tikio aŋelo mickonec fofo sanaŋ dâŋ manarâ jazawec.

³⁹Mimiŋnefâc‐nâŋec jaŋe ine dâŋticne beherâ e jahacne bâsuerâ Aigita mâreŋko risieniŋte maŋjeŋic domame

⁴⁰Aroŋ ʒiŋuc âzâcnembiŋ: ‘Go ɋâŋ qâqâtâc moc banâretec izi bânie‐nâreme risienʒepeneŋ. Mose Aigita mâreŋkonec jowac‐nâpo warewec e sifucke wiac moc ewec mecne.’