ESETA 5

1

2

3

4

5

6

7

8

9

10

¹Dina ihatoina ai Eseta ese ena dagi dabuadia e hahedokilaidia, bena ela, hanua pavapavana ena ruma maguna lalonai e gini, hanua pavapavana ena daiutu vairanai. Hanua pavapavana na ena terono ai e helaiva, ena ruma lalonai, ruma iduarana hevaira hehenina ai.

²Hanua pavapavana ese Queen Eseta na maḡu ai ginana ai e itaia, bena e lalo namo henia. Ena dagi auna, gold ḡauna, na imana ai mia, bena ia ese e toia roro, Eseta e dudui henia. Bena Eseta e raka kahira, hari dagi auna dorina e daua toho.

³Bena hanua pavapavana ese e nanadaia, eto, Queen Eseta, edeheto? Emu ura be dahaka? Ena be egu basileia kahana to baina henimu.

⁴Bena Eseta eto, Hanua pavapavana lalomu bema heḡereḡere, hanua pavapavana bona Hamana na hari dina ai raruosi baoma, aniani vada na heḡaeḡaelaia hanua pavapavana ana, na raruosi bavania.

⁵Bena hanua pavapavana eto, Hamana a boiria haraḡa, ai raruosi na Eseta ena ura heḡereḡerena baia karaia. Taunabunai, hanua pavapavana bona Hamana na ela, Eseta ese vada e heḡaeḡaelaia anianina bae ania totona.

⁶Bena vine ranuna e inuva negana ai, hanua pavapavana ese Eseta e nanadaia, eto, Emu noinoi ḡauna be dahaka? Baina henimu. Emu ura be dahaka? Ena be egu basileia kahana, to baina henimu vaitani.

⁷A Eseta eto, Egu noinoi bona egu ura be iniheto:

⁸bema oi hanua pavapavana ese o lalo namo henigumu, bona o uramu egu noinoi ḡauna ba henigu bona egu ura ba haḡuḡurua, mani emu kara hanua pavapavana bona Hamana na raruosi kerukeru ma baoma, baina heḡaeḡaelaia anianina ma bavania, bena hanua pavapavana emu hereva heḡereḡerena do baina karaia.

⁹Una dina ai, Hamana na e raka lasi mai moalena ida; lalona na e moale bada. A Hamana ese Morodekai na hanua pavapavana ena ikoukou ai e itaia, ia na se tore isi bona ia vairanai se gari, bena ena badu na e ḡaraḡara Morodekai enai.

¹⁰Ḡau tamona, Hamana na e haheauka, bona ena ruma ela. Bena ia ese haida e siaidia lao, ia turana bona adavana Serese bae hakaudia mai.

¹¹Bena Hamana ese e hereva henidia, ena taḡa hairaidia, bona natuna mamaruanedia na edehohodia, bona dagi idau-idau hanua pavapavana ese vada e henia, ia ihanamolaina totona, bona hanua pavapavana ese vada e abia dae, ena lohia taudia bona ena hesiai taudia iboudiai daediai, sivaraidia e gwaurai.

¹²Hamana ma eto, Queen Eseta ese danu ta se boiria, hanua pavapavana baine bamoa, vada e heḡaeḡaelaia anianina ianina totona, a lau mo sibogu; bona ma vada e vavegu lou, kerukeru hanua pavapavana ida ma baiala.

¹³A ina idoinai na do se hanamolaigu ḡuḡurumu, hari Morodekai, Iuda tauna, na doini hanua pavapavana ena ikoukou ai helaina ai na itaiamu negadia ai.

¹⁴Bena ia adavana Serese bona turana iboudiai ese e hamaoroa, eto, Tau-dae auna ta, ena lata na kiubit imahui, na baine hekara; bena daba ai hanua pavapavana ba hamaoroa, baine hahedua, Morodekai na una ḡau dorina ai bae mataia. Bena hanua pavapavana ida aniani ianina baola mai moalemu ida. Ina hereva na Hamana ese e abia dae; bena e hahedua, hari tau-dae auna bae karaia.