Ecclesiastes 1:1-14

¹Wei lamna tauviararamana, David natuna, mai Israel ai gulau ana viararamana;

²Tauviararamana i riwa, “Anona eḡa! Anatapuna kwakwavina!”

³Ma nolanola da ma magura ma anona aiwai?

⁴Kimta e nenei ma e nenae, wate dobu maemaena e mamae.

⁵Madeḡa e gogogo ma e arearere, ma e wanawanavirai da ina vikarena-melei.

⁶Kariwabu e ḡotaḡota, rauanaḡa e opuopu, e kwavikwaviviro ma e wanawanavirai da ina vikarena-melei.

⁷Waira anatapui au boga e opuopu, wate boga eḡa ita oaoai. Waira matanei, e ḡaiḡairai ma e nenae me au matana.

⁸Kaua anatapuna i viʼnigarigari, menanare tana riwa nei? Matata eḡa melanai ina inana iaua; Taniḡata eḡa melanai ina nonora iaua.

⁹Aiwai wariaḡa i tupua ina tupua me, aiwai wariaḡa i kauei ina kauana-melei. Eḡa aiwai, kaua vouna wei au dobuna!

¹⁰E ririwa, “Ona inanai! Wei kaua vouna.” Wate eḡa! Wei kaua maemaena; wariaḡana, muriai da ta tupua.

¹¹Kaua wariaḡa i tuputupua, eḡa aiai ita notanotai. Ma kaua marina da muriai e tuputupua, eḡa aiai ina notai.

¹²Tau lamna tauviararamana ma Israel ai gulau au Jerusalem.

¹³Orau a terei da aiwai anatapuna au dobu e tuputupua, nuaulaulei ana girumi. Ma a aramanei da God vita ḡaeḡaena rava i verei.

¹⁴Aiwai e tuputupua au dobu a vinua-notenotei ma a inanai da; anatapui anona eḡa, kwakwavina. Ive ava ta viviaḡaḡei.