Doma yacnocquidon Iste 8:2-30

²Icsaquido yec bëdamboec tabadtiapimbo icsho Nuquin Papan cuidtequido icboedëmbi Esus tantiasho Nuquin Papan aton Mayan meniac aidën tantiamiacpadec nuqui bëdamboec tabadanendac.

³—Moisesën chiacpadec bëdamboec tabadec unësash Nuquin Papa yacno tabadebi —queboedi icsaquido yec abembi bëdamboec tabadtiapimbo matses iquec. Adsho isun matses bëdamboen iste bunquin Nuquin Papan aton Madombo Esus matsesmiac. Adoac Nuquin Papan tantiacpadec matses icsaid bedshunec abided cuidadec unëspanëdash.

⁴—Abided cuidadaid con Mado Esus tantiasho bëdamboen isquin con Mayan matses menendambi. Adoac aidën tantiamiac ëmbi Moises chuimiampicpadec bëdamboec tabadendac. Matses abi icsate bunacpadec icsainquio yec bëdamboec tabadendac —queshun Nuquin Papan Esusded cuidpac caondash.

⁵Adec Nuquin Papan Mayanën tantiamiaid Esus tantiaquid Nuquin Papan tantiacpadec bëdamboec tabadte bunec. Padnuen icsaquid: —Ëbi bunaid nanu —quequin ambibi tantiacpadec icsaic.

⁶Aden abi bunaidquio naic icsamboec tabadquid Nuquin Papan cuidendac. Padnuen Nuquin Papan Mayanën tantiamiacpadec tabadquid Nuquin Papan cuidte dacuëdënenquio yec bëdambo yec unësash Nuquin Papa yacno tabadendac.

⁷—Icsate bunquidën ëbi chieshënec. Ambi naiduidtsëqui naquin ëmbi chiacpadomboen natiapimbo iquec —queshun Nuquin Papan cuidendac.

⁸Adquido chuiquin: —Mibi bëdambo iquec —catiapimbo Nuquin Papa iquec.

⁹Esus tantiaquidien adesa nec. Esus tantiasho Nuquin Papan aton Mayan nuqui meniac aidën tantiamiacpadec nuqui bëdamboec tabadendac. Nuquin Papan aton Mayan meniacmaid Esus tantiesa nec. Nuquin Papan Mayan Esusën Mayambidi nec.

¹⁰Abided cuidadaid Esus tantiasho bëdamboen isquin Nuquin Papan aton Mayan meniaid yec abëd tabadtequido nuqui nec. Icsaquido yec matses abitedi unësquidombo icnubi Esus tantiaquid unësacsho Nuquin Papan abëdi tabadmendac.

¹¹Esus uincuemequidën Nuquin Papan ambi aton Mayan meniaido unësacsho nuqui uincuemequin nuquin dada utsi uaindac. Aton Mayan nuquibëd tabadsho isun nuqui adoendac.

¹²¿Ëbi adsho tantiashta Esus tantiaquid abi bunacpadequi icsapec? Padenquio. Bëdamboec tabadte bunec.

¹³Utsiboen abi bunacpadec icsamboecuidi tabadec unësacsho cuidquin Nuquin Papan icsano nidmendac. Nuquin Papan Mayanën tantiamiacpadec tabadquin nuqui icsaid nuqui ënec. Adash unësash Nuquin Papa yacno nuqui tabadendac.

¹⁴Aden aton Mayanën bëdamboec tabadmiaido Nuquin Papan: —Con mado nec. Con champi nec —capendac.

¹⁵¿Icbo icsambo icquidën yua dacuëdmiacbimboenda Nuquin Papan Mayanën nuqui dacuëdmec? Padenquio. Nuqui bëdambo icmec. Aidën tantiamiacpadomboen Nuquin Papauidtsëqui papa nuqui capec.

¹⁶Aden Nuquin Papan Mayanën: —Nuquin Papan mado nec. Adecbidi aton champi nec —nuqui catsiash. Adoac: —Ai, Nuquin Papan mado nebi —dada quenubi chido: —Adecbidi Nuquin Papan champi nebi —quepec.

¹⁷—Con mado nec. Con champi nec —queshun nëbi Nuquin Papan nuqui bëdamboen isquin unësacsho abëdi tabadmequin nuqui bëdamboshë icmendac. Utsibon chieshënac chieshtoenquio yec unësacsho Nuquin Papan abëdi tabadmequin Esus bëdamboshë icmiac. Adembidi Esus tantiaquid icsho utsibon chieshënaqui chieshtoenquio icquin Esus tantiequi unësacsho Nuquin Papan abëdi tabadmequin nuqui bëdamboshë icmendac. Nuquin Papa yacnombo Esuquidistun natedi nuquin na nendac.

¹⁸Adec Nuquin Papa yacno nuqui bëdamboshë icte tantiaquin nuqui nidaidën natiaic tabadaiduidi ma nuqui tantiatiapimbo iqueyoc.

¹⁹Aden Nuquin Papan nuqui bëdamboshë icmete tantiec ambi uaid utsitedi nidaidën icquidtedi aben icquidtedi: —Nëbimbobi bëdambo icmepashuni —queded-quededec tabadec.

²⁰Abia matses uaid Adan icsasho cuidquin ambi uaid nidaidën icquidtedi Nuquin Papan unësquiduidquio icmepampic aidon: —Padi —catiapimbo icnuc.

²¹—Yuecshun ëmbi Esus tantiaquido uincuemequin aton dada utsi uacpadën ëmbi uaido utsi nidaidën icquidtedi chodquete icboedi utsi uain bëdamboshë icmendambi —quequin tantiaquimbi unësquiduidquio icmepampic. Aden Nuquin Papan chiaid tantiaquin ambi uaidon nidaidën icquidtedishun aton dada abi bëdambo icmete tantiaquin cainec tabadec.

²²Unëstiapimbo icte bunec unësquid yec: —¿Tedectsicshun Nuquin Papan nuqui utsi uapeba? Nëbimbobi Nuquin Papan utsi uapashuni —queded-quededec Nuquin Papan uaidtedi. Bacuë tishquid bacuë paëmbo icnuc: —Badedquio tishmepashuni —quiacbimboec adpec.

²³Nuquin Papan meniaidën aton Mayanën tantiamiacpaden nuquitsen naden chiec. —Con dada utsi uaquin unëstiapimbo icquid icmepashuni. Ambi chiacpadomboen naquin: “Con mado neque. Con champi neque. Utsibo ismenu,” quequin nuquin dada utsi uaquin Nuquin Papan unëstiapimbo icquid icmendac —queded-quededquin nuquin dada utsi uate tantiaquin nuqui cainec.

²⁴—Esus tantiaquido unësacsho Nuquin Papan nuquin dada utsi uaindac —quequin tantiaquin nuqui Esus tantiabenondac. Nuquin dada utsi uabi icnubi: —Nëbimbobi dada utsi uapashuni —nuqui queded-quededendac yuec. Nuquin Papan nuquin dada utsi uaquien nuqui adenquio iquendac.

²⁶—Aden aton dada utsi uate tantiaquin yuen cainec chieshtonoshe —queshun Nuquin Papan Mayanën nuquibëd icquin bëdamboen tantiamec. —¿Mitsipadembimbi Nuquin Papa chuipeba? —quec nuqui shubitiadquio icsho isun Nuquin Papan Mayanën abi chiec. Unësquio icnuc onquenquio icquin chiec: —Mimbi tantiacpadomboen aid matses bëdambo icmeta, Papa —quequin Nuquin Papan Mayanën nuqui comapenen chuided-chuidedec.

²⁷Aden Nuquin Papan: —Ma Esus tantiaquido bëdambo icnu —quequin tantiaidbidi aton Mayanën onquenquio icquin chuisho Nuquin Papan tantiec. Otacquio tantiaidtedi tantiaquid icquin Nuquin Papan aden aton Mayanën chiaid tantiec.

²⁸Aden tantiashun nuqui naden tantiec. Ambi tantiamiacpadomboen abi tantiaquido bëdambo icmete bunquin Nuquin Papan bëdamboen nashunec. Unësquio yec tabadsho aden naic. Natiambo icsho adembidi naic. Cuishonquesho adembidi naic.

²⁹Ëndenquimboshë nidaid uabi yequi Nuquin Papa nadpampic. —Ëmbi tantiactedi ëbëdta con Mado tantiaquid icmequin Esuspadquio icnuc bëdambo icquid icmendambi. Aden abi tantiaquido aton utsibobimboecnuc icmendabi —quequin ambi tantiampicpadquio icnuc bëdambo icmenuen Nuquin Papan naic.

³⁰Ëndenquimboshë nidaid uabi yec: —Yuecshun naindambi —abi quiampicpadomboen Nuquin Papan nuqui Esus tantiamiac. Adoac nuqui cuidmenquio icnuec abided cuidadaid Esus tantiasho Nuquin Papan nuqui bëdamboen isec isaisabimboecnuc. Nuqui bëdamboen isquin nuqui bëdamboen tabadmec. Unësacsho nuqui unëstiapimbo icquid icmeshun abëdi tabadmendac.