Rom 8:2-30

²Mino Manido mega aja nitibenimig, ka minadjin pimadizi8ini ini8e Jesos Christikag ka iji tibendagozindjin. Ka8in dac aja patado8in nitibenimigosin kidji odji nibo8an.

³Kakina a8iag cagozi, acitc ka8in a8iag okackitosin kidji ndotagin Coda8inni Inakonige8inan, kidji gi odji odisigodj pimadizi8ini. Kije Manido dac ogi pidjinija8an 8in Og8izisan ooma akig, kidji pi anicinabe8iidizondjin, tabickotc kina8it ka patadiak kidji pi ijinagozindjin, kidji pi nda nibondjin kipatado8ininanan odji. Mi iidi kagi iji cagodjitodj patado8ini, ega 8ikad mina8adj patado8in kidji cagodjiigo8ak.

⁴Ogi todan iidi kidji gi k8aiak8adiziak, adi enakonigemaganigin Coda8inni Inakonige8inan kidji inadiziak. Nogom dac kitodananan adi eji nda8endag Mino Manido, ka8in 8in kitodasinanan adi kina8it tibina8e eji kitci madji mosa8endamak kidji todamak.

⁵Igi8e ka inakamigizi8adj adi 8ina8a tibina8e eji mosa8endamo8adj kidji todamo8adj, mi eta mojag ka iji min8endamo8adj eji mamidonendamo8adj. Igi8e dac ka inakamigizi8adj adi eji nda8endamindjin Mino Manidon, apanigotc omamidonendana8a adi ke iji min8endamia8adjin Mino Manidon.

⁶Igi8e apanigotc ka mamidonendamo8adj 8ina8a eta kidji min8endamiidizo8adj, kada nibo8ag. Igi8e dac apanigotc ka mamidonendamo8adj kidji min8endamia8adjin Mino Manidon, kada pimadizi8ag acitc kada pekadendamog.

⁷Igi8e apanigotc ka mamidonendamo8adj adi eji min8endamo8adj, ka8in odji pejig osagiasi8a8an Kije Manidon. Ka8in otodasina8a adi enakonigendjin Kije Manidon, acitc ka8in 8a8adj okackitosina8a kidji ndota8a8adjin.

⁸Igi8e apanigotc ka todamo8adj adi eji min8endamo8adj, ka8in okackitosina8a kidji min8endamia8adjin Kije Manidon.

⁹Kina8a dac, ka8in apanigotc kitodasina8a adi eji min8endameg. Tiegodj, kitodana8a adi eji min8endag Mino Manido, kikigickago8a mega. Kicpin a8iag ega kigickagodjin Mino Manidon, ka8in Jesos Christikag iji tibendagozisi.

¹⁰Kicpin dac kigickago8eg Jesos Christ, Mino Manido kiminigo8a pimadizi8ini, misa8adj e inendag8agin kia8i8an kidji nibomagagin egi patadieg. Kik8aiak8abamigo8a mega Kije Manido.

¹¹Kije Manido ogi abidjibaan Jesos Christan nibo8inikag. Kicpin dac Omino Manidoman kigickago8eg, ketcinam kiga abidjibaigo8a kekina8a, e abadjiadjin Mino Manidon ka kigickago8eg kidji koki pimadizimagagin kia8i8an ke nibomagagin.

¹²Nidjiki8eg! Panima ki inadiziak ka iji min8endag Mino Manido, ka8in sa kidinendagozisimin kidji iji inadiziak kina8it tibina8e eji min8endamak.

¹³Kicpin inadizieg adi eji min8endameg, kiga nibom. Anic dac kicpin pagidineg Mino Manido kidji 8idjiigo8eg, kidji gi poni ijitcigeieg kakina ka iji madji inakamigizieg kia8i8akag, kagige kiga pimadizim.

¹⁴Kakina a8iagog Kije Manidon Omino Manidomini ka nosone8a8adjin, Kije Manido odabinodjijiman ijinagozi8ag.

¹⁵Mino Manido mega kagi odisigo8eg ka8in 8in kimadji todagosi8a acitc ka8in kinada8enimigosi8a mina8adj kidji segizieg. Mino Manidon megada ka minigo8eg Kije Manido, odabinodjijiman kidji ijinagozieg, acitc 8in ka pagidinigo8ak kakina pepejig e taciak “Nidadam!” kidji gi ijinikanaiak Kije Manido.

¹⁶Mino Manido ki8idamagonan kideinakag Kije Manido odabinodjijiman e ijinagoziak.

¹⁷Odabinodjijiman dac e ijinagoziak, kiga odji minigonan ini mino kegonan ka kana8endagin odabinodjijiman odji. Kina8it acitc Jesos Christ ma8asag kiga odisigonan ini mino kegonan. Kicpin mega kodagito8ak tabickotc ke8in kagi iji kodagitodj, kiga odisigonan icpendagozi8in tabickotc 8in.

¹⁸Teb8e kikitci kodagitomin nogom. Anic dac nikikendan inigik eji kodagito8ak nogom, ka8in inigik ijinag8asinon ke ijinag8ag icpendagozi8ini ke minigo8ak Kije Manido.

¹⁹Kakina kegonan kagi kijendagin Kije Manido kitci piomaganon kidji odjitcisenig apitc ke 8abadai8edj Kije Manido adi ini8e odabinodjijiman.

²⁰Kakina mega kegonan Kije Manido kagi kijendagin ki adjitcigadeni8an, ega kidji apitendag8anigin. Ka8in iidi iji nda8endamomagasinobanin ini kegonan, 8in Kije Manido kagi iji onendag iidi. 8in mega odiji nda8endanaban

²¹nigodin kidji odjitcisenig ega 8ikad mina8adj kidji 8anadanigin ini kegonan kagi kijendagin, tabickotc nogom ka iji nta 8anadanigin. Ka8in mega aja onada8endasinaban kidji cagodjitcigadenigin, tiegodj kidji aiamindjin ke8ina8a icpendagozi8ini, tabickotc ke aiamindjin Kije Manido odabinodjijiman.

²²Kikikendananan kiabadj nogom e kitci kodagitomaganigin kakina kegonan Kije Manido kagi kijendagin, tabickotc ik8e ka akozidj kidji ani nta8igindjin odabinodjijiman.

²³Ka8in dac eta ini kegonan kodagitomagasino8an. Kigi minigonan Kije Manido Mino Manidon kidji 8abadai8edj teb8e kidji minigo8ag kodagian oca8endjige8inan. Misa8adj dac, kekina8it kideinakag kitaji mokonemin, meg8adj e pito8ak Kije Manido odabinodjijiman kidji ijinikanigo8ak, ega 8ikad mina8adj kia8inakag kidji iji kodagito8ak.

²⁴Kikitci pitonanan dac ii kidji iji8ebiziak, ka ako ag8acimigo8ak Kije Manido. Apitc dac ki iji8ebiziak, ka8in aja kiga pitosinanan. Ka8in mega a8iag opitosin kegoni aja ki iji8ebanig.

²⁵Midac kipitonanan kegon ega 8ikad maci e 8abadamak. Kicacibendananan dac meg8adj e pio8ak.

²⁶Kipi 8idjiigonan acitc Mino Manido, kikitci cagozimin mega. Ka8in kikikendasinanan adi ke iji aiamieiak. Mino Manido dac 8inigotc tibina8e Kije Manidokag kitaji aiamietamagonan. Aiamie e mokonedj, ka8in mega tag8asino8an ikido8inan kidji in8emaganigin adi eji aiamiedj.

²⁷Kije Manido mega okikendan adi ejideeiak kakina ka taciak, acitc okikendan adi enendamindjin Mino Manidon. Mino Manido mega odaiamietama8an ini8e Kije Manidokag ka iji tibendagozindjin, eji aiamiedj adi ka iji nda8endamindjin Kije Manidon.

²⁸Adigotc eji8ebizi8adj, kikikendananan Kije Manido kidji mino toda8adjin ini8e ka sagiigodjin, kagi onenimadjin kidji nd8e8emadjin.

²⁹Ono8e mega Kije Manido kagi onabamadjin, nigan ogi ineniman kidji ani ijinagozindjin Og8izisan ka ijinagozindjin. Midac Og8izisan tabickotc kitci oseezima ijinagozi8an, acitc dac kitci mane8an ocimejan.

³⁰Ono8e dac kagi inenimadjin kidji ani ijinagozindjin Og8izisan ka ijinagozindjin, ogi nd8e8eman. Ono8e kagi nd8e8emadjin, ogi k8aiak8abaman. Ono8e kagi k8aiak8abamadjin, ogi minan odicpendagozi8in.