Romanos 8:2-30

²Cate' ṉe' zoacho chontezcho da' malen' nchoglaon c̱hecho si'cho castigw c̱he xtoḻa'chon' toḻi tocaṉe, perw ṉa'a Spiritw c̱he Diosen' ba beṉen chio' yeḻa' mban toḻi tocaṉe da' chejnilaže'cho Cristo Jesúsen' na' Spiritw c̱hen' chnabian' yic̱hjlažda'ochon'. Da'nan' bich saca'zi'cho toḻi tocaṉe.

³Ley da' bzoj Moisésen' bi gwzoen yebejen chio' ḻo' da' malen', ḻe yo'o da' malen' ḻo' yic̱hjlažda'ochon'. Nach Diosen' gwseḻe' Xi'iṉe' Jesucriston' golje' yežlion', goccze cuerp c̱hen' ca cuerp c̱he chio' beṉe' güen da' xiṉj. Na' Jesucriston' bnežjw cuine' ṉec̱he xtoḻa'chon' cont da' malen' bich ṉabian' chio' len xbab da' yo'o ḻo' yic̱hjlažda'ochon'.

⁴Diosen' gwseḻe'ne' cont soacho goncho da' güen can' ža ley c̱hen' cheyaḻa' goncho. Ḻe bich chzenagcho c̱he da' malen' dan' yo'o ḻo' yic̱hjlažda'ochon', san ba zoacho choncho da' güen lagüe dan' chzenagcho c̱he Spiritw c̱he Diosen'.

⁵Še chzenagcho c̱he da' mal dan' yo'o ḻo' yic̱hjlažda'ochon', con da' malzen' chebecho choncho; san še chzenagcho c̱he Spiritw c̱he Diosen', chebecho choncho da' ca' chazlaže' Diosen'.

⁶Ḻe še zoacho chebecho da' malen', nachle si'cho castigw toḻi tocaṉe, na' še chebecho da' ca' chazlaže' Spiritw c̱he Diosen', guata' yeḻa' mban c̱hecho toḻi tocaṉe na' soa cuezcho binḻo len xbab dan' yo'o ḻo' yic̱hjlažda'ochon'.

⁷Choncho ze beṉe' chgue'e Diosen' cate' chebecho da' malen', ḻe cate' chebecho da' malen' bi chazlaže'cho ṉeca chac gwzenagcho c̱he ley c̱hen'.

⁸Na' še zoacho chzenagcho c̱he da' mal dan' yo'o ḻo' yic̱hjlažda'ochon', bi chebe Diosen' chio'.

⁹Na' chio', da' ba bedesoa Spiritw c̱he Diosen' ḻo' lažda'ochon', bi zoacho chzenagcho c̱he da' malen' da' yo'o ḻo' yic̱hjlažda'ochon', san zoacho chzenagcho c̱he Spiritw c̱he Diosen'. Na' beṉe' bi zoa Spiritw c̱he Criston' ḻo' lažda'ogüen', gague da' ḻi chejnilaže' Criston'. (Spiritw c̱he Criston' ḻecze naquen Spiritw c̱he Dios.)

¹⁰Perw na' še ba zoa Criston' len chio', Diosen' že' naccho beṉe' güen len ḻe' na' ḻecze šjayzoacho len ḻe' toḻi tocaṉe ḻa'czḻa' yesat cuerp c̱hechon' ṉec̱he da' malen' dan' de yežlion'.

¹¹Diosen' bec̱his bosbane' Cristo Jesúsen' ladjo beṉe' guaten', na' ḻecze gwžin ža cate' Diosen' yec̱his yosbane' chio' len cuerp c̱hecho quinga da' chesat, ḻe Spiritw c̱hen' zoan ḻo' lažda'ochon'.

¹²Da'nan' beṉe' migw, chonen byen gwzenagcho c̱he Spiritw c̱he Diosen'. Bi cheyaḻa' gwzenagcho c̱he da' mal dan' yo'o ḻo' lažda'ochon'.

¹³Ḻe še soacho gwzenagcho c̱he da' mal dan' yo'o ḻo' lažda'ochon', saca'zi'cho toḻi tocaṉe. Na' še gwzenagcho c̱he Spiritw c̱he Diosen' cont bi gwzenagcho c̱he da' malen', nach gata' yeḻa' mban c̱hecho toḻi tocaṉe.

¹⁴Na' note'tezcho še chzenagcho c̱he dan' chzejni'i Spiritw c̱he Diosen' chio', naccho xi'iṉ Dios.

¹⁵Diosen' beṉe' chio' Spiritw c̱hen' caten' gwque'e chio' ca xi'iṉe'. Da'nan' bich chžebcho Diosen' can' chžebcho to beṉe' znia cate' choncho xšinen'. Bich chžebcho Diosen', san choḻ güižchone', che'chone': “X̱a'”.

¹⁶Na' ḻecze Spiritw c̱hen' chṉen ḻo' lažda'ochon' cont ṉezecho naccho xi'iṉ Dios.

¹⁷Na' da' naccho xi'iṉ Dios, gwžin ža cate' yogo' da' de c̱he Criston' gaquen c̱hecho txen len ḻe'. Na' can' bzanḻaže' cuin Criston' gwdi gwxaque', can' cheyaḻa'cze zanḻaže' cuincho saca'zi'cho bi da' gac c̱hecho cont Diosen' gone' ga gacchgua güen c̱hecho txen len ḻe' yaban'.

¹⁸Yežlio nga de da' chzaca'zi' chzaca'yaše'cho. Perw chacda' bibi zaca'czen cue' yic̱hjcho c̱he da' ca' chac c̱hecho, ḻe gwžin ža ḻeca mba juisyw gac c̱hecho cate' šjayzoacho len Diosen'.

¹⁹Diosen' bene' beṉac̱h, bene' beyix̱e', len bica'chle da' zjade. Na' yogo'cho len bichle da' ca' bene' zoacho ḻo juisyw chbezcho batcan' gon Diosen' gacchgua mba c̱he chio' naccho xi'iṉe'.

²⁰Na' yogo' da' ca' ben Diosen' bich zjanacšagüen'. Na' gague con to gualazen zjanaquen ca', san Diosen' bžie' bia' zjanaquen ca'. Perw za' yeyonšagüe' Diosen' ḻegaquen len beyix̱e' ca' na' len chio' beṉac̱h. Na' txen chbezcho gone' cont gac c̱hecho binḻo.

²¹Yogo'cze da' ca' bene' yesebiayin', na' chesebezen batcan' žin ža cate' gone' cont yeyac cuerp c̱he chio' naccho xi'iṉ Diosen' da' cobe na' da' zaca'chgua can' nac c̱he Criston', ḻe canan' ḻecze yesyeyacšagüe' da' ca' cont bich te c̱hegaquen.

²²Ṉezecho ža ṉa'aža yogo' da' ca' ben Diosen' chesežaglaon ca to no'ole beṉe' chzan.

²³Na' gague da' ca'ze chesežaglaon, san lencze chio' beṉac̱h chžaglaocho na' chbežgüe'cho. Ba beṉ Diosen' chio' Spiritw c̱hen' cont ṉezecho gwžin ža gaquech güen c̱hecho. Na' chbežgüe'cho ḻo' lažda'ochon' chbezcho batcan' goṉ Diosen' cuerp cob c̱hechon' cont gwlo'e ba nque'e chio' ca xi'iṉe'.

²⁴Cate' Diosen' beṉe' yeḻa' mban c̱hecho toḻi tocaṉe gwzolao chbezcho goṉe' cuerp cobe c̱hechon', na' ḻenṉa' ṉe' chbezcho. Nono zoa ṉe' chbeze' gac da' ṉezde' ba goc.

²⁵Na' še biṉa' le'echo da'na' chbezcho gac, cheyaḻa' cuezcho gaquen sin cbi chjax̱aque'laže'cho.

²⁶Na' Spiritw c̱he Diosen' chaclenen chio', ḻe bi ṉezecho can' cheyaḻa' goncho yoḻ güižcho Dios, san Spiritw c̱he Diosen' chacbe'en cate' con chebanecho na' cate' bi cheželecho diža' da' güe'lencho Diosen', nach chṉen gualazcho len diža' da' bi chejni'icho.

²⁷Na' Dios ben' chṉa' chgüie' yic̱hjlaždao' yogo'cze beṉe', chejni'ide' bin' chaclaže' Spiritw c̱hen' cate' chṉen gualazcho, ḻe ba gwleje' chio' naccho ḻo ne'e. Na' con da' chaclaže' Diosen' chṉab Spiriton' lagüen'.

²⁸Na' ṉezecho bite'tez dan' chac, Diosen' chone' cont gac güen c̱he chio' chaquechone', ḻe ba gwleje' chio' cont naccho ḻo ne'e can' gwnalaže'.

²⁹Cate' biṉa' galjcho Diosen' gwṉezde' šejnilaže'chone' na' bsi'e xṉezen' gac yic̱hjlažda'ochon' güen can' nac yic̱hjlaždao' Xi'iṉe' Jesucriston'. Bsi'e xṉezen' gac Jesucriston' beṉe' blao lao yogo'cho na' chio' gaccho ca biše' ḻježe' bi' xcuide'ch.

³⁰Can' naquen, cani'te Diosen' bsi'e xṉezen' gac yic̱hjlažda'ochon' güen can' nac yic̱hjlaždao' Jesucriston' na' gwleje' chio' cont naccho ḻo ne'e. Ḻecze beyone' chio' beṉe' güen len ḻe' na' bene' cont gacchgua güen c̱hecho txen len Jesucriston' yaban'.