Dad Nimò 10:8-13

⁸Na tulenan dale i kdee ta mkel, klon mdek dale salu ditù di Dyopa.

⁹Di tmadol du, kanto fan ltu du, ta mdadong ale di Dyopa. Na Piter, myak kenen di tah ataf i gumnè du dmasal.

¹⁰Na ta too kenen bitil, na mayè kmaan. Na di lamla mimò i knaan, nun kanteenan.

¹¹Yé teenan ta mgukà i langit, na nun gambet bong kayab nikat di sbalà syungan fayol kel di tanà.

¹²Na nun dad sahal lmanaf, na dad kmamang, na dad anuk di bnas mnè di laman.

¹³Na nun lingen talù di kenen, manan, “Piter, tadag ge. Tmatê ge, na knaanam.”