Daahili Aloho 6:3-13

³Dogu aloho la ni aagu, gei au ni mee. Mee e haangai ana siibi i mehanga daladala.

⁴Dogu aloho, do madanga e hai gadoo be Jerusalem, e humalia gadoo be di waahale Tirzah, mo do hagadilinga le e humalia gadoo be nia waahale llauehe aanei.

⁵Huluhia o golomada gi daha mo au, o golomada le e hai au gi magedaa. Nia ngaahulu do libogo le e gagaalege gadoo be di buini kuudi ala ma ga llele ia i di gili nia gonduu o Gilead.

⁶Oo niha e kene gadoo be di buini siibi ala dogo lawa di gaugau. E dahi niha ne doo ai, huogodoo e madatau hagahumalia.

⁷O gauwae e maahina mai i tua doo mee gahu golomada.

⁸Di king gi heia ono lodo e modoono, ge huwowalu lodo hege, mo ana dama ahina dogologowaahee dono hulu ai!

⁹Gei au dagu dangada hua e dahi dela e aloho iei au, dela e madanga gadoo be di mwuroi. Mee tama ahina hua e dahi o dono dinana, tama ahina dela e mohoni ginai dono dinana. Nia ahina huogodoo e mmada gi mee, e hagaamu a mee. Nia lodo donu mo nia lodo hege o di king e dadaahili hagahagaamu a mee.

¹⁰Tangada la koai deenei, dela e daba mai ono golomada gadoo be di heniheni? Mee e madanga ge maahina gadoo be di laa be di malama.

¹¹Au ne haneia gi lala i mehanga nia laagau ‘almond’ belee mmada nia laagau lligi ala e tomo i mehanga gonduu, gi gidee labelaa nia lau laagau hoou ala e matilitili mai i di gili nia laagau ‘grape’ mo nia akai laagau ‘pomegranate’ ala gu moholoholo.

¹²Au gu bolebole mo di tenetene. Goe guu hai au gi hagamahidi ogu lodo ang gi di aloho, gadoo be tangada deledele waga dauwa hongo henua ma ga hagamahidi gi tauwa.

¹³Gaalege, gaalege, go tama ahina o Shulam, gi mmada adu gimaadou gi di goe dela e gaalege. Di ahina Goodou e aha ala e hiihai e daumada au e gaalege i mehanga nia goolongo dangada ala e mmada?