Daahili Aloho 4:1-12

¹Goe e madamada huoloo, go dogu aloho! O golomada e mmada mai haga humalia i lodo dau mee gahu golomada. Nia ngaahulu o do libogo e dehedehee gadoo be di hagabuulinga kuudi ma ga llele ia gi lala i di gili nia dama gonduu o Gilead.

²Oo niha e kene hila mmaa gadoo be nia siibi ala hua dogo dahi nadau gili, gaa lawa ga gaugau. Deai di niha ne doo ai, huogodoo e madatau hagahumalia.

³O malaungudu e hai gadoo be taula gahu mmee, koia e madanga i do madagoaa ma ga leelee. O gauwae e maahina mai i lodo dau mee gahu golomada.

⁴Doo uwa e labubudu ge malallali gadoo be di angulaa a David, mo dono hau uwa e hai gadoo be nia mee duuli e mana.

⁵Oo uu e hai gadoo be nia manu ‘gazelle’, nia hagahaanau ee e lua e miami i lodo di waa daladala.

⁶Au gaa noho i hongo di gonduu ‘myrrh’, di gonduu lolokala, gaa dae loo gi di angiangi magalillili o di luada ma ga iliili mai mo dono bouli e maa gi daha.

⁷Dogu aloho, goe e madanga huoloo, nia mee huogodoo i doo gili guu hai donu!

⁸Dagu ahina hai lodo, hanimoi gi daha mo nia gonduu Lebanon, gidaua gaa hula gi daha mo Lebanon. Gidaua ga kaga ia gi daha mo nia ulu di Gonduu Amana, mo di Gonduu Senir, mo di Gonduu Hermon ala e noho ai nia laion mono ‘leopard’.

⁹Dogu aloho mo dagu ahina hai lodo, o golomada mo do hau uwa dela e hau iei goe gu haga ngalungalua dogu manawa.

¹⁰Dogu aloho mo dagu ahina hai lodo, do aloho e hagatenetene au, do aloho e koia e kala i nia waini. Dau lolokala koia e kala i nia lolokala ala i golo.

¹¹Di kala o nia mee maangala laagau la gu i di gili o malaungudu, dogu aloho, do holole e hai gadoo be nia milugu mono mee maangala laagau i lodo dogu ngudu. O goloo gahu e llamu i di hauiha kala o Lebanon.

¹²Dogu aloho mo dagu ahina hai lodo, goe la di hadagee mo dono dama monowai gu abaaba, gu duuli hagammuni gi daha mo nia daangada,