Daahili Aloho 3:5-11

⁵Nia ahina o Jerusalem, hagababa mai gi di au, doange mai gi di au i di ingoo o nia ee ala e llele huoloo mo nia manu ‘gazelle’ bolo goodou hagalee haga deaadee di mau aloho.

⁶Ma di aha dela e hanimoi i lodo di anggowaa gadoo be tuludulu huiahi, dela e hauiha lolokala gi nia ‘incense’ mo nia ‘myrrh’, nia ‘incense’ ala e huihui go digau kokoodai mee?

⁷Solomon e hanimoi, e laha mai i hongo dono lohongo king. Digau dauwa e modoono e madaloohi a mee, ala go digau e kaedahi i Israel.

⁸Digaula huogodoo koia e iloo di hai hegau gi tulumanu dauwa, ala go digaula ala e aali i di hai dauwa. Tangada nei mo tangada nei i digaula guu hau ginai tulumanu dauwa ga madaloohi laa i di boo.

⁹Solomon e dagidagi i hongo dono lohongo king ne hau gi nia laagau koia e humalia.

¹⁰Nia waduu o di maa le e hii ono gili gi nia silber. Hongo di maa e gahu gi di gahu guu lili ginai nia goolo. Laa lodo e hii gi nia gahu mmee uli gu llanga go nia ahina o Jerusalem haga humalia huoloo.

¹¹Nia ahina o Zion, lloomoi e mmada gi King Solomon. Mee e ulu dono goobai king dela ne hagauda go dono dinana gi hongo di libogo o maa i di laangi o mee ne hai dono lodo, go di laangi hagatenetene mo di manawa lamalia o maa.