Buk Song 69:17-33

¹⁷Mi wokman bilong yu, olsem na yu no ken hait long mi. Mi gat bikpela hevi, olsem na yu mas hariap na bekim beten bilong mi.

¹⁸Yu kam klostu long mi na kisim bek mi. Kisim bek mi long han bilong ol birua bilong mi.

¹⁹Yu save pinis long ol man i save tok nogut long mi. Na yu save long ol i mekim mi i sem na daunim nem bilong mi.

²⁰Dispela tok nogut i bagarapim tingting bilong mi, na mekim mi i bel hevi moa yet. Na mi no gat strong moa. Mi bin ting bai sampela man i sori long mi, tasol i no gat wanpela. Na mi ting bai sampela man i givim mi gutpela tok bilong strongim bel bilong mi, tasol i no gat.

²¹Taim mi hangre ol i givim marasin nogut long mi. Nek bilong mi i drai na ol i givim mi wain nogut tasol bilong dring.

²²Orait taim ol i bung long bikpela kaikai, mi laik bai dispela taim bilong amamas i ken kamap samting bilong bagarapim ol, olsem umben i holim abus na olsem hul ol i ken pundaun long en.

²³Mekim ai bilong ol i tudak, bai ol i no inap lukluk moa. Bagarapim baksait bilong ol, bai ol i no inap sanap strong.

²⁴Yu ken kros moa long ol na mekim save long ol. Na belhat bilong yu i ken kisim ol, na bai ol i lus.

²⁵Ples ol i stap long en, em i ken i stap nating, na yu no ken larim wanpela man i stap long ol haus sel bilong ol.

²⁶Sampela man yu bin bekim sin bilong ol pastaim, ol man nogut i wok yet long mekim nogut long ol. Yu bin brukim skin bilong sampela man na givim pen long ol, na ol man nogut i tok bilas long ol na givim hevi long ol.

²⁷Yu no ken lusim tingting long sin bilong ol man nogut. Na yu no ken larim ol i kam insait long lain manmeri bilong yu.

²⁸Yu mas rausim nem bilong ol long buk bilong laip. Na yu no ken putim nem bilong ol i stap wantaim nem bilong ol stretpela manmeri.

²⁹Tasol mi karim bikpela hevi na pen. God, kisim bek mi na mekim mi i orait gen.

³⁰Bai mi mekim song na litimapim nem bilong God, na bai mi tenkyu long em na tokaut long biknem bilong em.

³¹Na bai Bikpela i laikim tumas dispela pasin mi mekim. Em i no save laikim tumas ol ofa bilong bulmakau.

³²Ol manmeri i karim hevi bai ol i lukim dispela na bai ol i amamas. Na ol manmeri i save lotu long God, ol i ken kisim strong gen.

³³Bikpela i save harim prea bilong ol manmeri i sot long ol samting, na em i no save lusim tingting long ol manmeri bilong en ol i stap long kalabus.