SALAMO 69:17-33

¹⁷Lau be oiemu hesiai tauna, unai dainai oiemu vairana, be lau dekena amo do oi hunia lasi. Lauegu hisihisi be bada herea, unai dainai lau dekenai do oi haere haraga.

¹⁸Lau kahirakahira do oi mai, bona lau do oi hamauria. Lau dekenai idia dagedage taudia dekena amo lau do oi hamauria.

¹⁹Oi diba vadaeni, taunimanima ese lau dekenai idia hereva dika noho, bona oi diba danu lauegu hemarai, bona unai taudia edia hereva koikoi dekena amo, idia ese egu ladana idia hadikaia noho. Lau dekenai idia badu taudia ibounai be oi ese oi itaia noho.

²⁰Inai hereva dika ese egu kudouna idia makohia vadaeni, bona durua ta be lasi dainai lauegu laloa ia ore. Taunimanima edia bogahisihisi be lau tahua, to ta lasi. Hereva namona lau do idia henia taudia lau tahua, to ta lau davaria lasi.

²¹Lau be hitolo neganai, mase havaraia muramura lau dekenai idia henia. Lau ranu mase neganai, vinega sibona lau dekenai idia henia.

²²Vadaeni, gabeai aniani bada ena aria do idia karaia neganai, lau ura inai aria ese idia do ia hadikaia ore. Bona aria helagana idia karaia neganai, lau ura inai kara ese, idia do ia hamorua momokani.

²³Edia matana do oi hakepulua! Edia doruna danu do oi hamanokaia hanaihanai.

²⁴Idia dekenai do oi badu! Oiemu badu mai siahu danu idia edia latanai do oi hadihoa, vadaeni dika do idia davaria.

²⁵Edia kamepa do oi hadikaia, vadaeni edia palai rumadia lalonai, tau ta do ia noho lasi.

²⁶Badina be oi ese oi panisia vadaeni tauna, be idia ese ma idia dagedage henia noho. Bona oi ese oi haberoa tauna, be idia ese ma idia hisihisi henia noho.

²⁷Unai taudia edia kara dika do oi laloa boio lasi, bona oiemu hamauria idia dekenai do oi henia lasi.

²⁸Edia ladana be mauri taudia edia buka, dekena amo do oi kokia, bona edia ladana be, kara maoromaoro taudia edia ladana danu do oi haboua lasi.

²⁹Lau be mai hisihisi bada bona durua ta lasi, unai dainai egu laloa ia ore. Dirava e, lau ura oi ese lau do oi abia isi, bona lau do oi hamauria.

³⁰Lau ese ane dekena amo Dirava do lau hanamoa. Dirava ena ladana do lau habadaia, bona ia do lau tanikiu henia.

³¹Inai kara ese Lohiabada do ia hamoalea bada, to boromakau boubouna ese Lohiabada do ia hamoalea maragi. Boromakau tau mai ena doana bona mai ena aena, unai boubou ese Lohiabada do ia hamoalea sisina sibona.

³²Inai kara be ogogami taudia do idia itaia neganai, do idia moale. Dirava ena dala idia tahua noho taudia ibounai ese, goada matamata do idia davaria.

³³Badina be Lohiabada ese, gau lasi taudia edia noinoi ia kamonai henia noho, bona dibura ruma lalonai idia noho taudia, be ia laloaboio lasi.