Buk Song 147:2-12

²Bikpela i sanapim Jerusalem gen na i bringim i kam bek ol manmeri ol birua i bin kisim ol i go kalabus.

³Em i save mekim orait ol manmeri, hevi i bagarapim tingting bilong ol na ol i pilim nogut. Na em i pasim ol sua bilong ol.

⁴Em i makim pinis namba bilong ol sta, na em i save kolim nem bilong ol sta wan wan.

⁵Bikpela bilong yumi i gat biknem na i gat olgeta strong. Yumi no inap makim save bilong en.

⁶Em i save litimapim ol man i save daunim bel bilong ol yet, tasol em i save krungutim strong tru ol manmeri nogut.

⁷Singim ol song bilong litimapim nem bilong Bikpela. Paitim gita na mekim musik long God bilong yumi.

⁸Em i save mekim ol klaut i kamap long skai, na salim ren i kam daun na mekim gras i kamap nabaut long ol maunten.

⁹Em i save givim kaikai long olgeta abus, na taim ol yangpela kotkot i singaut em i save givim kaikai long ol.

¹⁰Bikpela i no save amamas long ol strongpela hos na ol strongpela soldia. Nogat.

¹¹Em i save amamas long ol manmeri i save pret long em, na long ol manmeri i save bilip long em i save sori long ol oltaim.

¹²Yupela ol Jerusalem, litimapim nem bilong Bikpela! Yes, yupela ol Saion, litimapim nem bilong God bilong yupela.