Atos 9:6-19

⁶Owõko ropa hkoty. Ytokose pata pona. Morotona toytose awahtao ypoetory enyohnõko ase oenese. Jomiry ekarõko oya mana, tykase Jezu Sauru a.

⁷Morarame Sauru marõkõ mynyhme toehse. Omi totase eya xine repe. Yrome oturukety onenepyra toh kynexine.

⁸Mame Sauru towõse ropa. Yrome pĩpokah tykase ropa tahtao onetopyra toehse. Emary poko rokẽ tarose imehnomo a Tamaxiku pona.

⁹Morarame moroto oseruao tõmehse ynororo enutara ro. Otuhpyra roropa kynexine, tuna onẽpyra, enara.

¹⁰Mame Jezu poetory moroto kynexine Tamaxiku po, esety Anania. Mokyro a tõsenepose Jezu aosenety. Ynara tykase sã ynororo, —Anania, tykase. —Otara ãko ma Tuisa? tykase ynororo.

¹¹—Ytokose Topohmã ae Juta tapyĩ taka. Moroto awahtao Sauru ekaropoko Tasupono.

¹²Mokyro mã Ritonõpo maro oturũko. Oenẽko roropa mana tõsenety. Oytory enẽko oemary rise epona aosenuhmatohme ropa, tykase sã Jezu eya.

¹³Yrome Anania a tozuhse, —Tuhke tokare mokyro mana. Opoetory tõ zehnoto mokyro Jerusarẽ po. Toto tyyryhmase eya itamurume.

¹⁴Tarona roropa tonehpose ynororo Ritonõpo maro oturukety a opoetory tõ myhtohme, tykase Anania.

¹⁵Yrome Jezu ynara tykase sã eya, —Ytoko jomi poe. Sauru ynymenekahpyry mokyro ypoetoryme. Imeimehnõ pataka ynenyokyryme roropa exĩko mana, juteu tõ pataka, juteutõkara pataka, enara, pata esã maro auturutohme ypoko.

¹⁶Sauru osanumãko toh mana itamurume jomiry poko tamoreparykohtao, jomipona aexiryke. Moro ekarõko ase eya, tykase.

¹⁷Morarame Anania toytose Juta tapyĩ taka, Sauru enese. Epona tomary tyrise eya. —Jepe Sauru, Jezu nosenepoase oya osemae ooepyryhtao. Mokyro jenehpo oya õsenuhmatohme ropa, Ritonõpo zuzenu ekarotohme oya, tykase Anania.

¹⁸Axĩ toepukase kana puhturu panõ enuru ae. Moro esahpyo kure ropa toehse ynororo. Tõsenuhmase ropa. Morarame tõpurihkase ynororo rahkene.

¹⁹Mame tõtuhxĩpo tyjamihtase ropa ynororo. Moroto tuhke pyra tõmehse Sauru Jezu poetory tõ maro, Tamaxikupõkõ maro.